Ads by Google Ads by Google

Mananao fai faatoaga saili maketi i fafo mo a latou faatoaga

O le sailia o ni maketi i fafo e la’u i ai fua o faaeleeleaga a le mamalu o le aufai faatoaga a le atunuu, o se tasi lea o moemitiga ua faaalia e ni isi o sui o lea Asosi o lo o taula’i i ai la latou vaai mo le tausaga fou.

O lea manatu na mafai ona a’e ina ua maitauina e ni isi o le aufai faatoaga a le atunuu le saoasaoa o le sau i totonu o faatoaga mai fafo ia o lo o faatau i faleoloa.

Na taua e le tofa Avei Sopoaga, o se tama fai faatoaga mai Pava’ia’i e faapea, o le ulufale mai o faatoaga e pei o talo ma fualaau aina mai atunuu i fafo i totonu o le teritori, ua sui tulaga ai e faatoaga nei vaega sa tatau ona la’u atu i ai fua o faaeleeleaga a le aufai faatoaga a le atunuu.

“O tupe ia sa tatau ona maua e le aufai faatoaga a le atunuu, ua maua e i latou ia o lo o la’u maia faatoaga mai fafo, o le fesili la ua tula’i mai, o fea la o le a sulu i ai matou e saili ai ni a matou tupe, na pau le auala e mafai ona maua ai ni a matou tupe, o le saili o ni maketi i fafo e la’u i ai a matou talo ma isi fua o faatoaga o lo o matou toto, aua e le lava foi le polokalame a le School Lunch e la’u uma i ai a matou faatoaga,” o le saunoaga lea a Sopoaga.

Saunoa Sopoaga, e faigata ona faatusatusa tulaga o faatoaga i Samoa ma Amerika Samoa nei, leaga o Samoa, tusa lava pe toatele le aufai faatoaga o lo o i ai, ae toatele foi le au faatau, peitai o iinei, e toatele le aufai faatoaga ae tau leai ni tagata faatau.

“O isi lava taimi e fiu lava e nofo i le maketi e le sikuea le tupe maua ma le taimi sa faaalu e fai ai le faatoaga poo fualaau aina foi, pau le auala e mafai ai ona sikuea le fai faatoaga, o le saili o se maketi i fafo e la’u i ai ana faatoaga,” o le Sopoaga lea.

Ae na taua e le tina o Makerita Siliga o Faleniu, ua oo i le taimi ua tatau ai ona siitia tulaga o faatoaga i le atunuu, ona ua maitauina le televave o le sau i totonu o le Pasefika o faatoaga mai le atu Asia.

“O lea lava ua tatou vaaia i le taimi nei i le tatou atunuu, le toatele o tagata mai Asia ua fai a latou toga laau aina ma faatau atu i faleoloa ua oo lava foi i le School Lunch, lona uiga a le mataalia ai matou nei le aufai faatoaga, e i ai le taimi e le toe maua ai e i matou ni tupe ae o le a ave uma e le tagata mai Asia,” o Siliga lea.

E talitonu ni isi o le aufai faatoaga, afai ae maua ni maketi i fafo e la’u i ai fua o faaeleeleaga a le atunuu, o le isi lea alagatupe maua o le a fesoasoani i le malo, e pei ona foi molimauina le faamanuiaina ai o le malo o Samoa i lana talo ma lana nonu o lo o la’u i maketi i fafo.

O lo o tulimata’i le vaai a ni isi o le aufai faatoaga i le ‘Taro Fair’ lea o lo o faamoemoe e faia i le tausaga fou, o le a toatele ai le aufai faatoaga latou te totogina le taro, ma vaavaai ai loa i le tau sailia o se maketi e la’u i ai la taro.

Saunoa le Faatonusili o le Matagaluega o Faatoaga, tofa Lealao Purcell e faapea, e mafai ona saili maketi i fafo mo le aufai faatoaga, pe afai lea e lava ma totoe fau o faaeleeleaga e lau i fafo, ma ausia foi aiaiga o tulafono o lo o mana’omia mai e le Ofisa o Faatoaga a le malo tele (USDA) mo fua o faatoaga e faaulufale atu i fafo.

O le fautuaga a le alii faatonu mo le aufai faatoaga, ia toaaga pea e toto faatoaga ma laau aina, ma faatau atu i le maketi poo le la’u atu foi i le School Lunch.