Maliu ile Fa’atamala
Na alu e fai lona siakiga po ’o malosi
Lua tausaga e va ai ua ta’atia i le pusa oti
E le’i ta’ua e le foma’i ua sosolo le kanesa
Fa’ato’a iloa mulimuli ane i le oso o le vevela
Ua te’i le uso i uiga o lenei ma’i
Ua alu le tino, le ai, na’o le pua’i
Tonu i le aiga e 'ave i Amerika po ’o Niu Sila
Sa’ili se vaifofo ia vave ni togafitiga
Galue le loia a le ua gasegase e su le falema’i
Fa’atamala foma’i, leai se lavea’i
E ui ina maua i le fa’ata ua kanesa le manava
E le’i ta’ua i le ua ma’i, mai lava i le amataga
Na fono le loia a le aiga ma le Loia Sili
Sa ta’u i ai le mea ua tupu, ma e le’i fa’afiti
Ua fa’ato’ese le itu a le malo i le fa’atamala
Na feutaga’i loa mo se tupe aua se to’omaga
Ana le seanoa le loia a le aiga
E le maua mai le tupe tele mo togafitiga
E le’i o’o le mata’upu i le fa’amasinoga po ’o le fono
Ae na fofo lava i le va o loia ma le aiga potopoto
E ui la i le lavea’i mai le malo na maua
Ae ua tuai, ua uma lava lona ola
Ua 'aumai e Kika’e lenei mea na tupu
O avanoa fa’apenei o lo ’o ufiufi e le 'au kuluku
O le Fono ma le malo, ua tatau ona mata ala
Le tulafono lena e tilotilo i ai tou mata
Fai mai ia maua e tagata uma togafitiga fai fua
Ae su’e e le Kovana ma le Fono tupe mo lou soifua
O le falema’i, o se tasi o itu tino a le malo
E sulu i ai tagata mafatia ma teine toto
O le Aso Gafua e tu ai Kika’e i Fa’agalu
Ua maua i le manava tata, ua fia fai sona pamu
E magamaga ae tuli i fafo aua e leai se tupe
E su’e lelei le palagi lea o lo ’o fia pule
Pau le atugaluga i te’i ua pa lava palasi
Toso atu Kika’e, e le fia tago i ai se foma’i
Le fautuaga fa’amolemole Moananu Va
Tepa i luma ma tua, talua’i lau va’ai i luga
Alofa i tagata Amerika Samoa, o ou toto ma a’ano
Uia ala o le agamalu, se ola i fano