Ads by Google Ads by Google

Maliu le Ali’i Va’a-Folau ma Tagata Tonga

O se ali’i na lia lisia se va’a faila ma sa latou malaga fa’atasi mai ai ma ana uo o tama Tonga e to’a fa e fia o’o mai i Marlborough Sounds ua fa’ailoa mai na maliu i luga o le sami, a’o sau pea lea malaga i luga o le vasa. O lenei ali’i o se papalagi, ma o le va’a sa latou folau mai ai, na lisi mai e lea toeaina ma ua taula nei le va’a i Gisbone.

Na fa’ailoa mai e leoleo, na logo atu le latou Ofisa e nei sui mai Tonga sa i luga o le va’a ma le tama lea, ua maliu le ali’i e 69 ona tausaga, ma o lea ua toe aga’i atu le va’a ina ia taula, ona o lea fa’aletonu. Na to’ai taunu’u lea faigamalaga i le itula e 2:30 i le aoauli i Gisbone.

O le igoa o lea va’a o le “Beviano” ma ua i ai nei le tino o lea ali’iva’a i a’ao o i latou e tapenaina lona tino ma fa’atalia ai le o’o ane o nisi o lona aiga, e tusa ai ma fa’amaumauga o lo’o maua o si tama matua, ma ua fa’amaonia lava le tala a ali’iva’a, na maliu lava le toeaina i lona ma’i masani, e le o i ai se tasi e masalomia na fa’ao’oina ia te ia le maliu.

O le sui e ona le va’a, Ross Anderson, na muai fa’ailoa fo’i i ai le maliu o le sui sa ia lisia mai lana va’a, le Beviano ina ua to’ai taunu’u le va’a i Gisbone, ma ua fiafia fo’i i latou na malaga ma le tama matua, aua o i latou uma lava e masani lelei, ma o uo mamae lava i latou, a le sui ua maliu.

Ua le mafai ona fa’aalia mai se taofi o lenei tama i le au fa’asalalau, se’ia mua’i talanoa i la’ua ma le sa kapetenia lona va’a, aua sa lisia lona va’a ina ia malaga ai le toea’ina ua maliu ma le auva’a lea mo Tonga ma Fiti. Na fa’aalia e ia, na ia iloa na tu’ua e le aumalaga Waikawa, le nu’u latalata ane i Picton i le po o le aso Sa ua te’a, ma o lona iloa, e malaga sa’o ai lava le va’a mo Tonga ma Fiti, ma e na te le o iloa leleia fo’i, po’o gafea tonu na maliu ai le tama lea sa ia lisia maia lona va’a.

LEILOA LE KISO MAI LE VA’A TONGA

O lo’o fa’aauau pea se su’esu’ega tele i le 600 lita o le kiso na leiloa mai le ‘MV Otuanga’ofa’ a’o taula lea va’a i le Uafu o Queen Salote i Nukualofa, Tonga.

O le ali’i Pule Sili o le Kamupani Va’a e ona lea va’a, ua matua le mafai lava ona ia fa’ailoa mai se fa’amatalaga i le taimi nei, ona o lo’o fa’atautaia fo’i se sailiga ma le su’esu’ega i totonu o le Kamupani lava latou e tusa ai o lea tele o kiso sa i luga o le va’a, ae ua leiloa po’o ai ua avea fa’anana.

Peita’i, o se fa’asalalauga ua fa’ailoa mai e le Tongan Broadcasting Corp. ua fa’ailoa ai, a’o taula le va’a lea i le Motu o Easter, sa matauina ua fa’aitiitia le aofa’i o le kiso i luga o le va’a. O se tala mai a le ali’i Sifi Inisinia o le va’a, “E ao ina fa’amama mai mafaufau o i latou su’esu’ea lea mataupu, aua e o’o lava i sina tama’i sipa o le tulaga o le va’a i le taimi na fua ai le kiso, e mafai ona matua tele lava se suiga i le faitauga o le kiso o lo’o i ai i luga o le va’a.”

O lenei va’a o le “MV ‘Otuhanga’ofa” na fa’atauina ina ia suia ai le va’a o le “Princess Ashika” lea na magoto i le tausaga e 2009, ma maliliu ai tagata e to’a 74.

saunia: Leua Aiono Frost