Manana’o aufai pisinisi e galulue fa’atasi ma le malo

Ua fa’aalia e ni isi o faipisinisi lo latou lagolagoina o se fuafuaga ua fa’alauiloa e le Asosi o Loia a le atunu’u, i se taumafaiga ina ia galulue fa’atasi ma Aufai Pisinisi, i le sailia o ni auala e mafai ai ona fesoasoani i le fa’aleleia ma le atina’eina o pisinisi i totonu o Amerika Samoa.“O se fuafuaga ua leva ona tatau i le malo ona latou faia, ina ia mafai ai ona matou tutu fa’atasi i le tau atina’eina lea o le tamaoaiga o le malo i taimi pagatia ua tatou i ai,” o le molimau lea a le susuga ia Feti Alapati, o se tasi o ali’i faipisinisi pasi ma se faleoloa i le atunu’u.Na taua e Alapati, e i ai tulafono tau pisinisi ua leva ona tatau ona sui, peita’i e le’i i ai lava se tasi o le malo o asiasi i ai i nei tulafono mai le tele o tausaga ua tuana’i.O nisi o ia tulafono e aofia ai le tulaga o le aumaia lea o oloa i le atunu’u atoa ai ma le tulaga i le tau o oloa, lea o lo’o mafai ai lava ona tu’u sa’oloto le tagata faipisinisi e tafili saunoa i so’o se tau e fa’atauina atu ai ana oloa i le atunu’u.Na taua e Alapati e fa’apea, afai e manatu le malo e aga’i pea i luma le tulaga manuia o so’o se ituaiga pisinisi i le atunu’u, ua tatau ona tula’i mai e galulue fa’atasi ma le aufaipisinisi.O manatu fo’i ia mai nisi o le aufai pisinisi taxi, pasi ma faleoloa e aofia ai le susuga ia Tavita Brown, o se ali’i faipisinisi faleoloa mai Aua na fesiligia e le Samoa News e uiga i lenei mataupu.Na taua Brown, o le tele o taimi e fa’atula’i ai e le malo tulafono e ono a’afia ai pisinisi, e ui o lo’o silafia lelei lava e le malo, o pisinisi o lo’o fesoasoani malosi i le tamaoaiga o le atunu’u.Na taua e le Peresetene o le Asosi o Loia i le atunu’u ia Sean Morrison, o lo’o i ai se fuafuaga i le Asosi o Loia e galulue fa’atasi ma le Vaega o Pisinisi i le atunu’u, i le sailia lea o auala e mafai ai ona fa’aleleia tulaga tau pisinisi i Amerika Samoa.Ina ua fesiligia e le Samoa News i ituaiga auala o lo’o ia fuafua e fesoasoani ai i le aufai pisinisi na ia taua ai, e tele auala e mafai ona fesoasoani atu ai le malo i pisinisi, ma o ia auala o le a mafai ona manino pe afai e mautu se feiloaiga ma le aufai pisinisi.Ina ua fesiligia i se taumafaiga a le malo e taofia ai le toe laiseneina o pasi pa’u fa i le tausaga 2013 na ia taua ai, o nisi o mafuaaga na va’ava’ai i ai le Komisi i le mataupu lea, o le saogalemu o tagata feoa’i atoa ai ma le mafai lea ona tatala mai e le feterale avanoa tau tupe e fesoasoani ai i le fa’aleleia o pisinisi tau fela’uaiga, ona o lo’o i ai le fa’anaunauga e tatau ona ausia le tulaga saogalemu o pasi la’upasese i le isi lua tausaga o lumana’i.

Comment Here