Ads by Google Ads by Google

Manana’o VA e toe fo’i i le latou nofoaga tuai i Tafuna

Ua tasi nei le finagalo o le alii Peresetene o le Asosi o Fitafita Tuai (VA) ma ni isi o ona totino, e latou te toe fo’i atu i le latou nofoaga tuai sa i ai i Tafuna, lea na tuli faamalosi ese ai i latou i le taimi o le nofoaiga a kovana Togiola Tulafono, ina ua manatu Togiola ua maea le lisi i le va o le VA ma le malo.

Na taua e le Peresetene o le VA le afioga Tauiliili Lauifi e faapea, “E ui matou te le o toe nofoia lea nofoaga, ae le uma ai le tosina i ai o matou loto, leaga o le nofoaga sa pologa tama ma tina o le atunuu na avea ma fitafita tuai e asa mai ma atina’e, lea foi la ua matou tulai mai, e tatau ona matou tausia ma faamamalu i ai,” o le saunoaga lea a Tauiliili i se talanoaga ma le Samoa News i luga o le telefoni.

O le itula e 9:00 i le taeao nei lea ua faamoemoe e feiloai ai sui o le VA ma le afioga i le kovana sili ia Lolo Matalasi Moliga, mo le talanoaina o le latou savali e pei ona tasi i ai le finagalo o le VA.

Saunoa Tauiliili e faapea, e ui sa o latou lagona le le sa’o o le faaiuga na faia e le kovana ua mavae atu e ala i le faatula’i ese o i latou mai le latou nofoaga tuai, ae sa ave pea i ai lo latou faaaloalo, leaga o ia o le kovana na filifilia e le atunuu, aemaise ai foi, sa aoaoina i latou ao tautua i vaega au a le malo tele, ia iloa faaaloalo ma åva i ta’ita’i, tusa lava poo a faaletonu o le ta’ita’i.

Mai le tele o tausaga o nofoia e sui o le VA le latou nofoaga tuai i Tafuna ma fiafia ai, o le ogatotonu o le tausaga na te’a nei na faamuta lea fiafiaga, ina ua tuuina atu i ai se tusi a Togiola ma fautuaina i latou ina ia tulai ese ma le fale ona ua maea le lisi.

E lei tulai gugu le VA, ae na o latou tuuina atu le mataupu i le faamasinoga, ona e talitonu i latou, o le lisi e 30 tausaga i le va o le VA ma le malo, na amata mai i le 1987 ae maea i le 2017.

Na taua e Tauiliili e faapea, e le nofonofo le VA i lo latou finauina o le mataupu i le kovana fou ua i ai nei, le tofa Lolo Matalasi Moliga, “O le matou faanaunauga tupito lea o lo o i ai, matou te mananao e toe faafou le fale ae tatala atu i soo se Ekalesia poo Faalapotopotoga o lo o manaomia ni nofoaga tetele faapea e faatino ai a latou fuafuaga,” o le saunoaga lea a Tauiliili.

O le faafitauli o le fale fou a le VA lea na tatala i le masina na te’a nei e pei ona saunoa Tauiliili, e le mafai ona faia ai ni sailigatupe, leaga ua maea ona vaevae le fale i Ofisa o vaega taitasi e pei o le Marines, Air Force, Army ma isi, peitai i lo latou talitonuga, e le tatau ona toe vaevaeina faapea vaega o fitafita tuai, aua e le o toe tautua latou i vaega au i le taimi nei, ae ua tasi lava le igoa lea ua faaigoa uma ai latou, o latou o fitafita tuai.

Ina ua tatala le maota fou o le VA i le masina na te’a nei, na taua ai e Togiola e faapea, o lona faanaunauga, ia avea le tatalaina o le fale fou lea ma itu e tasi ai le Asosi o Fitafita tuai, ma latou tutu faatasi ai e faatino la latou fesoasoani mo tupulaga lalovaoa o le atunuu.

Ae na taua e Tauiliili e faapea, e le tatau ona faia e le malo se fale fou mo le VA, e le sa’o lea tulaga, e tatau ona fausia e le VA sona lava fale, ma tuu atu sana tautua e fesoasoani ai i le malo, ma o le mea lena ua latou sauni e fai.

Na taua e se tasi o totino o le VA o lo o lagolagoina le fale fou lea na faatoa tatala i le tausaga na tea nei, e faapea, afai e tumau pea le fevaevaea’i o Fitafita Tuai a le atunuu, e atagia mai ai e le o malamalama i le tautoga na faatauto ai latou ina ua tautua i vaega au a le malo tele.