Malamalama’aga o le Kanesa
KANESA O LE TAUFALE TELE (COLON): O LONA VAVE SU’EINA MA LE VA’AVA’AIGA
O le taufale tele (po o le Colon) o le vaega mulimuli lea o le ala ‘ai. O se totogi umi ma le tele ona musele, ma e fa’aputu mai i ai mea e ‘ai e le tagata, ona pasi atu lea i fafo mai le Maliuga (Rectum).
O le kanesa o le Taufale Tele ma le Maliuga, o se fa’ama’i malosi ma le sosolo gofie i isi itu tino. Ae vave fo’i ona salalau i isi totoga o le tino, ma i’u ina uma ai le soifua. E amata mai le Kanesa i mea e ta’ua o Polyps (Polipi) i totonu o le Taufale Tele. E pei Polyps o ni matapo’u po o ni lafitoga i le amataga, ae i’u ina tupu tele ma sosolo atu ai i si vaega o le Taufale Tele ma isi totoga. O Polyps e le avea ma Kanesa ua fa’aigoa o Benign Polyps, a o i latou ua liu ma Kanesa, e ta’ua o Malignant Polyps.
E sosolo atu Kanesa o le Taufale Tele ma le Maliuga i totoga tuaoi aemaise totoga mamao ese, e i ai le po o le Ate, Fai’ai ma le Mama (Lung).
E mafai ona puipuia le tagata mai le Kanesa o le Taufale tele (prevention), ma e mafai fo’i ona fa’amutaina lea Kanesa i lona ave’eseina mai le tino (cure). A maua vave Polyps ae le i liu Kanesa, ona puipuia lea o le tagata. Afai fo’i e vave ona maua ma ave’eseina Polyps ua liu ma Kanesa, ona puipuia lea o le tagata. Afai fo’i e vave ona maua ma ave’eseina Polyps ua liu ma Kanesa ae le’i sosolo atu i isi sele ma totoga, ona fa’amuta ai lea o lona tupu ma le toe afaina ai le soifua o le tagata.
Na fa’aalia i se su’esu’ega e ta’u o le National Polyp Study, le fa’aitiitia i le 90% Kanesa o le Taufale Tele ma le Maliuga, e tutupu i tagata na vave aveeseina o latou Polyps. E faia e foma’i lea galuega i le fa’amamaina o le Taufale i vai fa’atafi, oan tilotilo lea i totonu o le Taufale Tele i le masini e ta’u o le Colonoscope (Fa’asamoaina i le Kolonosikopi). A maua ai ni Polyps i totonu o le Taufale Tele ma le Maliuga ona ‘oti lea ma aveeseina ma su’eina pe ua liu ma Kanesa pe leai.
E i ai su’ega e tatau ona faia e iloa ai le lamatia o le soifua e le Kanesa o le Taufale Tele ma le Maliuga (Colorectal Cancer Screeningf Tests). O le Natura o le Kanesa ma Polyps o le Taufale Tele, o le leua lea i le fe’au mamao ma sau ai le eleele filogia ai le fe’au. O le su’ega e ta’u o le FOBT (Fecal Occult Blood Test) e fa’aaogaina ai le pepa ua i ai i totonu le vaila’au e liua ai le lanu o le pepa i le uliuli pe afai o filogia ai le toto i totonu o le fe’au.
E su’eina e le foma’i le ala fe’au i lona limatusi ua puipuia i se totigilima, ona nini lea o le fe’au i le fasipepa fa’apitoa lea. Afai e i ai le toto i le fe’au ua maua, ona sui lea o le lanu o le pepa fa’apitoa lea i le lanu uliuli. Ae leai se suiga o le lanu o le pepa, pe a le filogia le fe’au i le toto. E i ai Kanesa ma Polyps e le piliki (bleed) ma faigata ai ona maua i lenei su’ega.
O le su’eina o le ala fe’au i le lima tusi o le foma’i, e ta’ua lea o le Digital Rectal Exam (D.R.E.) ma o le isi lea su’ega tau amo le puipuia o le soifua, mai le Kanesa o le Taufale ma le Maliuga.
E mafai ona maua ai ni Polyps ma ni patu ua tutupu i totonu o le ala fe’au i lea su’ega. Ae na o le vaega lava o le Taufale e o’o i ai le limatusi o le foma’i, e mafai ona su’eina i lenei su’ega. E le tatau ai ona fa’amoemoe i lenei su’ega mo le su’eina o le atoaga o le Taufale Tele.
O le su’ega sili ona tau ao le COLONOSCOPY, lea ua uma ona ta’ua muamua, i lenei tusitusiga. E i ai fo’i le X-Ray po o le fa’ata e ta’ua o le Barium Enema, e fa’aaoga mo i latou e le mafai ona fa’amoe mo le COLONOSCOPE. E i ai i latou ua vaivai o latou fatu pe leaga fo’i o latou tino (allergic) i vaila’au fa’amoe.
O lamatiaga nei o le Kanesa o le Taufale tele ma le Maliuga (risks for Colorectal Cancer):
• O le matua o le soifua ua sili atu i le 40 tausaga.
• O le umi po o le maualuga o le tino. E foliga mai o tagata u’umi e fa’ateleina ona maua i lenei Kanesa, e le iloa lelei e foma’i le pogai.
• Mamafa o le tino. O le tele o pauna ma le ga’o o le tino e tele ai fo’i le avanoa e maua ai le Kanesa o le Taufale Tele.
• Mea taumafa. E tatau ona fa’aeteete le taumafa i mea’ai mai tino o manu. E lelei moa ma i’a ae taumafa ai, ae taumafai ina ia aua le tele ma puta ai le tino.
• Vaitamini (Vitamins). E aoga Vaitamini e i ai le Iron po o le Folate mo le puipuia mai le Kanesa o le Taufale Tele ma le Maliuga. O le vaitamini D, e aoga tele fo’i.
• Kalisiumu (Calcium). E taua tele lenei minerale i le tino mo le malosi o le ivi o le tino ma totoga e i ai le fatu ma le Neura. E tatau ona malosi le inu le Skim Milk pe inu fuala’au Kalisiumu (calcium tablets).
• Fuala’au e Taofia ai Ma’itaga (birth control pills) ma Homone (hormones). E fa’aitiitia le Kanesa o le Taufale i fafine ua sili ma le 5 tausaga o inu i fuala’au nei. Peita’i e fa’ateleina ai le avanoa e maua ai i Kanesa o le Susu, Ma’i FAtu ae maise le Stroke.
• Fa’ama’i o le Taufale e i ai le ‘Ulcerative Colitis’. E silia ma le 50% o i latou e maua i le fa’ama’i lea, e i’u ina maua i le Kanesa o le Taufale Tele. Ua fautuaina e foma’i ina ia ave’eseaina le Taufale Tele atoa pe a maua le tagata i lea fa’ama’i.
Talanoa i lau foma’i pe afai e a’afia oe i tulaga ia ua ta’u atu i luga.