Maliu se ali’i ina ua oso ai i luga loli toso container
O le aoauli o le aso Faraile na te’a nei na maliu ai se ali’i ave loli toso container, ona o ni manu’a matuia na a’afia ai lona ao.
Na fa’amaonia mai e le Komesina o Leoleo le maliu o lea ali’i ona o se fa’alavelave tupu fa’afuase’i, ma o lo o fa’aauau pea a latou suesuega e tusa ai o le mea tonu sa tupu.
O le ali’i ua maliu e pei ona taua e ni molimau, o se alii e faigaluega i le kamupani a le Peter E. Reid Stevedoring, o ia o se ave loli i loli o lo o tosoina container mamafa.
Na taua e se molimau sa i ai i le taimi o le fa’alavelave i le Samoa News e fa’apea, o le fa’alavelave na tula’i mai ina ua paka le loli na ave atu e le ua molia i luma tonu o le fale teuoloa a le kamupani o le StarKist Samoa i Satala, lea e fa’afesaga’i ma le Vaega Tosova’a a le malo.
Na oso i fafo ma le loli le ua maliu ma savali i le pito i tua o le loli, ae fa’afuase’i loa ona toe se’e aga’i i luma le loli, ma vaaia ai le tamo’e atu o le ua maliu ma taumafai e tatala le faitoto’a ae oso i totonu e taofi le loli ua see, ae o iina tonu lava lea na tula’i mai ai le fa’alavelave, ina ua see lona vae ma pau ai i lalo, ma oso ai pa’u lapopo’a o lo o i le pito i tua o le loli i lona o lona ulu (tulou).
Na fa’aleagaina le pa o lo o si’omia ai le lotoa a le Vaega Tosova’a ina ua so’a e le loli, peita’i e leai se isi tagata na a’afia po o se ta’avale na lavea i le taimi lea, se’i vagana ai le ua maliu.
Na taua e molimau le lolofi atu o tagata faigaluega a le kamupani i le vaega tonu na tula’i mai ai le fa’alavelave, ma maofa ai le to’atele sa i ai i le matuia o le manu’a na a’afia ai le ali’i ua maliu. Ae o se itu faanoanoa sa maitauina ai, o si ona faletua lea fo’i na matua vaaia le mafatia ina ua taunuu atu ma ia vaaia le fa’alavelave matuia ua tupu.
Na faamaonia mai e se ali’i leoleo ta’ita’i sa i ai i le taimi o le fa’alavelave i le Samoa News tulaga uma o le fa’alavelave e pei ona taua e molimau, ma o lo o fa’agasolo a latou suesuega i le mea sa tupu.
O le loli na mafua ai ona maliu lenei ali’i ua taofia nei e le Ofisa o Leoleo.