Mana’omia toe a’oa’o Leoleo i le Tulafono ma le Amio pulea

E talitonu afioga i ali’i Senatoa ia Galea’i M. Tu’ufuli ma Soliai Tuipine Fuimaono, e le o le fa’aaupegaina o Leoleo le mataupu e tatau ona ave i ai le fa’amuamua a le Komesina ma le Matagaluega o Leoleo i le taimi nei, ae o le toe a’oa’ina o Leoleo ia malamalama lelei i le Tulafono atoa ai ma le maua o le amio pulea, o itu ia e tatau ona ave i ai le fa’amuamua a le Matagaluega.

 

O ia saunoaga mai ali’i Senatoa sa faaleoina i se iloiloga sa faia i luma o le komiti o le Puipuiga o le Saogalemu Lautele i le taeao ananafi, i lalo o le taitaiga a le afioga i le alii senatoa ia Faletagoa’i Tuiolemotu o le taitai komiti.

 

Saunoa Galea’i e faapea, o lo o faalogo i tala i le faaletonu o ripoti a leoleo o lo o tuuina atu i luma o le fa’amasinoga, ma e i ai lona talitonuga e tatau ona a’oa’o muamua leoleo ia malamalama lelei i le tulafono, ina ia aua nei faa faigata ai le faatinoina o le galuega.

 

“Afai e tula’i mai se fa’alavelave tau ta’avale ae tali atu i ai le leoleo, ia taunuu leoleo i le nofoaga o lo o tula’i mai ai le fa’alavelave ua ia iloa le tulafono e apalai i le faalavelave o lo o tula’i mai,” o le saunoaga lea a Galea’i.

 

Na lagolagoina e le alii senatoa ia Magalei Logovi’i le finagalo o Galea’i e fa’atatau i lenei mataupu, ona o se mataupu na taofia ai o ia e se leoleo i luga o le auala, ae ina ua ia fesili atu i leoleo e faamalamalama atu ia te ia poo le a le tulafono ua ia solia, sa ia vaaia foliga ita o le leoleo ma faatonu o ia e avatu lona laisene.

 

O le iuga o le mataupu e pei ona faailoa e Magalei i le Komesina ma sui o le matagaluega, na solofua e le ali’i fa’amasino ia John L. Ward II le moliaga tau ta’avale fa’asaga ia te ia ona e le sa’o le moliaga na tuuaia ai o ia.

 

Saunoa Magalei e faapea, e matua manaomia lava le silafia lelei e le leoleo o le tulafono ina ia faigofie ai ona fesoasoani i le faatinoina o lana galuega, ina nei avea le le malamalama ma itu e aafia ai ma aia tatau o le tagata o lo o faia faasaga i ai tuuaiga tau solitulafono.

 

Saunoa le afioga i le alii senatoa ia Soliai e faapea, o le isi vaega e manaomia le toe aoao ai o leoleo, o le gagana fa’aaloalo ma le iloa le va fealoa’i ma le mamalu o le atunuu.

 

Na faailoa e Soliai i le alii komesina e faapea, o le toatele o le tupulaga lea ua avea nei ma leoleo a le malo, e matua “tumu i le le mafaufau”, e le gata e le iloa le va fealoa’i ae le iloa fo’i le gagana fa’aaloalo e fesootai ai ma le atunuu.

 

E le o aofia ai i latou matutua ua tele tausaga o galulue i le ofisa o leoleo i le saunoaga lea a le alii senatoa ia Soliai.

 

I le sauniga e faapine ai leoleo mo i latou ua maua le faailoga o le Leoleo o le Kuata ma le Masina sa faia i le amataga o le tausaga nei, na fautuaina ai e le alii komesina o Leoleo ia William E. Haleck leoleo uma sa auai e aofia ai ma Ta’ita’i leoleo, ina ia tautuana auala e faatinoina ai la latou tautua i le atunuu, ia faamuamua le alofa ma ia fa’aaloalo i le atunuu e ala i le gagana e faaaogaina.

 

Na fautua Haleck i leoleo e faapea, soo se taimi e faatinoina ai la latou tautua aemaise pe afai o le a faasala se tagata i luga o le auala, ia fai pei lava o se tagata o lona aiga lea tagata, o se tama fo’i poo se tina, e ala i le faailoa i ai o uiga ma amioga faaaloalo.

Comment Here