Ads by Google Ads by Google

Manaomia Fitafita Tuai ina ia tutu ma galulue faatasi

O le tatala aloaia ai o le Ma’a Faamanatu mo Fitafita Tuai uma i Amerika Samoa na ofo atu lo latou ola e tautua ai i vaega au a le malo tele o Amerika, o le ata vaaia lea o le toe sosoo faatasi ma le galulue faatasi o le Asosi a Fitafita Tuai a Amerika Samoa, ua tele tausaga e le o galulue faatasi, e pei ona taua e ni isi o sui o Fitafita Tuai i le Samoa News.

Na taua e ni isi o fitafita tuai na mafai ona fesiligia e le Samoa News, na pau le agaga maualuga o lo o i ai i fitafita tuai, ia avea le tatalaina o le Maa faamanatu ma auala e lagona ai fitafita tuai uma lo latou tulaga, ma o mai e fai fai mea faatasi.

O ia mafaufauga na mafai ona mapuna a’e i finagalo o ni isi o fitafita tuai sa auai i le tatalaina o le latou Maa Faamanatu i Tafuna i le aso ananafi, ina ua molimauina le toatele naua o isi fitafita tuai e lei faatasi atu e molimau lea galuega taua.

“E le o fitafita tuai uma nei a Amerika Samoa, ou te masalo o le kuata o fitafita tuai a le atunuu lea o lo o faatasi i lenei aso, ae o le isi 3 kuata e le o faatasi mai,” o le saunoaga lea a se tasi o alii fitafita tuai sa tautua i le vaega a le Marine a le malo tele o Amerika.

Na taua e lea sui e faapea, o le feeseeseaiga i le va o fitafita tuai ma le kovana na afua mai i le taimi na faatulai ese ai e le alii kovana fitafita tuai mai le fanua sa i ai i Tafuna, ina ua finagalo le malo e foai le fanua lea ua fausia ai le Maa Faamanatu ma le Ofisa fou mo le Asosi o Fitafita tuai.

“O iina na afua mai ai le feeseeseaiga lea o lo o tulai e oo mai lava i le taimi nei, ma ua foliga mai ai ua ese le isi vaega o fitafita tuai i le la itu, ese matou i lenei itu, ae tasi lava le tautoga sa matou tauto ma galulue ai, o le puipuiina lea o le saogalemu o tatou tagata,” o mafaufauga ia a le fitafita tuai.

Ae i le tatalaina ai o le Maa Faamanatu mo Fitafita Tuai, na taua ai e ni isi o sui o Fitafita Tuai e faapea, “O le avanoa lelei lenei e o mai faatasi uma ai lava fitafita tuai e tutu faatasi ma galulue mo le manuia o le atunuu.”

E lei lilo i lalo le vevesi na tulai mai i le va o le kovana sili ma ni isi o vaega o fitafita tuai, ia sa faamautu i le Ofisa o le V.A i Tafuna, ina ua tuuina atu e le afioga i le matua ia Togiola Tulafono sana tusi e faailoa atu ai lana faaiuga ua faia, o le a faatulai ese i latou ma le fanua ina ua maea le lisi o le fanua, ma le faamoemoe ua maea ona saunia e le malo le isi fanua mo i latou, peitai na avea lea tusi mai le alii kovana na saili ai loa e le vaega lea o fitafita tuai se fautuaga faaloia, ma i’u ina tuu atu ai le mataupu i luma o le Faamasinoga Maualuga.

O le faaiuga o lea finauga na tuuina atu e le Faamasinoga le manumalo i le itu a le malo, ina ua faamaonia ua maea taimi o le lisi sa sainia i le va o le malo ma le vaega o Fitafita tuai.

Talu ona amata mai le galueina ma le faamamaina o le nofoaga fou ua i ai nei fitafita, sa unaia pea e kovana Togiola fitafita tuai uma ina ia faagalo ni fatia ua sola, ae tulai mai e lagolago le faamoemoe ua i ai ma tautua le atunuu, ina ia avea ai i latou o ni faiaoga e faaaoao i ai tupulaga.

O le agaga foi lea o le afioga i le alii faatonusili ia Samana Veavea ina ua saunoa i le tatala aloaiaina o le Maa Faamanatu a Fitafita, ua oo i le taimi ua tatau ai ona tulai mai fitafita tuai uma a Amerika Samoa, e faalauiloa la latou tautua mo le atunuu.

Saunoa Samana, o le ata o le Maa lea ua maea ona fausia, o lo o faailoa atu ai le mautu ma le malosi o le maualuga e mafai ona oo i ai le tautua a Fitafita tuai, pe afai ae galulue faatasi.

Na faailoa i le taimi o le tatala aloaiaina o le Maa faamanatu ni isi o soifua na maimau ao tautua ai i le taua, e pei ona i ai se laulau sa i ai le ula ma se lipine lanu samasala, ao luma o lea laulau o lo o i ai se pea seevae, ma le isi itu o le laulau o lo o i ai se nofoa.

O ia faailoga uma e toe faamanatu mai ai i e o lo o soifua, tusa lava pe ua galo atu i le vaai soifua o i latou sa tautua mo le malo, o i latou na maliliu i taua i luga o le toafa ma le sami, ia aua lava nei faagaloina i latou, ae ia manatua pea e le galo.

“O la matou tautua lena mo Amerika Samoa, e le mafai ona galo, afai foi e galo i lagona ma manatu o tagata, a ia teu fatu i loto o tupulaga fai a’e, le taua ma le aoga o le taulaga sa ofo atu e fitafita mo tagata uma, aisea la e eseese ai manatu ae le tulai mai e tutu faatasi,” o le saunoaga lea a se tasi o fitafita tuai sa auai i le sauniga e tatala aloaia ai le Maa Faamanatu.