Ads by Google Ads by Google

Maimoa i Fusu’aga Aso To’ona’i Nei

Ua mae’a faia le fonotaga a le Komiti Fa’afoe ole Asosi Fusu a Amerika Samoa (ASBF), ma ua fa’ailoa mai ai le mana’oga tupito ua galulue punoua’i i ai le vasega o fa’atonu ma faia’oga o latou Kalapu Fusu e 6 ua i ai nei, ia faia le ta’amilosaga fusu i le aso To’ona’i nei.

 

“O le fa’amoemoe, ia fa’aauau pea ona lelei le fanau fusu, ia le na’o taimi e tapena ai mo ta’amilosaga fusu fa’avaomalo, ae ia tapenapena lava i taimi uma.” O se tala lea a le susuga Tau Tanuvasa, le failautusi o le ASBF.

 

O le fa’atuai ona faia o lenei ta’amilosaga fusu mo le Moso’oi i lenei tausaga, ona o ni fa’alavelave le ma’alofia i le tulaga o le ta’amilosaga a le Oceania lea sa tu’u e talimalo ai Niu Sila. Ua tolopoina lea ta’amilosaga, ma o le a toe fa’ailoa mai le aso patino mo lea fa’amoemoe.

 

O le isi itu, sa i ai mea na fa’alavelavetia ai sui iloga o le Komiti Fa’afoe, ma ua fa’amatu’u ai lea fa’amoemoe se’ia toe fa’atino i le vaitaimi lenei o aso fiafia, aua ua fa’atasia ai le tele o aiga.

 

O lenei ta’amilosaga, o le a fili ai fo’i paga e tutusa le mamafa ma fetaui, a mae’a o ai e manumalo, e koleni fa’apitoa e avea ma ulua’i tofiga i ni fusu’aga fa’avaomalo o soso’o mai.

 

“O le lelei lena o fusu’aga fa’apenei, e iloga ai lava le tama fusu ma le teine fusu e alualu lona taumafai i le fa’agatama, ma e muamua lava piki e avea ma sui o le atunu’u i a latou paga i fusuaga fa’avaomalo.” O se tala lea mai le ali’i failautusi.

 

O le aso To’ona’i nei e faia ai le ta’amilosaga fusu lea i le Fale Tuai o le VA i Tafuna, e amatalia i le itula e 1:00 i le aoauli. Ua vala’aulia fa’apitoa le mamalu lautele, ae maise i latou o lo’o fusu o latou alo, ina ia auai ma fa’amalosi’au i le fanau a’o tauva.

 

E leai se totogi mo lenei tauvaga, ae ua mo’omia lava e sui tauva i faipelega, le auai mai e sapaia lo latou fa’amoemoe. O lo ua taliu mai fo’i le susuga Robert Toilolo o Pava’ia’i mai lana taumafaiga sa malaga ai e fusu i Almaty, Almaty, Kazakhstan - o malo i totonu o le atu Eropa.

 

“E ui ina e le’i manumalo, ae ua ou iloa nei, e le o faigofie lava le tauva i le faipele i na malo, e malolosi tele o latou tama ta’a’alo, ma e tele lava se iloa i le fa’agatama ua ou maua i la’u lea malaga.” O sana fa’amatalaga lea.

 

O le auai atu o Toilolo, sa malaga lava na’o ia, ona sa fa’alavelavetia le ali’i Taitaifono o le Komisi o Talavou ma Tagata fusu a le AIBA sa fa’amoemoe e i ai i le taimi e fusu ai lea alo o le atunu’u. Lona lua, e le’i mafai fo’i ona auina atu se ali’i fa’atonu pe o se faia’oga o Toilolo la te malaga i lea fa’amoemoe, ona e matua silia ma le $15,000 le totogi o le pasese ma le nofo ai i le faletalimalo mo lea ta’amilosaga.

 

O lo’o fusu lea alo o le atunu’u i lenei ta’amilosaga i le aso To’ona’i, ma e matagofie fo’i le maimoaina e le mamalu lautele o lona tomai ua i ai i le fa’agatama. Ua fa’ailoa mai e silia i le sefulu ni paga o le a maimoaina i lea aso, ma e taumafai lava e i ai ni paga a tama’ita’i pe lua i le tolu.