Ua amata folafola mai nei e tagata nu’u uma o Korea i Matu le latou sapaia o le latou ta’ita’i fou o Kim Jong-un ina ua maliu le latou ta’ita’i o Kim Jong -il, o lona tama. O le taimi nei, ua taoto pea le tino maliu o Kim Jong-il ae o lo’o fa’agasolo polokalama o le nofo fa’anoanoa o lea atunu’u.

O le laumua o Korea i Matu, Pyongyang lea e fa’atautaia ai nei toe sauniga o le ta’ita’i o Korea, ae ua fa’ailoa mai e matua solo atu tagata i so’o se vaipanoa o lea malo e fa’ailo lo latou nofo fa’anoanoa ina ua maliu lea ta’ita’i iloga ia i latou.

I le taimi nei, ua matua sapaia lava e le au fa’asalalau a lea malo le ali’i ua filifilia ma loto i ai le to’atele o tagata o le atunu’u, le atali’i o le tama ta’ita’i ua maliu nei, Kim Jong-un.

O lea le vaega o Korea, matu, o lo’o tele i ai una’iga a Amerika ina ia tausia mai e i latou le nofo filemu. Ua mae’a faia ni tiute o Kim Jong-un i lona malo e fa’ailo ai, ua amatalia lava ona ia tula’i mai e ta’ita’i ona tagata.

Ua ia fa’afeiloa’ia tagata malaga fa’apitoa mai Peretania mo le vaiaso o sauniga mo le tama ua tu’ua le malo, ua toatele fo’i sui iloga o isi malo uma o le lalolagi, o lo’o ua mae’a fa’afeiloa’ia ma ua amatalia lana taligamalo mo i latou uma, ae o sauni Korea i Matu mo toe sauniga o le laotu ta’ita’i ua masoe nei.

Ua iloga mai, i le maimoa atu a tagata lautele i le tele o sauniga ma savaliga fa’aaloalo o le aso fa’apitoa o lea ta’ita’i, ua matua foliga uma lava i le fa’atulagaga a le Faigamalo a Siamani i le taimi o soifua mai le latou ta’ita’i faigata ma le mata’utia o Adolf Hitler. Ua fa’atulagaina le aso 28 Tesema, 2011 e falelauasi ai lea ta’ita’i.

O le fa’asologa o le gasolo atu o tagata e fa’amavae i le latou ta’ita’i ua fa’ailoa mai e fai vaega, ma ua tu’uina fo’i sina taimi mo i latou e fa’atino ai latou fa’aaloaloga. O le to’atele e matua fetagisi lava, ma e leai ma se tasi o toe naunau i se mea’ai, ae na’o se solo filemu atu lava i autafa o lo latou ta’ita’i, ma toe tu’umuli mai, ae fa’asolo atu isi vaega lea e vaevaeina i ai le to’atele na’ua o le atunu’u atoa.

E eseese lava ituaiga faiga ua faia e tagata e latou te fa’atinoina ai lo latou nofo fa’anoanoa i le to’esea o le latou ta’ita’i. O nisi ua fa’atutuina ata tetele o lo latou ta’ita’i i totonu o maota tetele o le Malo, ona fa’agasolo atu lea o tagata e na’o na tutu lava ma fetagisi, ma va’ai pulato’a atu i leata o le ta’ita’i mo se taimi umi lava, ona fa’ato’a tu’ua lea e i latou ae toe fo’i i aiga.

Ua pogisa atoa le lalolagi i Korea i Matu, aua ua le toe i ai ni fiafiaga, ua le toe tatalaina fo’i pisinisi e pei ona masani ai i aso uma, ae o tagata ua le toe manana’o ina ia a’ai ma feoa’i solo i a latou mea e masani ai i aso ta’itasi, masalo o lea le latou auala e fa’atino ai lo latou nofo fa’anoanoa i le amia o le soifua o le latou fo’i ta’ita’i.

O le latou fa’amatalaga mai, “Ua matou va’ai atu nei i le atali’i, Kim Jon-un ina ia ta’ita’ia le atunu’u fa’apei o lona tama, ma le tama o lona tama.” O se tasi na fesiligia o se ali’i fitafita a le Malo, sa ia fa’aalia lona lagolagosua i le faigamalo a le latou ta’ita’i ua maliu nei ma ia fa’apea ai, “O lea ua matou mafuli atoa ina ia sapasapaia ma puipuia a’ia’i le faigamalo a Gen Kim Jong-un, ma o le a matou vavalalata lava ma ia i ana fa’ai’uga uma e faia mo le atunu’u.”

O le ali’i tusitala a le  Associated Press, Rafael Wober, ua fiafia lava ina ua mafai ona ulufale e fa’asalalauina mai ni tala tusia e tusa ai o le to’esea o lenei ta’ita’i iloga o Korea i Matu, sa ia fa’aalia, “E ese la’u va’ai i lenei ituaiga mea e tupu i so’o se vaipanoa, so’o se ala tele o le laumua o Pyongyang, ua matua tumutumu i tagata o le atunu’u, ma e leai se tasi e le tagi lotulotu. E leai ma ni faiga’ai o faia ae na’o le va’aia lava o tagata nofo fa’anoanoa, e le toe inu se tasi pe faia ni mea fiafia, ae ua na’o le nonofo fa’anoanoa.”

Talu mai lava ona tupu lenei mea, ua iloga mai le filemu ma le to’afilemu o le atunu’u atoa, ma ua le toe i ai se mea e gase, po’o ni falegaosi oloa tetele o toe tatalaina, ma ua fa’ailoa mai e nisi, e matua tutusa lelei lava lea faiga, ma le faiga na tupu fo’i i le 1994 ina ua tu’ua le malo e le tama o lenei ta’ita’i ua maliu nei.

O nisi ua fa’ailoa mai, “O le mafuaga o le tagi tele o tagata, ona afai e te le tagi, e matua i’ini lava oe e se tasi ina ia e tagi fa’ataitaio ai.”

Aumai: AP; saunia: Leua Aiono Frost