Ads by Google Ads by Google

Masalomia aiga Tuufuli Savea na maliu o ia i se gaioiga a se tagata

E ui o lo o faagasolo suesuega a Leoleo i le mafuaaga o le maliu o Tuufuli Savea, lea na maua lona tino maliu i se auvai i  Matuu i le Aso Faraile na te’a nei, peitai na taua e lona aiga le mausali o lo latou talitonuga, e i ai le tagata na ia faia se gaioiga ua mafua ai ona maliu lenei alii.

“E i ai lo matou talitonuga na una’i e le tagata Tuufuli i lalo o le auvai, po o se isi foi gaioiga na faia ua mafua ai ona maliu o ia,” o le molimau lea a le tausoga o Tuufuli o Elise Tunu, e fai ai o ia ma sui o le latou aiga.

“Ou te masalosalo lava e i ai le tagata o lo o i tua o le faalavelave lea ua maliu ai Tuufuli, ou te manatu foi e tatau lava ona matua saili e leoleo faamatalaga e uiga i le mea sa tupu,” o le saunoaga lea a Elise Tunu, o se tasi o tausoga a Tuufuli, peitai o le tele o taimi e valaau ai lava e Tuufuli o ia o ‘Mama’.

O Tuufuli, 41 tausaga i le taimi na malu ai, o se tagata e tausi aiga toe loto alofa i nai ona tei, e pei ona taua e lona tuafafine o Lisa Savea.

“O lo’u tuagane sa avea ma lima taumatau mo a’u ma la’u fanau, soo se mea lava e alu i ai, e tatau lava ona sau ma ni meaai a nai ona tei e pei o pepa chips, e loto alofa ae o se tagata e naunau i lona aiga, o le a ou misia lava o ia,” o ni isi nei o lagona na mafai ona faaleo e le tuafafine o le alii ua maliu o Lisa Savea, e tau faamatala ai le latou mafutaga ma si ona tuagane, lea ua faafuasei ona motusia la latou mafutaga ona o le faalavelave na tulai mai i le vaiasoa na te’a nei.

Na taunuu leoleo ma aumaia i luga le tino maliu o lenei alii, ma auina atu loa i le falemai o le LBJ i Fagaalu mo suesuega.

Na taua e le Taitai o le Vaega o Leoleo Suesue (CID) ia Commander Lavata’i Taase Sagapolutele e faapea, e oo mai lava i le aso ananafi, o lo o faagasolo pea suesuega a lana vaega e faatatau i le mafuaga o le maliu o lenei alii.

“E le mafai ona ou tuuina atu se tali vave i le taimi nei i le mafuaaga o le faalavelave, leaga e le’i maea suesuega a la’u vaega o lo o faia i ai,” o a Lavata’i lea.

VAAIGA MULIMULI

Na taua e le aiga e faapea, o le taeao o le Aso Tofi lea na sosoo ma le aso Faraile na maliu ai Tuufuli, na tuua ai e lenei alii lo latou aiga ae agai atu i le fale talimalo lea o lo o avea ma nofoaga autu o le paga a Lolo/Lemanu, e tapena le fale, ona o ia o se tasi o tagata e lagolagoina le paga a Lolo/Lemanu.

“O le taimi mulimuli lea na ou vaai ai ia Tuufuli, ae na ou tei ina ua vili mai o matou aiga o Tuufuli o lo o taatia lona tino i lalo o le auvai,” o le molimau lea a lona tuafafine.

“O se vaaiga faamomoi loto toe faagalo gata na ou vaai ai i lena aso, sa maligi o’u loimata i lo’u alofa isi o’u tuagane, ao sisi mai e leoleo lona tino mai lalo o le auvai ma avatu i le taavale,” o mafaufauga ia o i lona tuagane.

Na manatua faapitoa Tuufuli i le mafutaga tuu faatasi a le vaega a Lolo/Lemanu lea na faia i le Aso Toona’i na te’a nei i le malae i Fagatogo, e ala i se tula’i fa’aaloalo mo ni nai sekone, faapea ai ma le latou mafutaga mulimuli lea na faia i le aso ananafi i Matuui.

Na amata aoaoga a Tuufuli i le Aoga mo i latou e i ai manaoga faapitoa o le mafaufau i Matafao (Special Educations), ma faaauau i le Aoga Maualuga a Samoa.

Ina ua maea lana i Samoana, na sosoo ai loa ma lana galuega muamua i le kamupani a le Goodwill i Tafuna, ae na muta i le masina o Oketopa na te’a nei, ina ua amata ona pisi o ia i faatosina o le palota.

Na taua e Elisa lona manatua o le isi aso na latou o ai e tala le siaki a Tuufuli sa maua mai i lona totogi o lana galuega, e le gata sa faatau ai pusa moa ma pusa pipi mo le aiga, ae sa faatau ai foi meaai a tamaiti.

“E ui e leai se toalua ma se fanau a Tuufuli, ae ua avea lava nai ona tei i totonu o le aiga o lana fanau, e le taitai misi se meaai a tamaiti pe afai e fo’i mai Tuufuli i le fale i soo se mea e alu i ai,” o le molimau lea a Lisa.

O Tuufuli, o le ulumatua o le fanau e toafa, toatolu tama ma le latou tuafafine e toatasi, o ia lea o Lisa.

Fai mai Lisa, e le gata o le a ia misia lona tuagane, ae o le a misia foi o ia e si ana tama.