Ads by Google Ads by Google

Mana’o le kovana i le $18 miliona mo le LBJ

Ua manino i le tusi sa tuuina atu e kovana Togiola Tulafono i taitai o le fono e vala’auina ai lana Fono Faapitoa mo le vaiaso nei, lona naunau pea ina ia faasoasoa atu le aofaiga e $18 miliona e fesoasoani ai i galuega ma le tautua a le falemai i Fagaalu, le LBJ.

O lea vaega tupe e aofia ai le nonogatupe e $8 miliona lea o loo ia fuafua e nono mai i Teugatupe a le Litaea, e ui o lea ua faia le faaiuga a le Senate ina ia teena le tulafono, faatasi ai ma le $10 miliona lea o loo ia fuafua e maua mai pe a sii lafoga i oloa e pei o le sikaleti ma le ava malosi, sii le totogi o laisene o pisinisi, lafoga tai $2,000 e totogi e pisinisi uma lava, atoa ai ma le toe faaopoopo lea o le isi lafoga i totogi e 2%.

I luga o lana polokalama i le faaiuga o le vaiaso na tea nei, sa ia faamatalaina ai le mafua’aga o lona vala’auina o le Fono Fa’apitoa, e pei ona i ai le malosi faa kovana o lo o taua mai i le Faavae.

Saunoa Togiola, ina ua taunu’u atu i lona ofisa i le aso Faraile na tea nei, sa ia maua ai se faamatalaga i le alo atu lea o le Fono Faitulafono i lana malologa masani, ae lei maua mai ni faaiuga e tusa ai o ni fofo ma ni fesoasoani e foia ai le faafitauli o loo loo tulai mai i le falema’i.

Sa ia taua lona taumafai e faafesootai taitaifono i le aso Faraile na tea nei, peitai e telefoni atu ua taape uma, o lea na ia tusia ai loa se tusi ma tuuina atu i ai ina ia nofoia le fono faapitoa i le vaiaso nei.

Fai mai Togiola, e  malamalama lelei lava o ia e le faigofie le toe foi atu o faipule ma senatoa i le fono faapitoa lea ua ia valaauina, peitai e pei lava ona naunau atu o Iakopo i le agalu i le taimi sa la fagatua ai ina ia faamanuia atu ia te ia, e faapena foi lona naunau atu i taitai fono ina ia toe foi mai, e galulue mo le sailiina lea o se fofo o le faafitauli o loo tulai mai i le falemai.

“O la’u tatalo le fono faitulafono, aua le tuu lafoaia le falema’i ina ne’i tutupu mai ni faalavelave i taimi o le malologa, ona oo mai ai lea o faafitauli ma pagatia ai tatou uma,” o le isi lea saunoaga a le alii kovana,.

Sa ia taua foi le amata faaitiitia o itula faigaluega a tagata faigaluega a le falema’i, ma o se tulaga pagatia lea o le a oo i ai tagata faigaluega a le falemai, e pei foi o le tulaga pagatia sa oo i ai le vaega faamalosi tulafono a le malo, ina ua faaitiitia itula faigaluega a tagata ona o  tulaga faaletonu i tupe maua a le malo.

“Ou te manaomia le tatau lea ona toe faafoi uma o itula faigaluega a tagata o le falemai i le tulaga tuai sa i ai muamua, pe afai e maua mai se fesoasonai mai ia te outou, aua ou te iloa, ou te lagonaina foi le tiga ma le mafatia o le tulaga lea ua oo i ai le falemai, aua sa oo ai fo lenei vaega o le malo, ma, e momomo ai lava le agaga pe a vaavaai atu i nai aiga e le lava le faasoa ae ua faaitiitia lava o latou totogi ma itula faigaluega, ma faapena ona aafia atu ai ma o latou aiga ma tagata tausi, o le mafuaaga lena e manaomia ai le toe foi mai o le fono sei taumafai ni faaiuga i pili ua ou tuuina atu, ina ia taofia ai le tulai mai pea o faafitauli nei ae toe faafoi atu galuega a le falemai i le tulaga  masani sa i ai,” o le saunoaga lea a le kovana i luga o lana polokalmae.

O pili tupe ia o loo taua e le kovana e faatupe ai le $10 miliona mo le falemai, ua maea ona faia i ai le faaiuga a le Senate i le tausaga na tea nei, o le a taoto uma i le komiti e le faia i ai sa latou faaiuga.

O le lagona o le Senate, e le tatau ona toe faaeeina atu se isi avega i luga o le atunuu ona o faafitauli o loo tulai mai i le falemai, e mafua mai ona o le faatamala o le malo.

Ae mo le nonogatupe e $8 miliona lea ua faamoemoe le kovana e faatupe mai e le Vaega o le Litaea, ua maea ona tuuina atu se molimau a le Vaega o le Litaea i luma o le Fon o i le vaiaso na tea nei e uiga i le mataupu lea, ma ua latou taua ai lo latou le lagolagoina o lea nonogatupe.

Fai mai le Vaega a le Litaea, latou te le gafatia ona toe faia se isi nonogatupe mo le malo i le taimi nei, ona o loo tau totogi isi nonogatupe e lua a le malo na fai mai i le 2006 ma le 2008.

O le 2006 na nono mai ai e le malo le $10 mai le Litaea ae tuu atu i le falefmai, ma o lea nonogatupe o loo totogi e le Kamupani Fai Telefoni a le ASTCA, ae o le isi nonogatupe e $20 miliona lea na fai i le 2008, sa faatupe ai nisi o galuega sa manaomia e le malo i lena taimi, ma o loo totogi atu i le lafoga lea o loo maua mai e le malo i le ava malosi ma le pia.

I faamaumauga sa tuuina atu i luma o le fono mai le Vaega a le Litaea na taua ai, toe $7 miliona ma ona tupu o loo totoe i le nonogatupe e $10, ae toe $13 miliona tupe o loo totoe mai le nonogatupe e $20 miliona a le malo.

O lea ua pasia ma sainia e le kovana le  tulafono e faasoasoa atu ai le $3 miliona mo le LBJ, lea e nono mai i Teugatupe o Taui mo Tagata Faigaluega ma le faamoemoe e toe totogi mai i le tupe o le a maua mai i le lafoga o totogi e 2% lea ua faaopoopo i le 4% o loo i ai, peitai o lea ua finagalo Togiola ina ia toe faaopoopo se isi 2% e fesoasoani ai i le toe totogiina o le nonogatupe e $8 miliona, ma o lea manatu e le o taliaina e le Fono.