Ads by Google Ads by Google

Maliu le pepe 3 masina le matua

O lo’o faia nei su’esuega a le Ofisa o Leoleo i le mafuaaga o le maliu o se pepe e tolu masina lona matua.

 

O lipoti sa maua e le Samoa News sa taua ai le maliu o se pepe i le amataga o le vaiaso lenei. Ma lenei pepe sa i le nofoaga o le “Christmas Day Care” center ae le’i faananati atu o ia e le EMS i le falema’i o le LBJ.

 

Ina ua fesiligia le Matagaluega o Pupuiga Lautele, sa fa’ailoa mai e se sui sinia o le Ofisa o Leoleo faapea lo’o faia nei a latou su’esu’ega i lenei mataupu ma e le mafai ona tuuina mai nisi fa’amatalaga. O lo’o fa’atautaia e le vaega a leoleo i le Leone substation lenei su’esu’ega.

 

Sa fa’ailoa mai e Christina Galea’i o le Ofisa Autu o Tautua mo Fanauiti a le Matagaluega o Alagamanuia ma Tautua Lautele (DHSS), “O le pepe na fa’ato’a maliu mai lava i le falema’i! Sa o atu fo’i le EMS e fesoasoani ina ia fa’ao’o mai o ia i le falema’i.”

 

Ua mae’a fa’amaonia mai e le tina o Feagai Oloi o le Christmas Day Care, “Ioe sa i lana Day Care le pepe lea i le taeao na taumafai ai e fa’ao’o mai i le falema’i, ina ua va’aia e ma’i o ia.”

 

O le tala fo’i mai le fa’auluuluga o le polokalama o Day Care, “Na ala ona talia le pepe e le Day Care ona o le tina o le pepe, e fia o’o mai o ia e talosaga se avanoa e tu’u ai pepe i le Day Care!”

 

Ina ua fesiligia Feagai pe pau lea o le fanau a le tina e ona le pepe lea na maliu, ae fa’ailoa mai, “E leai — e i ai isi tamaiti e matutua atu i le pepe, ma e le o i ai fo’i i le Day Care i latou uma na. Ona o le alofa lava i le tele o mea e tatau ona faia e tapena ai le tina mo le fa’aulu mai o le pepe i le Day Care, ua afua ai ona tu’u le pepe i le Day Care.”

 

O le pepe sa manatu e ave’esea mai le falema’i i le aso Lulu na te’a nei lona maliu, peita’i, sa le mafai ona fa’ataunu’uina lea tulaga mai le falema’i, ae o le aso Tofi lea na fa’ato’a mafai ai ona faia lea tulaga.

 

E le o mautinoa i le taimi nei pe o afea e ma’ea ai suesuega a leoleo i lenei mataupu.