Ads by Google Ads by Google

Mana’omia Finagalo Fa’aalia o le Atunu’u

FA’AMAU FAAILOGA ITUAIGA O ‘AMU E 12 UA AMATA ONA MOU ATU MAI O TATOU GATAIFALE

 

O le afiafi ananafi, sa fa’atautaia ai se fonotaga e aloa’ia ai ni finagalo fa’aalia o le atunu’u atoa e tusa ai o le 12 o Ituaiga o Amu ua amata ona le toe va’aia i o tatou gataifale mai le 66 o ‘Amu ua fa’amauina.

 

“O nei ‘amu e leai fo’i se isi atunu’u o le Pasefika ua matauina o ola ai, ae ua fa’ato’a va’aia lea o le tele o nei ‘amu eseese i le gataifale o le Laufanua Fa’asao i Ofu ma Sili i Manu’a.” O se tala lea sa fa’ailoa mai e le ali’i saeanisi mai le Iunivesite o Stanford lea sa o mai mamao a latou saeanisi e sailiili ituaiga o amu o lo’o ua olaola lelei nei i o tatou a’au i le gataifale fa’asao i le Manu’atele.

 

Mai lea su’esu’ega lava, sa matauina ai, o ogasami e matua leai nisi o alaala i ona laufanua, lea e matua matagofie le ola ai o ‘amu nei, ae o gataifale fo’i o lo’o tumutumu i tagata o fa’amautu i ona laufanua, lea e le o maua ai, pe tau le ola lelei ai.

 

Mai le 66 lea o ituaiga o ‘amu e 59 o nei ‘amu o lo’o matauina i atumotu o le pasefika, ae na’o le fitu mai le Atu Karipiana. E 12 o nei ituaiga o ‘amu i le vasa pasefika ma le Karipiana ua fa’amautuina, ua amata ona mou vave atu ai, pe ua fa’aititia televave na’ua, ma ua tatau ai ona faia se galuega e toe fa’atumau mai ai.

 

Ua fa’ailoa mai, o le afuaga tele lava, o le fa’ateleina lea o le Kaponitaiokisai [C02] i le etimosifia o le lalolagi, ua fa’avave ai ona le toe maua nei ‘amu. O lona uiga, ua fa’avevela atili le suasami ona ua tele na’ua le pasene o le C02 i le etimosifia, ma ua le toe te’a vave lea vevela ae ua taofiofia mai pea, ua so’ona vevela ai le fogaeleele ma le sami, ona le tatau ai lea ma le vevela o le suasami e ola lelei ai ‘amu nei.

 

O ituaiga ‘amu nei o le a mou atu, e vave tele lo latou mamate i le so’ona vevela ma le so’ona o’ona fo’i o le suasami. O le taumafaiga lenei o le a faia mo le fa’asaoina o nei ‘amu e 12 o le a mou vave atu,  e le taofia ai fua faigafaiva e masani ai mo se i’a e taumafa, po’o faigafaiva fa’atauva po’o ai e sili ona lapo’a lana i’a e maua, ae matua taofia ai ituaiga faiva e fa’apapa ai ni fana’ia e maua ai le tele o i’a, o le ‘ava niu kini e fa’aona ai i’a, o le fa’aaoga o isi vaila’au o’ona e fa’aona ai i’a ae opeopea, ma faiga fe’e e ta’ei ai le amu o le a’au.

 

O isi gaoioiga e matua fa’asaina lava, o le ‘ave’esea lea o le amu e faia ai vali o falesa lea e masani ai i tatou aso anamua, po’o le ‘avea fo’i e fa’atau atu i nisi mai fafo, ae ua na’o le taofiofi lava o le fa’aleagaina o le sami mai le fa’alapisi ma le taetafe atu i ai o le tele o le palapala mai timuga ma lologa e a’afia ai atumauga ma laufanua o le atunu’u.

 

Pe afai ae mae’a fa’apupula atili mai ia mataupu i le mamalu lautele, o le a i ai se avanoa e fa’ao’o atu ai sou finagalo fa’aalia e ala i tusitusiga i laupepa e meli atu, tusia i le emeli po’o le uepesite ua fa’aailoa i lalo, ma le numera fo’i o le fax e fa’ao’o atu ai lou taofi. I latou uma e auai, e fa’afofogaina sou finagalo fa’aalia e fa’amauina fo’i i ata video lea tulaga.