Ads by Google Ads by Google

Maofa sui o le SRU tulaga ua i ai lakapi i Amerika Samoa

Na fa’aalia e sui o le Iuni Lakapi a Samoa (SRU) na malaga mai i le fa’atautaia o aoaoga mo Faiaoga ma Laufali i le vaiaso na te’a nei, le  tulaga lelei ma le televave ua i ai le taaloga lakapi i Amerika Samoa nei.

I le tuuina mai ai o le fesoasoani a le afioga Lilomaiava Taufusi Salesa, Stan Toomalatai ma Papalii Avia Tulouna i le tau sailiga o se ‘au fili a le atunuu i le amataga o le vaiaso nei, na o latou taua ai, se’i vagana nai vaega laiti e moomia ona fa’aleleia, ae ua tulaga lelei le lakapi i totonu o le teritori.

O le taamilosaga taitoa 7 a le Pasefika lea o le a talimalo ai le atunuu o Ausetalia i le masina o Aokuso, o lo o faamoemoe i ai lenei tapenaga, ma ua i ai le manatu o le Iuni Lakapi a Amerika Samoa (ASRU), o le tele o le taimi e tuu faatasi ai le au mo lenei faamoemoe, o le lava foi lea o le taimi o tama e faamasani ai le isi i le tasi i le taimi o le taaloga.

E lua au na vaevaeina i ai tama taaalo ua tofia e filifilia mai ai se au fili a le atunuu mo le taamilosaga i Ausetalia.

E lua taaloga sa faatinoina i le aso malolo o Tuugamua na te’a nei i le malae taalo a le Veterans Stadium i Tafuna, a’o maimoa i ai faiaoga fou ma laufali sa auai i le aoaoga sa faia mo le lua aso, faapea ai foi ma sui e toatolu mai le SRU sa malaga faapitoa mai mo le faatinoina o lenei faamoemoe.

Na taua e le afioga ia Lilomaiava i le Samoa News, ua lelei ma manaia le tulaga ua i ai le faatinoina o le taaloga lakapi i le teritori, aemaise lava i taaloga e lua ia sa faia e saili ai se au filifilia a le atunuu.

“Ua i ai atoa le taleni i tama taaalo sei vagana ai lava nai vaega laiti e moomia le toe faaleleia i le taimi e faaaoga ai le polo i totonu o le malae, aemaise ai o le galulue faatasi o le au e toafitu i le taimi o le taaloga, ina ia mafai ai ona maopopo a latou gaioiga e faatino i le taimi o le taaloga, ma matagofie foi i le maimoa a le atunuu ma tagata matamata,” o le saunoaga lea a Lilomaiava.

I le avea ai o le afioga ia Lilomaiava o le ulua’i faiaoga lea a le au ta’ito’a 7 a Samoa na manumalo i le Ipu o le taamilosaga ta’ito’a 7 a le lalolagi i Hong Kong i le 1993, e le gata i lea o ia foi o se totino tuai a le au ta’ito’a 15 a le Manu Samoa i tausaga ua mavae, sa ia taua ai e faapea, o le laasaga lea ua oo i ai le faatinoina e Amerika Samoa o le lakapi, e tutusa lava ma le televave lea ua i ai le faatinoina o le taaloga i le lalolagi i le taimi nei, sei vagana ai lava ni nai faaopoopoga laiti e moomia le faaopoopo i ai.

O le isi vaega taua e pei ona saunoa Lilomaiava ia lava le manava ma malolosi uma tama, e le gata foi i lea, ia tapena le mafaufau o le tama taalo i le taaloga ma aua le popole a ia to’a ma faaaoga lelei lona mafaufau.

Na taua e le susuga Stan Toomalatai, lea foi sa avea ma #2 (hooker) a le Manu Samoa i lana au ta’ito’a 15 i le tele o tausaga ua mavae, e leai se isi mea e o faatasi ma le faamaoni o tama taaalo i a latou koleniga, usitai i le faiaoga ma taumafai e faasatauro mana’o o le loto ae ave le faamuamua i tapenaga o le au.

“E leai lava se eseesega o le lakapi ma le aoga, ete usitai i le faiaoga o le au, soo se faatonuga e tuuina mai e tatau ona faalogo i ai ma usitai, ma ia ave uma iai le fai mea sili i soo se taimi e faatino ai koleniga,” o le molimau lea a Toomalatai.

Ae i le vaavaai a le Peresetene o le Asosi Laufali a Samoa ia Papalii i le tulaga o le taaloga, sa ia taua ai le tele o tulafono  o loo usitaia ma mulimulita’i i ai tama taaalo, sei vagana ai foi nai vaega laiti e manaomia le toe fesoasoani atu i ai o faiaoga ina ia faaleleia atili.

O le vaiaso nei lea ua faamoemoe e tatau ona maea ai le filifiliga o le faiaoga a le au ma ana au Ofisa, faatoa faalauiloa ai loa lea o le au fili a le atunuu i le vaiaso fou.