Na manumalo le au basketball a Tama’ita’i i lana ulua’i ta’aloga i le aso Sa na te’a nei (taimi Papua Niu Kini), ina ua latou fa’ato’ilalo le ‘au malosi mai Solomona i ‘ai e 80-44.

Na matua fa’ateia le to’atele o le au maimoa e aofia ai le afioga i le Lutena Kovana ia Lemanu Peleti Mauga ma lona faletua, faapea ai le Minisita o Ta’aloga a Amerika Samoa i Ta’aloga o le Pasefika ia Jonathan Fanene i le malosi o le osofa’i a Amerika Samoa i le ulua’i taimi o le ta’aloga, seia oo lava i lona fa’aiuga o loo tumau pea le malosi o le osofa’i a le ‘au a tama’ita’i.

“O le tulaga tonu lava lena e tatau ona i ai le tatou ‘au i isi ana ta’aloga o loo mulimuli mai, e le tatau ona nofonofo ma fa’atalitali se’i osofa’i muamua mai le isi ‘au, leai, o le auala tonu lava lea (game plan) sa fa’atulaga atu i le ‘au i le taimi o le latou koleniga, afai loa e amata le ta’aloga, ia amata malosi ma ia fa’ai’u malosi,” o le saunoaga lea a le susuga a Haila Ripley, o le faiaoga lea a le ‘au a tama’ita’i.

Saunoa atili le susuga Ripley e faapea, e le taua ia te ia le sili o ‘ai a le isi ‘au i le amataga o le ta’aloga, ae taua le mulimuli uma o le ‘au i le tulaga sa fa’ataoto atu mo le ta’aloga.

“Afai e le usitaia e le ‘au le ata o le ta’aloga ma le auala e tatau ona ta’aalo ai, e le umi lava ona fa’agasolo le ta’aloga ae vaaia loa le fa’aletonu o le latou ta’aalo, peita’i o le mea sa tula’i mai i le ulua’i ta’aloga a Tama’ita’i, e le gata sa lelei ae na matua malosi le latou osofa’i i le amataga o le ta’aloga seia oo lava i le fa’aiuga,” o le saunoaga lea a Ripley.

O le tama’ita’i o Rheina Ale ma Destiny King na ‘ai silia i le ta’aloga, ina ua la maua ‘ai e ta’i 18, sosoo ai Mercedes Tipesa Moorer e 14 ana ‘ai sa maua, ma le tama’ita’i o Kristen Ale e 10 ana ‘ai sa maua.

O le tama’ita’i o King na taalo i le taaloga i le umi e 29.37 minute, ta’i 50% i le ‘feild goal’ ma le ‘3 points’, ae 75% i le ‘Free Throw’.

Na taua e Ripley e fa’apea, o se tasi o auala e mafai ai ona lelei le faatinoina o le ta’aloga, o le taumafai lea o le ‘au e fa’aitiitia a latou mea sese e fa’atino i le taimi o le ta’aloga, atoa ai ma le taumafai ina ia malosi le osofa’i e fa’atupu ai mea sese a le ‘au o loo latou ta’aalo.

I faamaumauga o le ta’aloga sa taua ai e fa’apea, e 27 mea sese a Amerika Samoa i le taimi atoa o le ta’aloga, fa’atasi ai ma polo e 16 sa latou gaoia mai ia Solomona, lea na mafua ai ona latou maua ai e 22 mai osofaiga faananati ia i kuata ta’itasi o le ta’aloga.

Na taua e le tama’ita’i o Mary Hotia Vaaimamao i le Samoa News, o ia fo’i lea o le kapeteni o le ‘au, sa manaia lava le galulue fa’atasi o le ‘au i le ta’aloga atoa, e leai fo’i se isi na fa’aletonu lana ta’alo.

“Sa matou mulimuli i le ata atoa o le ta’aloga sa faatonu mai ai matou e le faiaoga, sa lelei le matou fesootaiga, lava le malosi, sa matou fiafia fo’i e ta’aalo fa’atasi mo le taimi muamua,” o le saunoaga lea a Vaaimamao i le Samoa News.

Ina ua fesiligia e le Samoa News le susuga a Ripley i le auala sa ia fa’asoasoaina ai lana ‘au i totonu o le ta’aloga, lea na mafua ai ona sosolo lelei le fa’atamo’eina e tama’ita’i ta’itasi o le ta’aloga seia oo lava i le fa’aiuga, na taua ai e le ali’i faiaoga e faapea, “ia lelei lou mafaufau i le fa’asoasoaina o teine ta’aalo i le taimi sa’o, e sese loa le fa’asoasoaina o le ‘au, ona tula’i mai ai loa lea o le fa’aletonu, o le mea fo’i lena sa ou faia, sa ou vaavaai i le faagasoloina e tama’ita’i o le polo, o iina na  faavae mai ai lo’u fa’asoasoaina o i latou i totonu, seia oo lava i le taimi na sosolo lelei ai le ta’aloga ma i’u ina manuia ai,” o le saunoaga lea a Ripley.

Na taua e le afioga i le Minisita o Ta’aloga a Amerika Samoa i Ta’aloga a le Pasefika, susuga Jonathan Fanene le fa’afiafiaina o ia ina ua manumalo le ‘au tama’ita’i, e ala i lo latou galulue fa’atasi i le taimi atoa o le ta’aloga.

I le avea ai o Fanene o se tasi o tagata ua iloga i le ta’aloga o le Lakapi Faa Amerika, sa ia taua ai i le Samoa News e faapea, “soo se tagata taaalo lava, ia lelei lona mafaufau i le fa’atinoina o le ta’aloga, atoa ai ma le malosi lelei o le tino.”

O Amerika Samoa o loo i ai i le Pool B ma Fiti, Solomona ma Niu Kaletonia, ma ua fa’amoemoe o le aso a taeao e faia ai le ta’aloga lona lua a Amerika Samoa ma Fiti, ae fa’ai’u ai loa i le aso Lua i le la ta’aloga ma Niu Kaletonia.

O le taimi nei, o lo o tulaga lelei pea tapenaga a ali’i faiaoga ma le ‘au atoa a tama’ita’i, ma ua fa’amoeoe e manuia la latou taumafaiga mo le sailiina o pine taua e tolu o le ta’amilosaga i le fa’aiuga o le vaiaso nei.