Ads by Google Ads by Google

Mana'o Lolo faatu ofisa o le malo i Manu’a

Na talia ma le agaga fiafia e le itumalo o le Manu’atele le toai taunuu o le afioga I le kovana sili mo lana uluai Malaga atoa ai ma sui o lana kapeneta.

 

I lea feiloaiga, na faailoa ai e taitai o le itumalo o Manua I le alii kovana e faapea, o le tele o nofoaiga ua mavae atu, sa faagalo ai lava le faia o ni atina’e lelei mo Manu’a, ae e i ai lo latou talitonuga ua avea o ia ma faaolataga mo le itumalo o le Manu’atele, ina ua filifilia o ia e avea ma kovana o le atunuu.

 

Sa malaga faatasi le alii kovana, o le  taitai o  lona ofisa ia Fiu Saelua, atoa ai ma alii ma tamaitai faatonusili faapea sui o matagaluega, lea na gafa ma le faatinoina o ni isi o tautua sa moomia e le itumalo o Manu’a.

 

O le Luanuu i Ofu ma Olosega/Sili na muamua i ai le asiasiga a le alii kovana sili ma sui o lana kapeneta, ma maua ai le avanoa e asia Aoga ma Ofisa eseese a le malo i Manu’a, e pei o le Ofisa o Tautua Lautele (Social Service) lea o lo o aofia faatasi ai ma isi tautua e pei o le WIC, Food Stamp ma le Vaega Tineimu.

 

Sa maua foi le avanoa e asia ai le Aoga Tulaga Muamua i Ofu ona faasolo atu ai lea iI isi ofisa e pei o le Matagaluega o Galuega ma le pulega o Uafu ma Taulaga i luga o le uafu i Ofu.

 

O le maea ai o le asiasiga i le Luanuu na faia ai loa se faaaloaloga a le afioga i le Kovana o le Itumalo o Manu’a ia Misaalefua J. Hudson ma le itumalo, e ala i se taumafataga mo le faigamalaga, ao lei toe tuuvaa atu mo le faletolu i Tau, Faleasao ma Fitiuta.

 

Na taua e le afioga ia Misaalefua e faapea, e tele tausaga ua mavae sa ia talosagaina ai le faigamalo ua mavae atu mo ni atina’e lelei mo Manu’a, peitai o ni isi o taimi e feita ai ma latou faia tala ia te ia, ua pei ai o ia “o se ta’ifau i o latou mafaufau, ona o le le fiafia i lo’u pisa soo atu e faatatau i  ni auala e fa aleleia ai Manu’a, ae tatau ona latou silafia, o Manu’a le isi pito o le faigamalo a Amerika Samoa.”

 

I le feiloaiga a le au Malaga ma sui o le Luanuu, na faailoa ai e le alii kovana e faapea,ua  i ai lana fuafuaga i le maea ai o lana asiasiga muamua i Ofu ma Olosega, o le a saili auala e fausia ai Ofisa uma lava o lo o i ai i Tutuila I totonu o le Luanuu, ona o le faanaunauga e tasi, ia faa f aigofie ai ona faaleleia le atina’eina o le tamaoaiga o le Luanuu.

 

“E le faapea e na o le fau o Ofisa ona  taatitia ai lea iinei e leai ni galuega e fai ai poo ni tagata faigaluega e galulue ai, e tatau ona matua tino outou faatonusili e saili auala e fausia ai a outou ofisa iinei,” o le saunoaga lea a le alii kovana i faatonusili, ao faafofoga taitai o Ofu ma Olosega/Sili.

 

O le Ofisa o lo o i ai le malae vaalele i Ofu, ua finagalo le alii kovana e tuu faatasi iina ma le Ofisa o Leoleo, ona e le o i ai se Ofisa o Leoleo i Ofu ma Olosega/Sili, sei vagana ai le alii leoleo e toatasi o lo o galue ai faatasi ai ma lana taavale fou.

 

Ina ua fesiligia e le Samoa News le alii leoleo pe i ai sona ofisa, na ata le alii leoleo ma fai mai, “O a’u e fai mai lava a’u galuega i le fale.”

 

O le agaga o le alii kovana e tatau ona i ai le ofisa o leoleo I le malae vaalele mo le taimi o le puipuiga o le saogalemu lautele o tagata feafioa’i.

 

O le nofoaga o lo o I ai le Ofisa o Galuega a le malo I luga o le uafu I Ofu, ua fuafua le alii kovana e tuu faatasi I ai ma se Ofisa mo Tagata Matutua (TAOA), ina ia mafai ai ona faaleleia lea foi auaunaga I totonu o Manu’a.

 

Na faaiu le feiloaiga i le Luanuu I le talosagaina e Misaalefua ma sui o le itumalo le alii kovana ma lana kapeneta, ina ia alofagia ni atina’e lelei mo Manua.

 

“O lea o le a matou faatalitali atu e tusa ai o la outou folafolaga lea ua fai mai nei, afai e tafa lo outou finagalo ae manatua Manu’a I se aso, viia le Atua,” o le saunoaga lea a Misaalefua.

 

Ae na saunoa le aliii kovana e faapea, e le mafai ona atina’e Manu’a pe afai e fiu foi le malo e taumafai mai ae le maua le agaga o le galulue faatasi.

 

“Afai tatou te galulue faatasi, ona maua ai lea e Manu’a ma Tutuila o le manuia mo le agai I luma o aiga, malo faapea le atunuu,” o le saunoaga lea a le alii kovana.

 

O le aso ananafi na faamoemoe e asia ai le faletolu I Tau, Faleasao ma Fitiuta.