Ads by Google Ads by Google

Manana’o fai fa’atoaga Asia tutu fa’atasi ma faifa’atoaga Samoa

E le o logo lelei i le faafofoga a ni isi o le aufai faatoaga togalaau aina mai Asia o lo o galulue i le atunuu, ni isi o faamatalaga ua faalele e faapea, ‘ua ave e le aufai togalaau aina ma le aufai faatoaga mai Asia tupe, ae ua pagatia ai le toatele o le aufai faatoaga ma le au fai togalaau aina a le atunuu.

Na taua e ni alii fai togalaau aina mai Asia na la faaigoaina i laua o Kim le isi ae o Lee le isi, “o lea manatu e le gata e le sa’o, ae foliga mai fo’i e faailoga lanu i le va o tagata mai Asia ma Samoa.”

O lea mataupu na alia’e mai i le vaiaso na te’a nei ina ua faalauiloa e ni isi o le aufai faatoaga a le atunuu lo latou naunau e saili ni maketi i fafo e la’u i ai a latou fua o faaeleeleaga pei o talo, fa’i ma fualaau aina, ona ua fao uma e aufai faatoaga mai Asia a latou avanoa i faleoloa, faleaiga ma le school lunch.

Fai mai Lee ma Kim, o igoa ia na faailoa mai e le au alii ia i le Samoa News o la faai’u ia, e le tatau ona tusi tusi lima faapea le aufai faatoaga a Samoa ma foliga mai e eu eu ese i latou, leaga o a latou faatoaga ma togalaau aina, e le o toto i Asia ma la’u mai iinei, ae o faatoaga lava na o latou o mai ma toto iinei.

Fai mai Kim, o se tasi o mea ua ia maitauina i tagata Samoa, toeititi leai se aiga e leai se fanua e sili atu i le tai 10 eka e nonofo ma galulue ai.

Na feiloa’i le Samoa News ma Kim i le taimi a’o la’u ai i lalo lana uta o fualaau aina e pei o kapisi, tamota, pi uumi, lagisi, green paper ma le anoanoa’i lava o isi fualaau aina o lo o toto i lana faatoaga i Vaitogi, i se tasi o faleoloa i le taulaga.

Ae o Lee sa ia toe fesiligia le mataupu lea ua le mafai ai ona toe piki e ia lana siaki e maua mai i ana fualaau aina o lo o faatau atu i le school lunch, sei vagana ua piki a lana sponsor.

Na taua e Kim lona musu e soona fai sana faamatalaga i tagata Samoa, ina ne’i avea ma itu e aafia atu ai ma lona aumau ai i le teritori, pe i’u ina toe tipoti ai ma ia, ae i lona talitonuga, e mafua ona tutupu lagona nei i ni isi o le aufai faatoaga Samoa, leaga e le o manana’o e tuu faatasi le asosi o fai faatoaga Samoa ma latou mai Asia.

Saunoa le afioga i le Faatonusili o le Matagaluega o Faatoaga a le atunuu, tofa Lealao Mel Purcell e faapea, o se tasi lea o faanaunauga o lo o i ai ia te ia ma lona ofisa, “Afai e mafai ona tuu faatasia le asosi o le aufai faatoaga a le atunuu e aofia ai ma nai tagata mai Asia o lo o galulue e toto togalaau aina, o le a mafai ona malosi ma mautu a latou taumafaiga, ma faa faigofie ai foi ona faamatuu mai e le malo tele ni fesoasoani tau tupe e atinae ma faaleleia ai faatoaga i le atunuu,” o le saunoaga lea a Lealao.

Sa ia taua foi e faapea, o lo o taumafai le matagaluega e saili ni auala e la’u atu ai fua o faaeleeleaga a le atunuu e faatau i maketi i fafo e aofia ai ma Samoa, e pei ona talosagaina e ni isi o le aufai faatoaga a le atunuu, ma o le isi lea auala e mafai ai ona talia ia talosaga, pe afai e vaavaai mai maketi i fafo e le gata o lo o mautu ma malosi le asosi a le aufai faatoaga, ae o lo o tele foi fua o faaeleeleaga o lo o mafai ona la’u atu e faatau.