Ads by Google Ads by Google

Manana’o Senate e suesue atili aitalafu a le malo

O le le nofonofo lelei o finagalo o le toatele o Senatoa i le tulaga ua aliali mai i aitalafu a le malo, na faaalia ai loa ni isi o finagalo ua tatau ona faamae’a lelei suesuega ae aumai i luma o le fono se tulaga tonu ua oo i ai aitalafu a le malo.

Na taua e le afioga i le alii Senatoa ia Soliai Tuipine Fuimaono e faapea, afai e lei maea ona suesue e le nofoaiga fou ua i ai nei tulaga o aitalafu a le malo talu mai si taimi puupuu lea na o latou tauaveina ai le taitaiina o le malo, e tatau la ona fai ia maea sailiiliga, ae aumai i luma o le fono le tulaga sa’o o aitalafu a le malo se’i silasila i ai le Fono.

Na taua e Soliai e faapea, afai e puupuu le taimi na suesue ai le aitalafu e $44 miliona ua i ai nei, e i ai lona talitonuga e sili atu le aitalafu a le malo e tatau ona i ai.

I le saunoaga a le afioga i le alii kovana ia Lolo Matalasi Moliga i le aso na tatala aloaia ai le tauaofiaga a le Fono Faitulafono, sa ia taua ai e faapea, o fuainumera ua ia tuuina mai i luma o le Fono, ua na o ni fuainumera faanatinati, ae o le a faaauau sailiiliga a le faigamalo mo le tuuina mai o ni isi fuainumera faaopoopo i luma  o le fono, i le tulaga tonu o le a i ai aitalafu a le malo.

Na tulai le afioga i le alii Senatoa ia Tuiasina S. Esera ma saunoa e faapea, e faanoanoa lona sui ona o le tulaga pagatia o lo o i ai lona itumalo i tulaga o auala, ae o lea ua ave e le kovana le $100,000 e fesoasoani ai i tagata na mafatia i le afa i Samoa.

Na fesili le alii Senatoa i le peresetene o le Senate ia Gaoteote Palaie Tofau, i lona fia iloa pe na talanoa atu le kovana tuai ia te ia e faatatau i le $100,000 ua tuuina atu mo Samoa, ae na tali le alii peresetene, sa talanoa atu Togiola Tulafono ia te ia e faatatau i le tupe lea, ma o lana tala na fai i ai, ave i le fono e faapasia atu ai.

Saunoa Tuiasina, ua tiga finagalo o lona itumalo ona o le mafatia i aso uma i tulaga faaletonu o lo o i ai auala, ae o lea foi ua maua le isi tala mai le kovana fou ua i ai nei, e $200,000 o lo o aitalafu ai le malo i kamupani fai auala sa latou toe fausia le auala i Futiga, ma ua atili ai ona le mautonu tagata o lona itumalo i le tulaga tonu o a latou auala.

I le tulaga lava o aitalafu a le malo, na tulai ai le afioga i le alii Senatoa ia Galea’i Tuufuli ma talosaga i le alii peresetene, e tatau ona suesue auiliili le mataupu i tupe sa totogi atu e le faigamalo ua mavae i Faatonusili mo a latou totogi faaiu, atoa ai ma tupe sa totogi atu i le kovana ma le lutena kovana.

Na faavae le finagalo o Galea’i i se ripoti na tuuina atu e kovana Lolo i luma o le Fono i le aso Gafua na te’a nei, lea sa ia taua ai le silia i le $1 miliona le aofai o le tupe ua faamoemoe e alu i totogi faaiu o Faatonusili o Ofisa ma Matagaluega a le malo i le nofoaiga ua mavae atu, faapea ai le kovana ma le lutena kovana.

Na taua e Lolo e faapea, e $734,000 le tupe ua maea ona totogi atu mo Faatonusili ua maea ona faagasolo a latou pepa, ae $280,000 le tupe o lo o fuafua e totogi atu mo i latou e lei maea ona faagasolo a latou pepa, ona maua ai lea o le aofaiga e $1.027 miliona.

Na taua e Galea’i e faapea, na te fia iloa poo ai uma tagata sa totogi atu i ai nei tupe, ae o a foi auala na mafua ai ona latou maua tupe nei, poo ni livi ma’i, livi faaletausaga, atoa ai ma isi lava mafuaaga.

Na taua foi e Galea’i lona ofo tele ina ua ia maua le tala, sa aofia ai le kovana ma le lutena kovana ua mavae atu i tupe nei na totogi mo laua livi.

“E fou i la’u faalogo e totogi ni livi o se kovana ma se lutena kovana i faigamalo o lo o i lalo o le fu’a a le malo meleke,” o le saunoaga lea a Galea’i.

“O le tupe lea ua faaalu i totogi nei e aunoa ma le paketiina atu e le Fono Faitulafono, e le o se tupe laititi, ae ou te fia iloa foi pe aisea ua fai soo ai e le tatou malo lenei mea o le faaaoga o tupe ae lei pasia atu e le Fono,” o le isi lea saunaoga a Galea’i.

Na taua e le afioga i le Alii na Mua i Ao e faapea, o lo o vaavaai mai tupulaga talavou i le faagasoloina o gaioiga a le malo, ma o latou maitau mai poo ai gaioiga a taitai o le atunu o lo o fai, ma afai o faataitaiga leaga ia o lo o faia e taitai mo tupulaga o le atunuu, lona uiga o le a latou mulimuli ai fo’i.

Na tulai le taitai komiti o le Paketi a le Senate ia Laolagi Fonoti Savali Vaeao ma ia saunoa, e taoto atu le mataupu o le a iloilo e lana komiti.