Ads by Google Ads by Google

Mana’omia se feiloaiga Fono ma le ASPA i tulaga o tupe

Ua talosagaina e nisi o le atunu’u ta’ita’i o le Fono Faitulafono ma le pulega a le ASPA, tauala atu i luga o le Samoa News, ina ia faia sa latou feiloaiga fa’anatinati e fa’amanino ai le tulaga sa’o o tupe e pei ona vavao ma vevesi ai ripoti a vaega fa’asalalau.Na taua e nisi i le Samoa News lo latou fia malamalama i le tulaga sa’o o le ripoti e pei ona fete’ena’i ai finagalo o le Fono ma le ASPA, i le tupe fa’asili a le ASPA lea o lo’o taua mai i le ripoti o le kuata lona fa o le tausaga tupe 2011, lea e tusa ma le $8 miliona le aofa’i.O nisi o finagalo o le atunu’u na mafai ona fa’ao’o mai i le vaega o le Lali a le Samoa News i le fa’aiuga o le vaiaso nei, i le mae’a ai lea ona fa’alauiloa o se tali mai le pulega a le ASPA e teena ai le ripoti sa i ai sa latou tupe fa’asili e silia ma le $8 miliona mo le tausaga tupe 2011 ua mae’a.Saunoa le afioga ia Pulu Ae Ae Jr i le Samoa News, o mataupu fa’apenei, e tatau lava ona fa’amanino lelei e le Fono ma le ASPA, ona o lo’o amo e le atunu’u le mamafatu o le avega i le taugata lea o pili eletise ma le suavai.O le finagalo fo’i lea o le tama ia Lualoto Filimau mai Fagatogo ina ua fesiligia e le Samoa News i lenei mataupu.“O lea ua fete’ena’i ripoti e lua i le fa’afofoga a le atunu’u, e le gata ua taoto le ripoti a le malo ae o lea fo’i ua teena e le ASPA, na pau la le tulaga e tatau ona fai ina ia manino ai mataupu fa’apenei, e tatau ona fai se iloiloga i luma o le Fono ina ia fa’amanino ai le tulaga tonu o le mataupu lea,” o le saunoaga lea a le susuga Filimau.Na taua e se tina faiaoga ua silia ma le 10 tausaga talu ona galue fa’a faiaoga, e foliga mai o lo’o tau tu’ua’i lava le ASPA ma le Fono Faitulafono i tulaga o tupe ma ripoti, ae o lo’o aga’i pea i luga le totogi o tautua mo le atunu’u i le eletise ma le sauva’i.“E le o fia fa’alogologo le atunu’u i ni tau tu’uaiga po’o fea e sa’o a’o ai e sese, o le itu taua, e tatau ona feutana’i vaega ia o le malo e saili se fa’amama avega mo le atunu’u ua pagatia ma pologa i le taugata o tautua a le ASPA,” o le saunoaga lea a le tina faiaoga e le’i finagalo e fa’alauiloa lona suafa.E to’alua isi ali’i faigaluega i se tasi o Matagaluega a le malo sa laua fa’aalia fo’i lo le talitonuga, e tatau lava ona fa’amanino e le ASPA tulaga tonu o ana tupe maua i luma o le Fono, ina ia mafai ai ona malamalama le atunu’u aemaise ai lava tagata fai lafoga lea o lo’o sili ona pagatia i lenei fa’afitauli.Fai mai le molimau a le pulega o le ASPA, e le o se tupe fa’asili lea o lo’o taua i le ripoti a le Ofisa o le Tupe, ae o le tupe lea o lo latou nofo aitalafu ai i le fa’aiuga o le tausaga tupe 2011, peita’i na taua e le afioga i le ali’i faipule ia Larry Sanitoa, o lo’o manino le ripoti na tu’uina mai i le kuata lona fa o le tausaga tupe 2011, e tusa ma le $8.85 milona le tupe fa’asili a le ASPA na maua, ma o lea tulaga, ua fesiligia ai le latou si’itaga lea na toe fa’amamaluina i le aso 1 Oketopa na te’a nei.Saunoa le afioga Sanitoa, o se tasi lenei o mataupu e mana’omia lava le fa’amanino ma iloilo toto’a e le Fono Faitulafono, ina ia mafai ai ona fa’avae se fa’aiuga mautu a’o le’i toe o’o atu le ASPA mo le toe talanoaina o lana paketi i le masina o Ianuari 2012.