MASALOMIA AUMAI FA’ANANA TAGATA ASIA VAILAAU FAI FA’ATOAGA MAI FAFO

Ua fa’asi’usi’u mata atu nei le Komiti o Fa’atoaga a le Maota Maualuga o le Senate e su’esu’e se tasi o mataupu ua tele i ai faasea a le atunu’u, le mataupu e faatatau i fa’atoaga laauaina a tagata Asia o lo o vaaia le fa’atau solo i tafatafa o le auala faapea ai ma faleoloa eseese i le atunuu, ina ua masalomia o lo o faaaoga i ai vailaau fai faatoaga o lo o aumai faanana mai fafo e teu ma faalapopo’a ai fa’atoaga nei.

 

O le mataupu lenei na laga e le afioga i le ali’i Senatoa mai Ituau ia Soliai Tuipine Fuimaono i luma o le Senate i le vaiaso nei, ina ua toatele tagata o le atunuu e fesiligia le saogalemu o faatoaga laauaina a ni isi o tagata Asia o lo o vaaia le faatau solo i tafatafa o le alatele ma totonu o faleoloa.

 

Saunoa Soliai e faapea, o le toatele o tagata o le atunuu o lo o faasea, e mafua mai ona o vailaau o lo o faaaoga e tausi ma faalelei ai togalaau aina a tagata mai Asia, po o ni vailaau o lo o faataga mai e le Ofisa o Faatoaga pe leai fo’i.

 

O se tasi o atugaluga e pei ona saunoa Soliai, o le tele o faatoaga laau aina a tagata Asia e le gata o lo o faatau i le atunuu ae o lo o faatau atu foi i le polokalame a le School Lunch lea e fafaga ai ma fanau aoga.

 

“E tatau ona mataala le Ofisa o Faatoaga i le mataupu lenei, ina ne’i emo ane le ata o ni vailaau mai fafo o lo o teu ma faalelei ai faatoaga a tagata nei, ona aafia ai lea o le soifua maloloina o tagata i ni faama’i leaga,” o le saunoaga lea a Soliai na lagolago e le afioga i le ali’i senatoa ia LeAtualevao S. Asifoa.

 

Saunoa LeAtualevao e faapea, e tatau ona mataala le malo e suesue vailaau o lo o tausi ai faatoaga a tagata mai Asia manu e le’i toe a’e aoga, aua o le tele o fualaauaina nei o lo o faatau i le polokalame a le School Lunch o lo o fafaga ai fanau aoga.

 

Na taua e le afioga ia LeAtualevao i le Samoa News e faapea, na te masalomia lava e i ai vailaau faalelei togalaau aina o lo o aumai e ni isi o le aufai faatoaga Asia mai fafo ae le o silafia e le malo.

 

O se faamaoniga o lea saunoaga mai le alii senatoa, ona o lona fanua sa faaaoga e tagata mai Asia e toto ai a latou faatoaga togalaau aina, ma sa ia mauaina ai se atigi fagu vailaau o taatia ai i le fanua, ae o le pepa o lo o tusia i fafo o le tino o le atigi fagu e leai ma se upu faaperetania o tusi ai, sei vagana ai upu e tusia i gagana Saina ma Kolea e le malamalama i ai se tasi.

 

O se tasi o itu na faamanino e le ali’i senatoa i lana saunoaga, e le iloa pe aisea e eseese ai le lapopo’a o toga laauaina o lo o toto e tagata mai Asia ma tagata Samoa.

 

“O ni isi o taimi e lapopo’a atu kukama o lo o toto e tagata Asia nai lo tagata Samoa, ma o iina e mafua ai ona masalomia le faaaoga o vailaau o lo o aumai faanana mai fafo,” o le saunoaga lea a le alii senatoa.

 

Na taua e le Faatonusili o le Matagaluega o Faatoaga ia Lealao M. Purcell i le Samoa News e faapea, e le o misi lava asiasiga a le matagaluega i nofoaga taitasi o lo o fai ai faatoaga a tagata mai Asia i le atunuu, mo le asiasia o vailaau o lo o latou faaaoga ina ia mautinoa o lo o saogalemu mo le soifua maloloina o le atunuu.

Comment Here