Ads by Google Ads by Google

Mana’omia e le malo vaega a matua i le a’oa’oina o fanau

O se tasi o lu’itau ua fa’atula’i e le malo e pei ona faalauiloa i le ripoti a le alii kovana sili ia Lolo Matalasi Moliga ua tuuina atu i luma o le Fono Faitulafono, o le fautuaina lea o matua ina ia faatino la latou faiva alofilima, e ala i le fesoasoani lea i le a’oa’oina o fanau a’o i ai i latou i totonu o aiga, ina ia fesoasoani ai i le pito laau a faiaoga o lo o faatino i totonu o potu aoga.

 

O lea fuafuaga e pei ona taua e Lolo i lana ripoti, o se tasi lea o fautuaga mai le tele o fautuaga ua faataoto e le Matagaluega o Aoga ma le malo, e faamalosia ma faaleleia atili ai aoaoga mo fanau i le lumana’i.

 

O isi fuafuaga faataoto e pei ona taua i le ripoti, e le o fanau uma o le atunuu e tatau ona aooga i aoga a le malo, ae tatau ona faatulaga e le ofisa o aoga polokalame e mafai ai ona galulue soosoo tauau ma aoga tua, e ala i le sailia o alagatupe fesoasoani mai fafo (federal grants), ina ia fesoasoani ai i manaoga tau tupe o lo o feagai ma aoga tua.

 

Ua fautuaina e le alii kovana le faatonusili o aoga a le malo ia Vaitinasa Dr. Salu Hunkin-Finau, ina ia faia ni a latou fonotaga ma aoga tua ina ia mautinoa e tuuina atu e le malo fesoasoani talafeagai mo vaega o lo o manaomia e aoga tua i le aoaoina o fanau.

 

I le fautuaga ina ia aofia le gagana Samoa i le aoaoina o fanau aoga o lo o i le vasega K-5, ua fautuaina e le alii kovana le faatonusili, o se tulaga lelei le tofia o se vaega faapitoa latou te suesue atili i vaega uma e moomia mo lenei faamoemoe, ina ia mafai ai ona i ai se polokalame e aoaoina ai faiaoga mo le faaaogaina o le gagana Samoa e aoao ai fanau aoga i totonu o potu aoga.

 

Na taua e Lolo e faapea, o lo o fuafua e le malo le tuuina atu o se tulafono i le Fono, e faataga ai le faaaogaina o le gagana Samoa e aoao ai fanau aoga amata mai i le K-5 e o o atu i le Vaega 5 laiti, ina ia faa faigofie ai e fanau ona fesootai i le gagana Samoa a’o aoaoina ai i latou i le gagana faaperetania.

 

O ni isi o tulaga e pei ona galulue i ai le malo i le taimi nei mo le faaleleia atili o aoaoga a fanau, e le gata o le faamalosia lea o faiaoga ina ia ausia aoaoga maualuluga ma lelei, ae tatau fo’i ona unaia fanau i a latou meaaoga ma mataupu o lo o aoaoina i potu aoga, ina ia siitia ai tulaga o togi o lo o latou maua mai vasega faauu faapea ai le Kolisi Tuufaatasi.

 

Na taua e Lolo le tulaga lelei o le polokalame sa faia e le malo i le tausaga na tea nei, o le fesoasoani lea o ofisa ma tagata faigaluega i le faaleleia ma le faamamaina o faleaoga eseese uma i totonu o le atunuu, aemaise ai o le faamautuina pea o le manulauti a le faigamalo, e leai se tamaititi e le tatau ona le alu i le aoga, aua o fanau o le lumana’i lea o le atunuu, aiga ma le malo i le lumana’i.