Ads by Google Ads by Google

Mana’omia malo fesoasoani atunuu sailia pisinisi solitulafono

Ua talosagaina e le kovana sili le mamalu o le atunuu ina ia fesoasoani e faailoa i le malo, nisi o gaioiga o loo latou maitauina o loo faia e nisi o faipisinisi i le atunuu e le o tusa ai ma ala o le tulafoino, ina ia mafai ai ona galulue le malo e saili auala e foia ai nei faafitauli.

Na taua e le afioga i le matua ia Togiola Tulafono i luga o lana polokalame i le faaiuga o le vaiaso na tea nei, e le mafai e le malo ona faatino na o ia ana tiute pe afai e le lagolago atu i ai le atunuu, ma o ia saunoaga mai le alii kovana, e le o se taimi muamua lea ua ia faalele ai ao faafofoga le atunuu, aemaise lava pe afai e i ai ni mataupu e laga atu e tagata i luga o lana polokalame, e tuuaia ai faiga faaalatua o loo maitauina i nisi o pisinisi ma faleoloa o loo pulea e tagata mai fafo e pei o tagata mai Asia.

O lea mataupu na laga e se tama ona o nisi o tagata faigaluega i faleoloa o loo pulea e Saina ma Kolea, e le o totogiina ni a latou lafoga i le malo, ae o loo totogi i latou i tinoitupe.

Fai mai le faasea a le tootoo lea, o loo pologa le atunuu e galulue ma tipi lafoga mo le malo, ae o lenei lava e ola fiafia i latou nei e aunoa ma so latou sao mo le malo, ae o loo soli ai le tulafono tau lafoga.

Fai mai le tootoo lea, ua fai soo lava le amio lea a tagata mai Asia, o le galulue i auala faasolitulafono ina ia maua ai tupe e lafo i o latou aiga i Asia.

“Ua tatau ona silasila toto’a i ai le malo i lenei mataupu ma fai i ai se faaiuga ina ia taofia ai le toe faia o nei faiga le sa’o,” o le saunoaga lea a le tootoo, peitai na saunoa Togiola, e taua le mataupu ae manaomia fo’i le faailoa o nofoaga o loo i ai faleoloa o loo tuuaia, ina ia faigofie ai i le malo ona faatino a latou tiute.

E ui e lei taua e le tootoo poo fea o loo i ai faleoloa sa faatatau i ai lana faasea, ae i le saunoaga a le alii kovana sa ia taua ai, e le manatu mama le malo i mataupu nei ona o mataupu e matuia, ma e ono aafia ai le tamaoaiga o le atunuu pe afai e faatamala i ai le malo.

E ui na talisapaia e le alii kovana le valaau atu a le tootoo peitai sa ia taua, o se tasi o masani ua maitauina i le atunuu, e fiafia tele e faailoa mataupu faapenei ae mumusu e faailoa o i latou sa maua mai ai faamatalaga.

“Le atunuu e, a tapa atu le malo mo ni faamatalaga mai ia te outou, aua tou te mumusu e faailoa mai tou igoa ma tuu mai ni a outou faamatalaga, e fesoasoani ai i suesuega a le malo pe afai e faagasolo,” o le fautuaga lea a le alii kovana.

Ae ui i tulaga ua taua e nisi o le atunuu i faiga faasolitulafono o loo faia e nisi o pisinisi, na faailoa e Togiola e faapea, e le mafai ona soona o atu le malo ma faia ni suesuega i pisinisi a tagata, e aunoa ma le i ai o ni mafuaaga e faavae ai i luga suesuega.

Sa ia faailoa foi, e i ai au lape o le tulafono e taofia ai le malo mai lo latou nonofo fua ma suesue pisinisi a tagata, e aunoa ma le i ai o ni mafuaaga tatau poo ni mafuaaga e faamaonia ai o loo faia ni gaioiga faasolitulafono.

Na fautuaina e le kovana le tootoo ina ia faafesootai le Ofisa o le Komesina o Leoleo mo le faailoaina i ai o faamatalaga uma e uiga i faleoloa sa ia taua, ina ia fesoasoani ai i le suesuega lea o le a ia fautuaina le Komesina o le Ofisa o Lafoga e faia faasaga i faleoloa ia.