Ads by Google Ads by Google

Mana’omia le So’otaga ma Matua - Auaunaga o le Fanauiti

Na matua lu’ia mai e le sui na malaga mamao mai le National Head Start Program, Ronnie Herndon, “E matua mana’omia le aofia ai o Matua i le a’oa’oga amata o le fanauiti i totonu o Day Care Center, ma aga’i atu ai i le ECE po’o a’oga Fa’ata’ita’i!”

“Ou te le’i fa’alogo lava i se matua o fa’apea mai ia te a’u, Ou te mana’o e valea la’u tama!” O se tala lea na saunoa i ai lea sui iloga i le polokalama fa’ataoto e amata ai ona a’otau le tamaititi i so’o se tomai e agava’a ai.

Ia i ai se so’otaga o le a’oa’oga o le tamaititi ma ona matua ma le nofoaga o tausia fa’apitoa ai ae alu le tina ma le tama e faigaluega. Pe afai e mae’a le itula e tausia ai i lea nofoaga, ia malamalama le tina ma le aiga o le tamaititi, i polokalama ma mea sa a’oa’oina ai le tamaititi i lona nofoaga fa’apitoa i le 8-10 itula o le aso.”

“Afai e malamalama matua, ona mafai lea ona latou soso’o lea galuega lelei, ma ia toe sau le tamaititi i le taeao e soso’o ai, o lo’o fiafia mai e toe fa’aauau fo’i lona nofo ai i le Day Care, ma toe faia nisi galuega fa’atino fou, pese nisi pese fou, fiafia fa’atasi ma isi tamaiti, ae sili lava, ia feso’ota’i lelei ma lona faia’oga laumata fiafia ma le tausa’afia ona uiga!”

O le amataga fou lea ua fa’ataoto nei, ia atoa le ata po’o le li’o o le olaga a’oa’oina o fanau iti, ia so’otaga lelei ma lona amata a’oa’oina ai le vasega ECE, ma fa’asolo atu ai i le Level K5. “O lea ua faia fa’atasi le a’oa’oga lenei mo le ECE ma le Day Care Centers ina ia taugalemu i mafaufau ma loto o i latou uma nei e aofia i le tausiga lelei o fanauiti, e ao ina feso’ota’i fola o lea auaunaga mo le fanauiti.”

“O le atoaga, o le tamaititi ua lava saunia, ae ua amata lalaga fo’i lona ola a’oa’oina a’oga maualuluga ma Kolisi, e ao ina faia ni asiasiga i nofoaga o Kolisi, ia loto le tamaititi e fia o’o i lea sini a’o itiiti mai!”

“O lea la’asaga e le’i o’o i ai le lalaga a le Polokalama lenei, ae o lea ua fa’ailoa mai, e ao ina amata fa’atepa taula’i i ai le tamaititi i lona la’ititi lea, ia vave ona fa’amoemiti o ia i miti tetele ma mea maoa’e e ao ina au i ai lana sailiga!”

 O Ronnie Herndon, o le taitaifono ma le Peresetene o le Head Start Program lea e fa’aaoga uma e le ECE e fa’atino aga’i i ai ana galuega e o’o i fa’amaumauga ina ia toe mafai ona pasia le alagatupe e fa’atautaia ai a’oa’oga ECE i lea tausaga ma le tausaga fa’aletupe. Lea ua matua sau lava, aua ua si’itia mai le alafua i lenei tausaga, ua ao ina ausia le 50% o i latou e faia’oga i ECE ua mae’a umia le fa’ailoga BEd i le faia’oga ECE.

O se la’asaga e le’i agava’a ai Amerika Samoa i le taimi nei, ae ua mae’a galulue aga’i atu i ai, ma ua tatau ai ona fa’atelevave lea fuafuaga. Fa’afetai la ua a’apa mai le Komisi o A’oa’oga Amata a le Kovana mo Fanauiti, ma ua fa’atelevave e le susuga le Ta’ita’ifono Maryann Tulafono lea polokalama ina ia fua mai ni fua lelei e le’o toe mamao.

Pe afai ae ausia lea tulaga, ua tatau ai ona toe sailia fa’atele atili le tinoitupe mo le a’oa’oga o fanauiti i nisi tausaga a’oga o lumana’i. O le tala mai, e matua ‘ese’ese le aofai o le seleni mo le a’oa’oga o fanauiti i fafo ma i’inei. “O le taimi nei e na’o $1,500. mo le tamaititi i le tausaga a’oga, ae o le taimi nei i Amerika, ua o’o i le $12,000. mo le tamaititi i le tausaga atoa.”

O lona uiga, e tusa ai ma le tautalaga a Herndon, “E tatau ona si’itia mai le mea o i ai, ma e i ai ala e tatau ona fa’aulu atu ai le talosaga fa’apitoa, uia le Region 9 ma fa’ao’o atu ina ia pasia mai, ma e tatau ona i ai se vaega o lea si’itaga ma le tupe aofai, e fa’auia i nofoaga o tausia ai fanau a’o le’i ulufale i a’oga ECE, po’o Day Care ia, aua o lo’o amata ai a’oa’oga o fanauiti, i lena vaega o le tautua.” O se fiafiaga sili lea pe afai o le a si’itia fo’i le totogi mo le tausiga fa’aleleia o fanauiti, aua e le o toe taugofie ma e faigata lava le va’aiga o fanau ia lelei ma atoatoa e tusa ai o aiaiga fa’ataoto o lea polokalama a le Malo tele.