Na mataina le manumalo a le manu Samoa i le au a Kanata i le aso ananafi i le malae a Wales, i ‘ai e 42-12, ae na atili ai ona mataina lea manumalo i sikoa e 4 na maua e le alii o Robert Lilomaiava, lea na taalo i le tulaga o le uigi #11, ae o ia foi o le sui o le au taitoa 7 a le Manu Samoa.

O le uluai taaloga a le Manu Samoa na faia ananafi, mo lana malaga taamilo i Europa, lea ua faamoemoe e taaalo ai ma Wale i le vaiaso fou, ae faaiu ia Farani i le vaiaso i ona tua atu.

E 22-0 ‘ai a le Manu Samoa ia Kanata i le afa muamua, peitai o le afa mulimuli na vaaia ai le osofa’i malosi mai o le au a Kanata ma maua ai a latou sikoa e lua i le afa mulimuli o le taaloga.

E ui na taua e le au faasalalau o le au a Kanata e le o se au malosi, peitai i le tulaga sa i ai le taaloga lea na faasalalau tuusa’o mai i le taeao ananafi, na manino ai le mataina o le taaalo a le Manu Samoa, amata mai lava i ulua’i minute o le taaloga seia oo ina mae’a le taaloga.

Ina ua fesiligia e le au faasalalau le kapeteni o le au i sona manatu e uiga i le taaloga, na taua ai e le susuga Sakaria Taulafo lona fiafia ina ua manumalo le Manu Samoa.

Fai mai le alii kapeteni, o le au a Kanata o se tasi o au malosi, peitai e sili atu ai le malolosi o au e lua o lo o faatali mai i luma, le au a Wales ma France.

Mai le tatou au na taaalo ma Kanata ananafi, o le to’a 5 o i latou o le ulua’i taimi lea ua taalo ai mo le au a le atunuu.

O i latou ia e aofia ai Teofilo Paulo mai le Aucland Blues lea na taalo i le tulaga o le loka, Foma’i Tiavani Foma’i mai le Hawke Bay na taalo i le tulaga o le flanker, Seitamata Sa lea na taalo i le laina i tua, ma le alii o Robert Lilomaiava na taalo i le tulaga o le uigi, o ia foi lea o le sui o le au taitoa 7 a le Manu Samoa.

O le aso Faraile o le vaiaso fou lea ua faatulaga e taaalo ai le Manu Samoa Wales. O le taimi mulimuli na feiloa’i ai au ia e lua, o le taamilosaga o le Ipu a le Lalolagi i Niu Sila i le tausaga na te’a nei, lea na manumalo ai Wales i ai e 17-10 a le Manu Samoa.

O ‘ai a le Manu Samoa na maua i sikoa e 4 a Robert Lilomaiava; 1 Taiaina Tuifua, ma sala na kiki e James Sooialo i le pou.

O le tatou au na taaalo ma Kanata ananafi e aofia ai i latou nei;

(1-15) Sakaria Taulafo (captain), Wayne Ole Avei, Census Johnston, Fa’atiga Lemalu, Teofilo Paulo, Ofisa Trevaranus, Fomai Tivani Fomai, Taiasina Tuifua, Jeremy Su’a, Tusiata Pisi, Robert Lilomaiava, Setaimata Sa, George Pisi, Paul Perez, James Sooalo.

Reserves: Ropeti Lafo, Viliamu Afatia, James Johnston, Iosefa Tekori, Alafoti Faosiliva, Kahn Fotuali’i, Johnny Leota and Faatoina Autagavaia