Ads by Google Ads by Google

Manumalo au Basketball tama’ita’i i le pine siliva

Ua manumalo le ‘au basketall a Amerika Samoa i le vaega o tama’ita’i i le pine siliva, ina ua le manuia taumafaiga i le ta’aloga o le pine auro i le po o le aso To’ona’i na te’a nei, ina ua faiaina i le ‘au malosi mai Fiti i ‘ai e 75-61 i se ta’aloga mataina ma le finau.

 

O le manumalo ai o Amerika Samoa i le pine siliva, ua tula’i mai ai loa le aofa’i o ana pine ua maua i Papua Niu Kini i le 9, e aofia ai le pine auro e tasi, 3 pine siliva, ma pine apamemea e 6.

 

O le fa’alua ai lea ona faiaina Amerika Samoa i le ‘au malosi lenei mai Fiti, o le faiaina muamua i taimi o pool games, ma le faiaina lona lua i le ta’aloga e saili ai le pine auro ma le pine siliva.

 

O le manumalo ai o Fiti ia Amerika Samoa, ua fa’ai’uina ai e Fiti le ta’amilosaga o Ta’aloga a le Pasefika i le vaega o tama’ita’i, e aunoa ma se faiaina sa i ai, ma o se matati’a na taua e le kapeteni o le ‘au a Fiti i le Samoa News, o se taumafaiga ua alaga tatau na fiafia i ai le ‘au.

 

Na fa’ateia le silia i le to’a 500 o le au maimoa sa i ai i le totonu o le Power Dome Arena i le osofa’i malosi o le ‘au a Amerika Samoa i le amataga o le ta’aloga, e ala i le lelei o le latou puipui faapea ai le lelei o le latou togi aga’i i le mama, ma maua ai a latou ulua’i a’i o le ta’aloga e 23-18 a Fiti.

 

Na matua fiu le au a Fiti e faaleaga gaioiga a le au a Amerika Samoa i le ulua’i kuata o le ta’aloga, ae sa atili ai ona manaia osofaiga ma gaioiaga a le tatou ‘au sa i ai, ma fa’ai’uina ai loa le afa muamua o le ta’aloga i le tulaga lelei ma malosi sa i ai le tatu ‘au.

 

O le ogatotonu o le kuata lona lua o le ta’aloga na amata ai loa ona vaaia le fa’aletonu mai o le puipui ma le osofa’i a le ‘au a Amerika Samoa, e oo lava fo’i i le togiina o le polo i le mama, ae o le taimi fo’i lea na vaaia ai le suiga i le ‘au a Fiti, e le gata ua malosi le latou osofa’i ae ua amata fo’i ona lelei le latou togi ta’i tolu i le mama.

 

O le tama’ita’i o Destiny King ma Rheina Ale na fesoasoani malosi i le latou ‘au i le afa muamua o le ta’aloga, e le gata sa matua malosi le la puipui ma le osofa’i, ae sa maualuga fo’i la ‘ai sa maua i kuata muamua e lua o le ta’aloga, ma vaaia ai le finau malosi mai pea o Amerika Samoa i le afa muamua.

 

I le kuata tolu ma le fa ina ua vaaia e le tapuaiga a Amerika Samoa le tulaga o le ta’aloga, sa atili ai ona alalaga atu le tapuaiga i teine o le ‘au ina ia fa’amalosi o loo lava le taimi, peita’i, sa lei manatu le ‘au a Fiti e toe tuu se isi avanoa ia Amerika Samoa latou te toe puleaina ai le ta’aloga, ma aga’i atu ai loa ‘ai o le ta’aloga i lona fa’aiuga, ma manumalo ai Fiti ia Amerika Samoa.

 

Pe tusa toe 45.6sekone o loo totoe i luga o le uati, ae fa’alogoina loa le usu mai e le tapuaiga a Amerika Samoa o le pese ua masani ai Samoa pe afai ua fa’amalieina le silasila i se taumafaiga vaivai, “Ua fa’afetai, ua fa’afetai, ua malie mata e vaai,” ae o le taimi fo’i lea ua le toe lagona se pao i totonu o le fale taaalo i le pisapisao o le tapuaiga a Fiti, ina ua fa’amanuiaina le latou ‘au i le pine auro.

 

O le afioga i le ali’i Lutena Kovana ia Lemanu Peleti Mauga na fai ma sui o le au ta’aalo e fa’afetaia le ‘au a Amerika Samoa e tusa ai o le latou taumafaiga i lenei tausaga.

 

“E le faigofie la outou pito laau, o se ta’aloga e finau ma faigata sa outou alo atu i ai, ae fa’afetai ua outou manumalo i le pine siliva,” o le saunoaga lea a Lemanu.

 

“O le itu taua, sa ave uma i ai la outou malosi ma le mea sili e fa’atino ai le ta’aloga, ua fa’amalieina fo’i le tapuaiga a le atunu’u i lenei afiafi i la outou ta’aloga,” o le isi lea saunoaga a Lemanu.

 

Na taua e le tama’ita’i o King ma loimata i le Samoa News ina ua fesiligia o ia, o le tele o a latou mea sese i le ta’aloga na mafua ai ona tula’i mai le fa’aletonu i le latou ‘au.

 

“Sa matou finau malosi mai lava i le amataga o le ta’aloga, sa lelei a matou gaioiga sa faia, peita’i ua sili atu le malosi ma le lelei o le ‘au a Fiti nai lo matou,” o le saunoaga lea a King.

 

“Ou te fa’amalo i le ‘au a Fiti mo le ta’aloga mataina i lenei aso, e ui sa matou taumafai atu, ae le’i fa’avaivai ai fo’i Fiti i le latou fo’i finau malosi mai, lea ua latou manumalo ai i le pine auro,” o le isi lea saunoaga a King.

 

“Ou te iloa, o le tele o mea sese sa matou faia i le ta’aloga ua mafua ai ona misi lo matou avanoa i le pine auro i lenei tausaga, ae o le a toe taumafai mai i se isi taimi o i luma,” o le saunoaga fa’aiu lea a King.

 

Ae na taua e le tama’ita’i kapeteni a Fiti ia Valeria Nainima i le Samoa News e fa’apea, na fa’ateia le latou ‘au ina ua osofa’i malosi atu Amerika Samoa i le amataga o le ta’aloga, ma amata ai loa ona fa’aletonu le latou puipui mai faapea ai ma le osofa’i.

 

“Sa toe sui latiti le matou gaioiga ina ua matou vaaia ua amata ona fa’aletonu mai le taaalo a Amerika Samoa, ma mafai ai loa ona matou taofiofia le ta’aloga seia oo lava i lona fa’aiuga,” o le saunoaga lea a Nainima, ma ia taua ai le malosi tele o le ‘au a Amerika Samoa i a latou ta’aloga uma e lua sa latou ta’aalo ai i Papua Niu Kini.

 

O le aso Lulu o le vaiaso nei lea ua fa’amoemoe e taunu’u atu ai i le atunu’u ni isi o sui o le au Basketball a le atunu’u, ae o isi sui e aofia ai tama’ita’i o loo aoaoina i fafo mo avanoa sikolasipi, o le a malaga sa’o lava i latou i Hawaii ma fa’aauau atu ai i Amerika i nofoaga o loo aumau ai.