Mana’omia LBJ le fa’aauau pea o le lafoga 2%

Na taua e le Ta’ita’ifono o le Komiti Fa’afoe a le LBJ ia Leilua Mase Akapo i luma o le Senate ananafi e fa’apea, e matua manaomia lava e le falema’i le tupe lea o lo o maua atu i le lafoga o totogi e 2%.

 

O lea saunoaga a Leilua na tuuina atu i luma o le komiti o le Soifua Maloloina a le Senate, i se iloiloga sa fesiligia ai sui o le falema’i i ni isi o fa’afitauli ma faasea mai le atunuu ma tagata faigaluega e faatatau i le auaunaga a le falema’i.

 

O le afioga i le alii senatoa ia LeAtualevao Asifoa na lagaina lenei mataupu, ina ua fesiligia sui o le falema’i, pe ana faapea e leai le tupe o lo o maua mai i le 2% lea o lo o tuuina atu e le malo i le falema’i, lona uiga ua leai se falema’i.

 

Saunoa Leilua e faapea, e taua tele le tupe o lo o maua atu e le falema’i mai le 2%, e fesoasoani ai i ni isi o manaoga tau tupe o lo o manaomia e le falema’i. Ma o lea tupe e fesoasoani i ni isi o manaoga tau tupe o lo o tula’i mai i le falema’i i le taimi nei, e aofia ai tupe e faafetaui ai tupe mai le polokalame a le Medicare (matching fund).

 

Na faailoa e le afioga i le alii senatoa ia Galea’i Tuufuli i sui o le falema’i e fa’apea, o lea ua faaulu i le maota o sui se pili e aveese pe taofi ai le toe faaauauina o le lafoga 2%.

 

O suiga o lo o faia i totonu o le falema’i i Fagaalu, o le isi lea mataupu na tele i ai fesili a ni isi o afioga i senatoa.

 

Na fesili le afioga i le alii senatoa ia Laolagi Fonoti Savali Vaeao ma ia faaalia ni isi o faasea ua oo mai i lona ofisa, e faatatau i se suiga sa faia e le pulesili o le falema’i i le Faatonusili ma le Sui Faatonusili o Tagata Faigaluega a le Falema’i, lea sa muamua galulue i lalo o konekarate, a’o lea ua suia e avea ma tagata faigaluega tumau.

 

Saunoa Laolagi e faapea, o se tasi o faafitauli e faatatau i le mataupu lenei, o lea ua suia le tulaga ua galulue ai tagata faigaluega nei e toalua e pei ona fesiligia ae o lo o tumau pea o la totogi talu mai le taimi na galulue faa konekarate ai.

 

Na faamaonia e Leilua le faafitauli e pei ona fesiligia e Laolagi, sa talia e le Komiti Faafoe le fautuaga a le alii pule ia Joseph Davis-Fleming ina ia avea i laua nei ma tagata faigaluega tumau, ina ua tuana’i masina e 4 talu ona la galulue, ma maitauina ai tulaga lelei i le faatinoina o a la galuega.

 

Pau le tulaga faaletonu sa faia e Davis-Fleming e aunoa ma lona fesiligia o le Komiti Faafoe e pei ona saunoa Leilua, o lona faatumau lea o totogi o tagata faigaluega nei, peitai o lea faaletonu ua maea ona toe faaleleia.

 

Saunoa Magalei Logovii e faapea, o se tasi o faafitauli o lo o ia maitauina i le taimi nei, e le o lava foma’i o lo o umia faailoga maualuluga ma i ai le tomai fa’a foma’i e mafai ai ona latou faatinoina le auaunaga o lo o manaomia e le atunuu.

 

Mo se faataitaiga o le taimi e tuuina atu ai vailaau ma fualaau i se gasegase, e le mafai ona faia e se tama’ita’i foma’i se’i vagana ua fesiligia foma’i ua agavaa, ae ana toatele foma’i ua agavaa i le faatinoina o lenei tautua, e le tupu lea faaletonu.

 

Na fesili le alii senatoa ia Faumuina Tagisiaalii, pe faamata e le i oo i le taimi ua tatau ai ona tu maoti le falema’i, ina ia mafai ai ona faaleleia lana tautua mo le atunuu.

 

Saunoa Faumuina e faapea, o le tele o faafitauli o lo o tutupu i le falema’i i le taimi nei, e le gata e le o lelei le itu tau tupe, e le o lelei le sailiina mai o foma’i, ae oo lava fo’i i le puleaina o le falema’i e le o lelei fo’i.

 

Ae na saunoa Leilua e faapea, o le tele o faafitauli e pei ona aafia ai le falema’i, o faafitauli na tutupu i tausaga ua mavae, peitai o lea ua galulue le pulega ma le komiti fou ua i ai e faaleleia le tele o nei faafitauli.

 

Mo se faataitaiga o le tele o fuafuaga ma ta’iala na faataoto mai le tele o tausaga e pei o le fausiaina o se falema’i fou atoa ai ma le siitia o le tulaga o lo o i ai isi auaunaga a le falema’i, peitai e leai se mea na mafai ona faatinoina sei vagana ai le tele o faamaumauga ae leai ni galuega faatino.

 

I le faaiuga o le iloiloga, sa fautuaina ai e le afioga i le taitai komiti ia Mauga Tasi Asuega sui o le falema’i, ina ia ave la latou faataua i mataupu ua laga e senatoa atoa ai ma soifua o le atunuu, ae aua le manatu mama i ai.

Comment Here