Ads by Google Ads by Google

Maliu SFC Penelope Vai’au Mulitauaopele— Ft Lewis

E ui ina o lo’o fa’aauau su’esu’ega mae’ae’a a le US Army e tusa o le maliu o lenei Fitafita Amerika Samoa i Fort Lewis, ae ua tu’ua lo tatou malo anapo e ona matua, Ret. USAF MSgt Vai’au, Kitara & Etevise Vai’au, ina ia o’o atu e tali i puapuaga o le motusia o le mafutaga ma le fanau e ala i le oti a’o tiute i Fort Lewis, Setete o Uosigitone.

O SFC Vai’au Mulitauaopele, Penelope na maliu i le aso 16 o Iuni, 2012.

Ua fa’ailoa mai e Kitara Vai’au, “E i ai se fa’aletonu o le malaga fa’afuase’ia o lo’u afafine, aua ua toe maliu atu ma lona to’alua, ma o lo’o fa’aauau pea sailiga a le Army latou pe tua ma ni a, ae ua iloga mai, ua maliliu uma i la’ua ma le to’alua, Ronald Mulitauaopele.”

O Penelope Vai’au Mulitauaopele, o le lona lua lea o le fanau ua auai i le Vaega Au, ma ua atoa fo’i le 10 tausaga o lana tautua i le Army. I Fort Lewis lava o lo’o alaala ai fo’i le uso o Penelope, Sgt. Malaia Vai’au, ma ua sauni mai fo’i o ia i le o’o atu o matua i lea nofoaga.

Ona o tulaga o su’esu’ega o lo’o fa’atautaia pea, o le a le fa’ailoa atu ai nisi fa’amatalaga peita’i, ua mautinoa ua maliliu uma SFC Penelope Vai’au ma lona to’alua o Ronald Mulitauaopele.

Pe afai o le a o’o atu Kitara & Etevise Vai’au i Honolulu o le a malaga fa’atasi i latou ma lo la’ua alo o Capt. Filimataisina Vai’au Lafitaga mo Fort Lewis, ona fa’ato’a toe taliu mai ai lea i Samoa nei ma tino maliu o le tama’ita’i fitafita o taua.

Ua fa’ailoa mai i lona soifua tautua ai i le vaega au, e fa’atolu ona malaga e fa’ataunu’u tiute i Iraq ma toe taliu mai ua mae’a lelei. A’o le’i avea fo’i o ia ma fitafita o taua, sa mua’i fa’au’u mai o ia i Fagaitua High i le tausaga 1998.

Na maua le avanoa e a’oa’oina ai Penelope i sana sikolasipi na maua i lona tausaga fa’ai’u lea, peita’i, sa manatu e fa’aauau a’oa’oga i le ASCC ma sa fa’au’u ai i le tausaga e 1999, ma avea e ia le tulaga lua i le vasega fa’ai’uaso lea.

Na maua fo’i le sikolasipi e a’oga ai i le Iunivesite i Chaminade ma ina ua fa’amae’a lona fa’ailoga maualuga Bachelor of Arts sa ulufale loa i le US Army ma tautua ai mo le 10 lenei o tausaga. E le’i mamao atu na maua ai lona si’itaga o lona fa’ailoga i le Sergeant First Class  ina ua ausia fo’i e ia se tasi o ona fa’ailoga “Masters” i ana a’oa’oga a’o fa’aauau tiute i le US Army.

Ua fa’aalia le fa’anoanoa tele o le agaga o le susuga le ali’i litaea mai le Fuava’alele a le Malo Tele, ona o lona afafine e le’i maua lava sona suli e fai ma va’aiga ia i la’ua ma le tina.

“O le teine lava ina tauivi i ona tiute ae le misi ai i ana a’oa’oga, o ia lea e maualuga ana a’oa’oga i le fanau.”

Ua fa’ailoa fo’i e le tama, “E aumaia lava le tino o Penelope Vai’au Mulitauaopele e lagomau i le matou aiga i Alofau.”