Ads by Google Ads by Google

Mana’omia tupe toe tatala ai polokalame gasegase auina i fafo

O le toe tatalaina o le polokalame a le falema’i o le LBJ i Fagaalu e auina atu ai gasegase i fafo mo togafitiga, atoa ai ma le toe faatulaga lelei o ta’iala o le polokalame, o se tasi lea o itu na auala atu i ai le talosaga a le alii kovana e fai ai o ia ma sui o le malo o Amerika Samoa, i lana tusi sa tuuina atu i le Failautusi le tumau o le Matagaluega o le Initeria a le malo tele, mo se vaega tupe faaopoopo e fesoasoani ai i le faaleleia o le soifua maloloina i le teritori.

 

Na taua e Lolo Moliga i se vaega o lana tusi ia Eileen Sobeck e faapea, talu ai e le maua uma i le teritori togafitiga e moomia mo le toatele o gasegase i le atunuu, o le autu tonu lena na faavae ai le polokalame e auina atu ai gasegase e togafiti i falema’i i Hawaii ma setete i le  itu i sisfo o Amerika.

 

“Ae i le va o le 3 ma le 4 tausaga talu ai, na avea le le lava o tupe e faaauau ai le polokalame ma itu na faamalosia ai loa gasegase ina ia saili lava e i latou tupe e totogi ai a latou togafitiga mo falema’i i fafo, ma o se itu e le taitai talafeagai lea tulaga, ona o le 87% o le faitau aofa’i o tagata Amerika Samoa e maualalo lo latou tamaoaiga,” o se vaega lea o le tusi a Lolo.

 

O se tasi o faafitauli o lo o feagai ma le malo i le auina atu o gasegase i fafo mo togafitiga, o le vava mamao lea o Amerika Samoa ma Hawaii, ma ua maitauina ai, e na o Amerika Samoa le teritori o le Iunaite Setete i le Pasefika e manaomia itula e lima e lele atu ai mo le faia o togafitiga i le falema’i pito lava mai i Hawaii, e ui o lea e latalata mai Niu Sila ma Ausetalia, o lo o lelei falema’i ma maualuga tulaga tau togafitiga e maua ai, e tutusa lelei lava ma le tulaga lelei o lo o i ai togafitiga i le Iunaite Setete.

 

O se tasi o faafitauli o lo o maitauina i le tulaga o le soifua maloloina i Amerika Samoa, e le o lava tupe e totogi ai ni foma’i lelei mai fafo e galulue i totonu o le LBJ, aemaise ai le tulafono lea e tatau ai ona faamaonia tusi faa foma’i o se tasi i lalo o tulafono ma ta’itala a le malo tele, ona faatoa mafai lea ona galue faafoma’i i se teritori po o se setete foi o le Iunaite Setete.

 

Na faailoa e Lolo ia Sobeck e faapea, o vaega tupe o lo o auala mai i le Initeria i tausaga tupe taitasi, o lo o mafai ona faafou ma toe faaleleia ai isi vaega o le LBJ,  peitai i le faatupulaia ai o le faitau aofai o gasegase e agai atu i le falemai mo togafitiga, atoa ai ma le manaomia ona faaleleia atili o le tautua a le falema’i, e manaomia ai le fausiaina o se isi falema’i fou e sui tulaga i le falema’i o lo o i ai nei, ua silia i le 40 tausaga lona matua.

 

E ui o se fuafuaga faataoto mamao lea fuafuaga, peitai ua amata faataoto e le Komiti Faafoe o le Soifua Maloloina i Amerika Samoa ni ta’iala, e mafai ai ona faafou ma toe faaleleia le falema’i o lo o i ai nei.

 

O ni isi o polokalame o lo o faatupe mai e le feterale mo Amerika Samoa e pei o le Medicaid Program ma le Medicare Program, o ni isi nei o polokalame na taua e Lolo o lo o mafai ona maua ai e le atunuu ni isi o fesoasoani i le tulaga o le soifua maloloina.

 

Sa ia taua foi le taumafai pea e vaavaai i se Inisiua ina ia mafai ai ona taugofie le totogiina o le foma’i e tagata gasegase, pe a o o i le taimi latou te manaomia ai lea auaunaga.

 

I le faaiuga o le tusi a le alii kovana i tulaga e faaleleia atili ai le soifua maloloina i le teritori, sa ia fautuaina ai le tatau lea ona faaleleia o tulaga o femalagaaiga i le ea, mo le auina atu o gasegase i fafo mo togafitiga, aemaise ai vaega tupe faaopoopo e fesoasoani ai i le faaleleia atili o le tautua a le falema’i o le LBJ.