Ads by Google Ads by Google

MALO SAMOA LE FAI MEA MAFAI, O OE O LE USO

E leai se isi upu e mafai ai ona tuu faatasi lagona faagaeetia o le taitai o le teritori o Amerika Samoa ma ona tagata, nai lo le ‘FAAFETAI’ e momoli atu i le Ao o le malo o Samoa ma ona tagata, e tusa ai o le tulaga maualuga sa i ai polokalame o le faamanatuina o le 50 tausaga o lona aso fiafia i le vaiaso na tea nei.

“Seki a Samoa sole, makua ‘okay’ lava le moku i le eva alii, e fai o le magagaia o auala, o fale ae kuu aku foi i le polokalame o le fu’a, makua 100% lava mea uma,” o nisi ia o tala na gagana i ai nisi o au malaga a Amerika Samoa na malaga atu i Samoa, ina ua fesiligia e le  Samoa News i ni o latou e uiga i le fu’a a Samoa.

O nisi o itu na maofa ai au malaga a Amerika Samoa, o le lelei lea o le tapenaina o polokalame uma o le sisiga fu’a, e fai o le matagofie o savali faaaloalo, mananaia toniga a au savavali, ae oo foi i faafiafiaga e aofia ai le koneseti a le UB40 na matua matagofie lava i le maimoa a le toatele.

“O oo fo’i i faailoga kupe o kauvaga sa fai e makua’i seki lava, e fai o le kekele ae sa lava kapega le komiti i faailoga faapikoa e pei o ipu mo au sa magumalo,” o le tala fiafia lea a le susuga ia Lomitusi Filoiali’i, lea foi sa malaga atu ma lona faletua ma o la alo e toatolu e maimoa i le faamanatuina o le fu’a a Samoa.

FA’AFIAFIAGA:

Sa na o le sioa o le au maimoa fa’apea ai taitai ma valaaulia i Samoa ao fuli au fa’afiafia mai Amerika Samoa nei e fa’atino ana fa’afiafiaga, aua sona sao mo le fa’amanatuina o le 50 tausaga o le fu’a a Samoa i le vaiaso na te’a nei.

E le gata i fa’afiafiaga na vaaia ai le mataina o tapenaga a Amerika Samoa, ae oo lava foi i ana au ta’aalo sa auina atu na matua iloga lava ona fo’i mai ma le mea atoa, ina ua suipi le au kirikiti a Vatia i le siamupini, ae sosola mai le au fusu ma le Ipu a le alii Palemia, o le faailoga o le manumalo.

O le ulua’i faafiafiaga a Amerika Samoa lea na tapena i ai le au siva mai Vailoa-tai, na matua laulogo ai le malae i Tiafau i le tali e ma le pisapisao o tagata, ona o le malie ma le agaeseese o tifiga a faafafine sa o latou faatinoina siva eseese e aofia ai ma le siva tau a le Manu Samoa.

O le tautua a le TV3 lea na vaavaalua ma le KVZKTV na mafai ai ona silafia e le atunuu gaioiga eseese o lea faafiafiaga, e oo lava i gaioiga a le aumaimoa ma a latou tala na tau valaau ane ai i le au faafiafia a Vailoa-tai na mafai uma ona maimoa i ai Tutuila ma Manu’a, i lagona fiafia ma le faagaeetia o le faitau selau ma selau o tagata sa latou molimauina faafiafiaga a Samoa.

O le isi faafiafiaga na mataina i le maimoa a Samoa o le siva faaleaganuu a Aasu aemaise ai o le pese faaleaganuu a Alataua.

O nisi o upu sa faaaogaina e Alataua i lana pese faaleaganuu na atili ai ona malie le pese i le faalogologo, aemaise ai lava nisi o viiviiga i le va o taitai o malo e lua, le susuga ia Tuilaepa Sailele Malielegoi ma le afioga i le kovana sili ia Togiola Tulafono.

O nisi o fatuga e aofia ai viiviiga o laufanua, tulaga ua i ai atina’e i totonu o Samoa, aemaise ai o faamanuiaga o loo tafe mai i Asia, lea ua mafai ai ona oaoa Samoa i nisi o faamanuiaga e pei o atina’e i fale ma alatetele, aemaise ai pisinisi ma oloa o loo auina atu i fafo

O le agaga faafetai a le malo o Samoa mo Amerika Samoa, na faaleo lea e le afioga i le alii Minisita ia Tolofuavalelei Leiataua Falemoe, o ia foi lea o le Sui Taitaifono a le Komiti o le Fu’a i lana saunoaga e faaiu ai polokalame o le sisiga fu’a, ma tuuina ifo ai loa i lalo le tagavai a le malo o Samoa i le aso Lua na te’a nei (taimi Samoa), ae o le aso Gafua lena i Amerika Samoa nei.

Na oo lava foi i luga o upega o fesootaiga a le malo o Samoa (www.samoa.travel) na faasalalau ai foi e le malo o Samoa lana faafetai mo Amerika Samoa. e pei ona i ai fuaitau e faapenei, “Faafetai Amerika Samoa mo lou sao, o lou auai mai i le faamanatuina o le 50 tausaga o lo’u malo tuto’atasi, o se lagona e le mafai ona toe faagaloina.”

O le faaauau ai pea o le va fetaaloloa’i o Samoanalua i soo se aso faamanatu o le isi malo i le isi malo, ua atili faamaonia ai le upu o loo pepese ai soo se Samoa i soo se tulimanu o le lalolagi, “O Samoa o le uso e tasi.”