Ads by Google Ads by Google

Mana’omia Vaega Tosovaa se tupe faalautele ai lana tautua

Ua tuuina atu se talosaga a le Komiti Faafoe o le Vaega Tosovaa i Satala i le kovana sili ma lana taupulega mo se fesoasoani tau tupe, tauala mai i polokalama o lo o faatupe e le feterale e faalautele ai la latou tautua i le lumana’i e aofia ai le toe fausia o se isi vaega toso vaa laititi e faaaoga e toso i ai vaa fagota ina ia talafeagai ma le lapopo’a o vaa fagota, e pei ona taua e le taitaifono o le komiti faafoe ia David Robinson.

 

Na taua e Robinson e faapea, o le autu ua mafua ai ona naunau e faalautele la latou tautua, ina ia mafai ai ona faatosina mai vaa fagota mai vaega eseese o le Pasefika i Amerika Samoa e fau ma lipea ai a latou vaa, ona o lo o lelei ma maualuga le tautua o lo o mafai ona latou ofoina atu.

 

“Na faaalia e le alii kovana ia Lolo Matalasi Moliga lona sapasapaia o le fuafuaga sa maua faataoto atu ma le susuga Doug Harrington e fai ai maua ma sui o le komiti faafoe, i sa matou fonotaga sa faia i le vaiaso na te’a nei,” o le saunoaga lea a Robinson i le Samoa News.

 

I lea fonotaga e pei ona taua e Robinson, sa ia talosagaina ai le alii kovana ina ia silasila i vaega tupe o lo o tuuina mai e le feterale e faatupe ai polokalame ma atinae tetele i Amerika Samoa e pei o le ‘Capital Improvement Project - CIP), poo le auala atu foi o se talosaga i le Ofisa o le Initeria (DOI) mo se fesoasoani ina ia mafai ai ona fesoasoani i le faatupeina o fuafuaga a le Vaega Tosovaa.

 

I tausaga ua mavae e pei ona saunoa Robinson, sa lua vaega e faaaoga e toso ai vaa, o le vaega toso vaa e  3,000 tane le mamafa o soo se ituaiga vaa e mafai ona toso ai, ma le vaega toso vaa e 800 tane e mafai ona toso vai, peitai o le vaega toso vaa laititi lea e lei faaaogaina lava ao pulea e le kamupani a le Southwest Marines Samoa ma le MYD Samoa Inc le vaega toso vaa i le 20 masina talu ai.

 

“O le taimi nei ua elea le vaega toso vaa laititi lea, ma ua manaomia ai le toe fausia o se isi vaega toso vaa laititi e tusa lona malosi ma le 500 tane, ina ia fesoasoani ai i le faatinoina o la matou galuega,” o le saunoaga lea a Robinson.

 

O le taimi nei, e tusa ma le 42 le aofai o le aufaigaluega o lo o galulue i le Vaega tosovaa i Satala, ma ua ova ma le 50 vaa ua maea ona latou tosoina i luga o le vaega toso vaa ma toe lipea talu mai le 20 masina talu ai.

 

“O lo o faaauau pea la matou galuega faatasi ai ma le faanaunauga ia matou faia le mea sili ma siitia le maualuga o galuega matou te faia,” o le isi lea saunoaga a Robinson.

 

I ni nai vaiaso o lo o muamua ua sauni ai le Vaega Tosovaa mo le faapipiiina o isi filifili fou i le mea toso vaa tuai o lo o i ai, ina ia fesoasoani i le faatinoina o galuega ma faaleleia la latou auaunaga i le atunuu atoa ai ma pisinisi mai fafo.