Malaga mai le au lakapi mai Fiti mo le ta’ito’a 7 fu’a

E tasi le kalapu lakapi mai le atunu’u o Fiti ua fa’amaonia le malaga mai e tausinio, i le ta’amilosaga ta’ito’a 7 o le fu’a o lenei tausaga, lea o le a fa’atautaia e le Iuni Lakapi a Amerika Samoa (ASRU), e pei ona fa’amaonia mai e le Ta’ita’ifono o le Iuni i le Samoa News, le afioga i le matua ia Togiola T. A Tulafono.

 

E ese mai i le kalapu mai Fiti lea ua fa’amaonia, e ono isi kalapu mai Samoa ua fa’amaonia mai fo’i le malaga mai e tausinio i le ta’amilosaga lava lea o le fu’a, lea ua fa’amoemoe e fa’atautaia i le aso 10 & 11 Aperila, 2015, i le malae o le Veterans Stadium i Tafuna.

 

Na taua e le matua ia Togiola e fa’apea, o lo o tatala pea le avanoa mo le fa’auluina mai o kalapu mai fafo, e fia auai i le ta’amilosaga o le fu’a o lenei tausaga, lea ua fa’amoemoe e fa’amuta le fa’auluina o ‘au i le aso lenei, le aso 27 Mati, 2015.

 

E le i mafai ona fa’ailoa mai po o aofia ai i ‘au mai Samoa e 6 lea ua fa’amaonia e malaga mai, le au o lo o umia le siamupini o le ta’amilosaga a le fu’a mo le tolu tausaga soso’o ua mavae atu, le ‘au malosi mai le afioaga i Vaiala, le ‘Vaiala B.B.E’.

 

E ui fo’i e le i mafai ona fa’amaonia mai le aofa’i o ‘au mai kalapu lakapi eseese i le atunu’u ua fa’amoemoe e tausinio i le ta’amilosaga o lenei tausaga, peita’i na taua e le to’atele o faiaoga o kalapu kalapi i le atunu’u o lo o masani ona tausinio a latou ‘au i ta’amilosaga fa’apenei, le tau fai sauni uma lea o a latou ‘au e tausinio i le ta’amilosaga o lenei tausaga.

 

O le amataga o le masina lenei na fa’alauiloa aloaia ai e le ASRU i se pepa o fa’amatalaga sa tu’uina mai, lo latou sauni e fa’atautaia le ta’amilosaga ta’ito’a 7 o le fu’a i lenei tausaga, atoa ai ma lo latou ofoina mai o le fa’ailoga tupe e $12,000 mo le au e manumalo i le Ipu autu.

 

Na taua e le ASRU e fa’apea, ua i ai lo latou fa’amoemoe, o le amataga lea o le taumafai e si’itia ma fa’aleleia atili le ta’amilosaga ta’ito’a 7 o le fu’a, ina ia mafai ai ona la’a atu tama lakapi a le atunu’u i le tulaga fa’avaomalo ua i ai le ta’aloga i lenei taimi o le soifuaga.

 

Ina ua fa’alauiloa e le ASRU le fa’ailoga tupe mo le ta’amilosaga, e to’atele ni isi o kalapu lakapi lotoifale sa latou fesiligia le auala e fa’atupe mai i e le ASRU le ta’amilosaga, aemaise ai lo latou malamalama lelei i le vaivai o le itu tau tupe o lo o fetaia’i ma le ASRU.

 

“Afai e $10,000 le fa’ailoga o le siamupini na fa’atulaga e le Kalapu a Malisi sa latou fa’atautaia le TMO Pago 7’s mo le tolu tausaga sosoo, i lalo o le lagolago malosi a le Kamupani o le TMO fa’apea ai ma isi pisinisi eseese i le atunu’u, o fa’apefea la na maua e le ASRU lenei vaega tupe tele ao lea e vaivai le tulaga o lana tupe maua”, o le popolega lea sa fa’aalia e se tasi o faiaoga ma se kalapu lakapi i le atunu’u.

 

Ae na taua e le afioga i le matua ia Togiola, ua maea ona tu’uina atu se tusi a le ASRU i le Komiti o le Fu’a mo se fesoasoani i le fa’atautaiga o le ta’amilosaga ta’ito’a 7 o le fu’a..

 

“O lo o matou fa’atalitali pea ma tatalo e maua mai se fesoasoani a le malo”, o le saunoaga lea a Togiola.

 

“Ou te manatu o lo o silafia lelei lava e le malo, e le mafai ona fa’ataunu’u manuia lenei fa’amoemoe e aunoa ma se fesoasoani a le malo, aua o lo o silafia e le malo, e le gafatia fo’i e le malosi o nai kamupani o lo o fesoasoani mai ona fa’aatoa le manaoga atoa o lenei fa’amoemoe”, o le isi saunoaga lea a Togiola.

 

Ae na taua e le afioga i le ali’i kovana ia Lolo Matalasi Moliga i se feiloaiga ma le Samoa News i le vaiaso nei, na pau le fesoasoani a le malo e tu’uina atu i le ta’amilosaga ta’ito’a 7 o le fu’a, “o le fa’avanoa lea o le malae ta’alo”, aua “o tupe uma o lo o maua i le fa’aaogaina o le malae o lo o alu uma lava i le Iuni Lakapi”.

Comment Here