Ads by Google Ads by Google

Malaga le ‘au pi’i mo ta’aloga Oceania i Niu Sila

O le taeao ananafi na tuua ai e le ‘au pi’i laufanua o Amerika Samoa, mo le fa’amoemoe e tausinio i le ta’amilosaga a atumotu o le Pasefika e faia i Aukilani i Niu Sila i le ogatotonu o le masina lenei.

 

O le mae’a ai o ta’amilosaga e tele sa fa’atautaia e le Asosi Pi’i a Amerika Samoa (ASWA) talu mai le tausaga na te’a nei, e saili mai ai sa latou ‘au mo lenei ta’amilosaga, o le fa’aiuga o le vaiaso na faia ai loa la latou ta’amilosaga fa’ai’u ma fa’alauiloa ai loa le lisi o le ‘au mo Niu Sila i ta’aloga a le Oceania.

 

Na taua e le Teutupe a le Asosi Pi’i a le atunu’u ia Ethan Lake le lava tapena o le ‘au atoa mo le ta’amilosaga a le Oceania, ua tele fo’i masina o latou koleni mo le fa’amoemoe lenei.

 

I le tele ai o ta’amilosaga sa masani ona tausinio ai le ‘au pi’i a le atunu’u e manumalo ai i le tele o pine, na saunoa ai le susuga a Lake e fa’apea, o lo o maualuga fo’i la latou vaai i le ta’amilosaga lenei a le Oceania, o le a fa’amanuaiaina fo’i le ‘au a le atunu’u i ni pine.

 

O ni isi o lo o malaga i le ‘au mo le ta’amilosaga a le Oceania i lenei tausaga, o lo o aofia ai ni isi sa tausinio muamua fo’i i ni isi o ta’amilosaga fa’avaomalo ua tuana’i, ma latou manumalo ai i pine mo le atunu’u.

 

E pei ona saunoa le susuga Lake e fa’apea, o isi sui o le ‘au o lo o aooga i latou i Amerika ma koleni ai, ma ua fa’amoemoe o le a malaga sa’o i latou ia i Niu Sila ma le fa’amoemoe e feiloa’i ai ma le ‘au o lo o malaga atu i Amerika Samoa nei, ma sauni ai loa mo le ta’amilosaga.

 

O le ‘au pi’i e aofia ai Darius “Daniel” Helata, Samson Vailahi, Alestor Tavita, Edward Takafua, Wesley Ioane, Zena Iese, Saliitu Mauga, Pita Fanolua, Teetai Fanene, Faifua “Stitch” Ipolito, Barbra Ludgate, Monika Taufa ma Ben Sufi, fa’atasi ai ma ta’ita’i o le au malaga i le tama’ita’i peresetene ia Irene Kane ma le susuga ia Ethan Lake. O isi sui e to’atolu o le ‘au e aofia ai ia Paul Fano, Vaikona Taufatofua ma Nathaniel Tuamohela, o le a fa’atasi atu i latou i le ‘au i le taimi e taunu’u ai i Niu Sila, a o lumana’i ai le taimi e tatala aloaia ai le ta’amilosaga i le fa’aiuga o le vaiaso nei.