Ads by Google Ads by Google

Mana’o Tri Marine avea teritori nofoaga autu fefa’atauaiga

E leai se isi manaoga sili o loo nonofo ma le pulega o le kamupani i’a a le Tri Marine, nai lo le avea lea o Amerika Samoa ma nofoaga autu o ana fefaatauaiga i i’a ma ana va’a fagota, aemaise ai o le tatalaina ai lea o le isi ona lala e pei ona o latou faaaogaina ai le nofoaga tuai sa i ai le kamupani o le COS Samoa Packing ua tapunia.

I le asia mai ai o le teritori i le vaiaso na te’a nei e le alii pule, o ia foi lea o le peresetene o le Tri Marine ia Renato Curto ma nisi o lana au taupulega, na maua ai se avanoa e feiloa’i ai ma taitai o le atunuu mo le talanoaina lea o nisi o fuafuaga mo le agai i luma o le tautua a le kamupani.

I lana saunoaga i luga o lana polokalame i le faaiuga o le vaiaso na te’a nei, na faamanino atili mai ai e le alii kovana le autu o lenei asiasiga atoa ai ma le faanaunauga e fia faalautele le tautua a le Tri Marine i tulaga o ana va’a fagota.

“O nisi o nofoaga na asia i le asiasiga lenei e aofia ai le nofoaga lea o loo fuafua e fausia ai le Faleaisa a le kamupani lea ua toeitiiti maea ona fausia i le taimi nei, atoa ai ma le nofoaga autu o loo i ai le mea tosova’a i Satala, ona o le faanaunauga lava o le alii peresetene ia Curto ia mautinoa e lava le malosi ma le lelei o le mea tosovaa mo le siakiina ma le tautuaina o ana va’a fagota, pe afai e aumaia i Amerika Samoa nei,” o le saunoaga lea a le afioga i le matua ia Togiola Tulafono.

Saunoa Togiola, afai e faamalieina loto o le pulega a le Tri Marine i le tulaga o loo i ai le auaunaga a le vaega tosovaa i le taimi nei, o loo i ai lo latou faanaunauga e aumai uma a latou va’a fagota e lipea ma toe faaleleia iinei.

“O le kamupani lenei e le gata latou te la’uina atu le aano o le i’a fou i maketi i fafo, ae latou te tuuapaina foi le i’a i totonu o apa faapea ai ma le faia o a latou vaa fagota e fagota mai ai le i’a, e le tasi e auaunaga a le kamupani lenei o loo i ai, e 10 foi a latou vaa fagota o loo lesitala i Amerika Samoa i le taimi nei,” o le saunoaga lea a le alii kovana.

Na taua e Togiola le faafiafiaina o lona loto i le tulaga sa i ai le asiasiga a le pulega a le kamupani, ma ua ia faalogo foi i tala sa tulaga lelei la latou feiloaiga sa faia ma le pulega o le vaega toso vaa i Satala e aofia ai le susuga ia Carlos Sanchez ma lana komiti faafoe.

E ui e toatele le atunuu sa latou fesiligia le fuafuaga a le malo ina ia tuu mai i lalo o le malo le faafoeina o le mea tosovaa i Satala, peitai na saunoa Togiola e faapea, o le autu tonu lava lea na ia manatu ai e aapa atu le malo e toe faaleleia lea auaunaga, ona o i le isi auala e mafai ona maua mai ai se isi vaega tupe tele mo le atunuu, pe afai e tele vaa fagota e agai mai e aumai a latou vaa e toe lipea ma faaleleia atu i Satala.

“Afai e lelei le tatou mea tosovaa ma tele vaa fagota o le a aga’i mai i Satala, e le gata o le a tele tupe e totogi mo le toe lipeaina o a latou va’a, ae o le a maua ai foi ma galuega mo i latou o loo galulue i le mea totovaa.

Saunoa Togiola, o le faanaunauga autu o loo i ai i le pulega a le Tri Marine, afai e lelei ma taunuu fuafuaga uma mo lana falei’a, o le a avea loa le falei’a lenei ma nofoaga autu e la’u mai ai i’a uma e maua e vaa fagota a le kamupani ma teu ai, ma mafai ai ona faasoasoa atu i isi atunuu o le lalolagi o loo manaomia e pei o Amerika ma Thailand.

“Mo se faataitaiga afai e toso se va’a fagota e toe lipea i Satala, o le taimi lava e uma ai ona lipea va’a lea, ona agai atu loa lea o le auvaa mo le faia o a latou faatau mo mea e manaomia ona ave i le isi malaga, utu le latou vaa, aemaise ai o le a totogi fale talimalo e nonofo ai iinei, ma o nei mea uma o tupe lava e faaalu e totogi ai, o lona uiga o le isi lea alagatupe tele o le a sasa’a mai i le teritori ma manuia ai pisinisi, tagata faigaluega aemaise ai o le tamaoaiga o le atunuu, o le autu moni lena o nei taumafaiga uma, ia mafai ona fesoasoani i le toe unaia o le tatou atina’e ma le tamaoaiga,” o le saunoaga lea a le alii kovana.

O le taimi nei, e silia i le toa 40 tagata o loo galulue i le Tri Marine mo le faamamaina o le aano o le i’a lea ua auina atu i maketi i fafo e faatau ai, ma o nisi o i’a nei o loo faatau atu e le aufai va’a fagota a le atunuu i le kamupani.