O ni tagata mai Asia na aumai e galulue i pisinisi ma faleoloa, ae emo ane le ata ua avea ma tagata fai togalaau ‘aina i le atunu’u ma latou maua tupe tele, ua talosagaina ai e ni isi o le aufai faatoaga a le atunuu le Matagaluega o Faatoaga ina ia faia sa latou suesuega auiliili e uiga i lenei mataupu.

Na taua e Vaosa Auelua, o se tina fai faatoaga mai Pava’ia’i e faapea, o le tuuina atu e le malo o le avanoa i tagata mai Asia e faatau ai a latou fualaau ‘aina i le polokalama a le ‘school lunch’, ae o i latou nei na aumai e faigaluega i faleoloa ma pisinisi a tagata Asia, o se tulaga le talafeagai lea mo le aufai faatoaga ma le aufai togalaau ‘aina a le atunuu.

“E tatau ona matua suesue e le malo tagata nei poo latou usitaia tulafono tau Femalagaaiga na o mai ai, afai e faamaonia ane ua latou soli tulafono tau Femalagaaiga, ua tatau ona toe faafo’i i o latou atunuu, ae faasala sponsor na auala mai ai i latou nei,” o le manatu lea o Auelua.

Na taua e Auelua e faapea, e leai se eseesega o tagata mai Asia o lo o umia ID o le P4 ma tagata mai Upolu ma Savaii sa umia le ituaiga ID lea, na galulue i le kamupani o le COS Samoa Packing, ina ua tapuni le kamupani, sa toe faafo’i uma i latou ina ua le toe galulue i le kamupani na mafua ai ona ulufale mai i le teritori.

Na lagolagoina e le susuga Apelu Brown, o se alii fai faatoaga mai Tafuna le manatu lava lea e tasi.

Fai mai Brown, ua tau le maua ni avanoa o le aufai faatoaga ma le aufai togalaau ‘aina a le atunuu e la’u atu ai a latou faatoaga i faleoloa tetele ma le school lunch, ona o lea ua fao uma e tagata mai Asia avanoa.

“E tatau foi ona vaavaai toto’a le Matagaluega o Faatoaga i ituaiga vailaau o lo o faaaoga e tagata mai Asia e teu ma faaleleia ai a latou faatoaga, poo tusa ma ta’iala ma tulafono a le feterale, ina ne’i fiafia i le lapopo’a o kukama, kapisi ma isi fualaau, ae mulimuli ane ai aafia le atunuu i ni faama’i e mafua mai i vailaau o lo o faaaoga,” o le saunoaga lea a Brown.

O le mataupu lenei na alia’e mai i le vaiaso na te’a nei, ina ua faasea nisi o le aufai togalaau ‘aina mai Asia ona o suiga fou ua faia i le polokalame a le school lunch, lea ua le mafai ai ona latou toe pikiina a latou siaki e maua mai i a latou togalaau ‘aina o lo o faatau atu i ai, sei vagana ua alu atu le sponsor e faafou le lesitalaina o latou igoa ma piki mai le siaki.

E toalua alii fai togalaau ‘aina mai Asia na talanoa ma le Samoa News i le vaiaso na te’a nei e uiga i le mataupu lenei, ma la taua ai lo la faasea i le Ofisa o Faatoaga ma le polokalame a le School Lunch, ona o suiga fou ua latou faia ina ia le mafai ai ona latou toe maua se avanoa e faatau atu ai a latou fualaau ‘aina i le polokalame.

Na taua e le isi alii lea sa ia faailoa i le Samoa News o Lee lona igoa, e leai se mea o le a piki ai fua e le sponsor le siaki sa maua mai i lana faatoaga. Fai mai lana mau, o tupe ua maua mai o ana lava tupe, sa afu ma galue ai ai e toto lana faatoaga ina ia selesele ma manuia ai.

Ina ua maea ona faailoa e Lee i le Samoa News fai mai, o le gaioiga a le Ofisa o Faatoaga ma le School Lunch ua fai e faailoga lanu, sa ia toe talosaga ai loa ina ia aua ne’i faailoaina lona igoa ina ne’i aafia atu ai ma lona aumai i le teritori.

Na faamanino e le Faatonusili o le Matagaluega o Faatoaga ia Lealao Mel Purcell ina ua fesiligia o ia i luga o le telefoni, ua galulue faatasi lona ofisa ma le Ofisa o Aoga mo le faamalosia o tulafono ina ia mautinoa o lo o mulimulita’i i ta’iala o lo o moomia.

Fai mai lana molimau, e le gata o lo o mataitu e lona ofisa ituaiga vailaau o lo o faaaoga e le aufai togalaau ‘aina mai Asia, ae o lo o tulimata’i fo’i ina ia mautinoa o lo o usitaia tulafono tau Femalagaaiga.

Na taua e se alii Ofisa Sinia i le Ofisa o Femalagaaiga e le faataga ona talanoa i mataupu faapenei, o lo o manino tulafono tau Femalagaaiga i tagata mai o lo o aumai e galulue i galulue i pisinisi lea o lo o tuu atu i ai le ituaiga ID o le P4, ma i latou o lo o tuu atu i ai le ituaiga ID o le P5.

“O le P4, e tasi lava le mea e te faigaluega ai, na o le pisinisi na aumaia oe, afai la e faamuta e le pisinisi le avanoa e te toe galue ai mo i latou, fai mai le tulafono, e tatau ona e toe fo’i i lou atunuu na e sau ai, ae le faapea o le faamuta o le avanoa e te faigaluega ai ae e oso fai lau togalaau ‘aina pe fai se isi au pisinisi,” o le molimau lea a le Alii Ofisa Sinia.