Ads by Google Ads by Google

Mana’omia se Fale ‘aau lelei koleni ai ‘au mo Ta’aloga Pasefika

Ua talosagaina e sui o le Vaega ‘aau sa malaga atu i Ta’aloga lona XV a le Pasefika i Papua Niu Kini le alii kovana ia Lolo Matalasi Moliga ma le malo, mo se avanoa e fausia ai se Fale ‘aau lelei e koleni ai ‘au ta’aalo a le atunu’u mo isi ta’aloga a le Pasefika o loo lumana’i nei.

 

Na taua e le faiaoga o le Vaega ‘aau sa malaga atu i Papua ia Bill Sakovich i se fa’atalatalanoaga ma le Samoa News e fa’apea, na pau le auala e mafai ai ona manumalo le vaega ‘aau a Amerika Samoa i ta’aloga a le pasefika, o le i ai lea o se fale ‘aau lelei ma talafeagai e koleni ai fanau mo lenei ta’aloga.

 

Na fa’afetaia e Sakovich le tulaga maualuga sa oo i ai taumafaiga a alo e to’atolu sa fai ma sui o le atunu’u, i ta’aloga a le pasefika i Papua, peita’i i lona manatu, ana le koleni fanau nei i fale ‘aau i fafo, e le o le tulaga maualuga lea e oo i ai la latou taumafaiga.

 

“O le talosaga vaivai e fa’ataoto atu i le alii kovana ma le faigamalo, fa’amolemole, fausia se fale ‘aau mo ‘au ta’aalo a le atunu’u. Afai e fia maimoa Amerika Samoa i ni pine e maua e le vaega ‘aau, fausia se fale e koleni ai latou. E aoga fo’i le fale ‘aau fou pe a fausia e fai ai aoga ma lesona mo fanau uma e fia fa’ata’ita’i i lenei ta’aloga manaia,” o le saunoaga lea a Sakovich i le Samoa News.

 

O sui e to’atolu a Amerika Samoa na tausinio i ta’aloga a le Pasefika e aofia ai le auuso o Daniel ma William Hardman, faapea ai ma le tama’ita’i o Tilali Scanlan.

 

  \\