LE MAUTONU ISI PO’O AI O LE A PALOTA I AI

E ui ua le taunuu faamoemoega a ni isi o paga sa tauva mo le tofi kovana ma le lutena kovana, ina ua maea le taamilosaga muamua o le faiga palota tele a le atunuu i le aso Lua o le vaiaso nei, peitai o le mea moni, o lo o mana’omia pea e paga e lua ia ua sauni atu mo le ‘run off’ ekisi a le atunuu sa palota i paga ua le faamanuiaina.

E toa 10 ni isi sa palota i paga ua le faamanuiaina na latou faailoa i le Samoa News e faapea, talu ai ua le faamanuiaina paga sa latou lagolagoina, ua tonu ai i o latou manatu o le a latou le palota i le ‘run off’ ua fuafua mo le aso 20 Novema 2012.

Fai mai le talitonuga o ni isi o i latou nei, o ai lava le paga e manumalo mai, o le paga lena e taitaia le atunuu, peitai o le fautuaga na tuuina mai e le Komesina o Palota a le atunuu, afioga Soliai Tuipine Fuimaono e faapea, e tatau ona palota tagata uma.

“Ou le popole poo ai e malo, pau le mea ou te iloa ua le manuia le paga sa ou lagolagoina, o lona uiga ua muta ai foi i i ma la’u taumafaiga i le palota,” o le tala lea a le isi alii palota.

O le aso 20 Novema lea ua faamoemoe e faia ai le ‘run off’ i le va o le paga a Faoa Aitofele Sunia/Taufete’e John Faumuina, faapea ai le paga a Lolo Matalasi Moliga/Lemanu Peleti Mauga.

O le aso Lulu na sosoo ma le aso o le palota na amata feoa’i solo ai tama sasa’o i ‘camp’ a paga ua le faamanuiaina, e fesiligia ni o latou finagalo e uiga i le run off lea ua sauni atu i ai le atunuu, e pei ona faailoa mai e ni isi o molimau i le Samoa News.

Sa faamaonia mai e se tagata palota i le vaega a Afoa/Le’i e faapea, o le aso Lulu na te’a nei na feiloai ai Lolo Moliga ma Lemanu Peleti Mauga ma le paga a Afoa/Le’i, peitai e le’i mautu mai sa latou faaiuga ua faia.

E faapena foi le paga a Faoa/Taufete’e e pei ona taua e le molimau, sa la asia foi le nofoaga autu o le paga a Afoa/Le’i i le vaiaso nei.

Ae na faaali manino e le afioga i le Aloalii ia Afoa L.S Lutu i le po na maea ai le palota, e tatau ona fai se faaiuga mautu a le latou vaega, mo se paga latou te lagolagoina, ina ia mautinoa e ausia ni isi o mea sa latou faananau e faatino i le taimi na tauva ai mo le tofi kovana ma le lutena kovana.

Sa ia faailoa foi i tagata palota uma sa palota atu ia i laua ma Le’i e faapea, e ui ua le taunuu lo la faamoemoe, peitai o lo o aoga pea la latou palota mo paga e lua ua sauni atu mo le run off.

O tala ua salalau o lo o taua ai le asiasi atu o paga ua sauni mo le run off i isi paga ua le faamanuiaina la latou taumafai, e pei o le paga a Dr. Salu/Savusa lea na la mauaina palota e 893, o le paga a Save/Sandra lea na la mauaina palota 763, ma le paga ta Jones/Tuika lea na la mauaina palota e 189.

O le agaga na faaalia e Afoa i lana komiti ma i latou uma sa lagolagoina lo la faamoemoe ma Le’i, e tatau ona fai muamua sa latou feagaiga i mea uma sa latou mananao i ai e faatino pe a faapea e tulai mai i le tofi, ona latou o lea e ave i le paga lea ua latou talitonu e taliaina la latou talosaga.

Sa fautuaina e Afoa la latou vaega ina ia tasi sa latou faaiuga e fai, ae aua nei taapeape. O le paga a Afoa/Le’i na la mauaina palota e 2,581.