Ua manumalo a’ia’i nei le sui mai le a’oga tulaga muamua a Lauli’i i le Tauvaga Sipela a le Teritori, ma ua sauni fo’i i la’ua ma lona faia’oga, e malaga atu ina ia taumafai mo se tulaga o Amerika Samoa i le tauvaga a sui uma mai Teritori ma Setete o Amerika.

Ua fa’amauina lenei manumalo o Lauli’i i le tala fa’asolopito o le Matagaluega o A’oga, ua fa’atolu ai lea ona manumalo lea a’oga, ae tasi lava fo’i le faia’oga o lo ’o ia tapenaina maia le vaega lea e to’atolu mo so latou ‘ai. O le isi itu, o le faia’oga lava e tasi o lo ’o a’oa’oina i latou o lo ua manumalo nei mo Lauli’i, ma le isi, o le tauvaga sipela lenei ua sili ona tele ona ta’amilosaga pe umi fo’i o tau sa'ilia se manumalo.

E ui ina ua fiafia fa’atasi lea sui ma lana a’oga, fa’atasi ai ma lana faia’oga, ae maise o ona matua ma lona fo’i aiga, ae le’i faigofie le ala i lenei manumalo. Sa maimoaina uma e le atunu’u i le Alaata 2 o le televise KVZK le taumafaiga ma le ivi fo’i o lea tauvaga, ma sa 'iloga ai, e 22 taimi na tauva ai na’o le tulaga lua ma le ua ‘avea le tauvaga i lenei tausaga, le tama’ita’i o Rita Jennings, o ia o se teineitiiti o lo ’o vasega 7 i lenei tausaga a’oga.

O le tulaga lua, o ia lea sa ivi le la’ua tauvaga mo le tulaga muamua ma Rita o le talavou lea o Ve’a Seumanutafa mai le A’oga a Matatula. O le tulaga tolu sa mauaina lea e Tulili Howard mai  Manumalo Baptist School ma le tulaga fa sa mauaina lea e Fa’asi’u Fa’alata mai Uifa’atali Peter Coleman School i Pago Pago.

Ua matauina fo’i i le ta’amilosaga a le Tauvaga Sipela i lenei tausaga e na’o le to’alima lava ali’i ae o le to’atele o tama’ita’i e to’a 22 i latou. O se tausaga 'ese fo’i lenei i le malosi mai o le tauva a le sui mai Manu’a na pa’au mamao mai, le susuga Walter Fa’apouli. Ua 'iloga mai i le fa’ai’uga o lenei tauvaga i lenei fo’i tausaga, e le o toe fa’atemeteme lava le tapenaga a a’oga ta’itasi i lenei tauvaga.

Ua leai fo’i ni foliga o tatou uso mai Korea, filipaina ma Saina i lenei tausaga, ua matua mata Samoa moni fa’asoloatoa le tauvaga. E le o mea taua tele, ae lagona ai le fiafia, o lo ’o ua toe va’aia le mata’alia mai o alo o Samoa i le tauvaga i lenei tausaga.

O le fa’amalo ma le fa’afetai ua tu’uina aloa’ia atu i kamupani uma sa va’ava’alua ma la tatou Nusipepa nei i le fa’atupega ma le fa’atautaiga o lenei tauvaga sipela 2012.

O ni isi kamupani e to’atele sa latou saunia fa’ailoga i lona matagofie na va’aia ai mo le fanau tauva, ae 'ese ai le matagofie o le fa’amoemoe o le a fou tu’ua ai i tatou mo le auva’a mamao atu e sa'ili so tatou ‘ai. Ia manuia lau taumafaiga Rita Jennings, o ou mama na!