POMU I DOHA, SYRIA - 19 MALILIU - 3 TAGATA NIIU SILA

O le masaga tolu sa fa’afailele e Niu Sila o ona tagata nu’u, ua fa’ailoa mai, na pa le pomu i Doha Mall i Syria, ma maliliu ai tagata e to’a 19, ae o le masaga tolu lea, o isi na sui na maliliu ai ae na;o le ta’i 2 o latou tausaga.

Ua fa’ailoa mai ua masalomia la le ali’i Peresetene o Syria BasharAl Assad, o lo’o afua ai lea pomu, pe o lo’o i ai fo’i lona sao i lava fa’alavelave matuia. E to’a 13 tamaiti laiti o lo’o maliliu ai i lea fa’aletonu, ma e aofia ai Lillie, Jackson ma Willsher Weekes i lea to’a 13 ua maliliu ia Me 28, 2012 i Qatars’ Villagio Mall.

O lea lava faila sa matauina o i ai le fuafuaga atoa, fa’amatalaga ma emeli e fa’atatau i lea pomu ia fa’ataunu’u  ma ua iloga mai ai, o se faiga sa iloa patino lava e lea ta’ita’i o le Malo o Syria. O le fuafauga sa fa’aigoaina o le “Villagio Blaze!”

O le lipoti sa taua’aoina ia Iuni 2012, ua fa’ailoa ai, o nisi sa tu’ua’ia i lea mu, o le le magafagafa lelei o i latou e va’aia patino lea fale, ua afua ai ona mu ane lava le fale ae le’i toe faia galuega lipea i ai, ae o le mu lava latou, e le’i mafai ona maua po’o le a le mea na mafua ai, pe na susunu fo’i e se tasi.

O le taimi lenei ua fa’ao’o atu e Niu Sila se latou fanoga i le fa’amasinoga a le Malo o Syria, ona o lea sa maliliu ai nisi o latou alo na soifua a’e i Niu Sila, le masaga tolu sa latou fa’afailelea mai le soifua mai, ma ua afaina ai o latou sitiseni nei i lea pomu, o lea e le talia e Niu Sila se isi mea, ae ia taua’aoina atoa mai e le fa’amasinoga ia i latou le suesuega atoa i lea mu na a’afia ai le soifua o nei tagata e to’a 19 muamua.

O matua o lenei masaga tolu a Niu Sila, ua la’ua fa’atuina se mau i lea malo, ina ia taofia uma fefa’ataua’iga i lea faleoloa tele, se’ia vagana ua fa’ailoa patino mai e le fa’amasinoga, le fa’ai’uga moni o le su’esu’ega i le afuaga o le mu lea na maliliu fasia ai o la’ua alo.

SAISAITIA FAIFEAU & AU FAI ATA TIFAGA

Mai Aikupito, ua aumaia ai se fa’atonuga ina ia saisaitia atu le ali’i Faife’au ma nisi e to’afitu o tagata Aikupito Kerisiano na latou tu’ufa’atasia le “ata tifaga” e tete’e na’ua i le fa’atuatuaga-Isalami, ma sa fa’ailoa ai le susunuina o tusi sa a lea fa’atuatuaga - Koran.

O le to’alua lea e lili i ai tagata Aikupito o le tamaloa sa ia faia le ata Nassoula Basseley Nakoula ma le Faife’au sa fesaosoani i le tu’ufa’atasiga o lea ata Terrry Jones mai Florida. O le isi to’aono ua fa’alauiloa mai e Aikupito o Kerisiano Kopi Aikupito e to’alima tamaloloa ae to’atasi lava le tama’ita’i.

E tusa ai ma le fa’asalalauga a le BBC, ua fa’ailoa mai ai moliga, “O le tau fa’aleaga i le Fa’atuatuaga Isalema, ma fa’atiga ai i le Pelofeta ma ua afua ai le tetele o fetinea’iga!” O nei moliga i totonu o Aikupito, e o’o lona fa’asalaga i le Oti.”

O nei tusi saisai ua mae’a fa’ataoto mai e Aikupito mo le to’avalu lea, ua fa’ailoa mai ua fa’ao’o ane i le vasega fa’amalosi tulafono a le Interpol ma le vaega o Leoleo a Amerika, ma ua latou fa’ailoa ane, e tautau e latou te avea fa’amalosi atu nei sui mai Florida e tutula’i e tali moliga i Kairo.

Peita’i, ua fa’ailoa mai, ua avea lenei mea, ma ala ua toe taumafai ai Isilami ina ia fa’aofi fa’aletulafono i totonu o le tulafono o tapua’iga le maga, e taofia ai le fa’atiga ma le fa’aleagaina o isi fa’atuatuaga, ma o lea faiga, e toe te’ena ai saolotoga e tapua’i ai le tagata i lana tapua’iga, ma le sa’olotoga e fa’ailoa ai lou lava manatu i so’o se mea.

SAISAI LE TAMALOA - TELENOA I LUGA O LE PASI

Mai Honolulu Hawaii, ua fa’ailoa mai ai le vasega o leoleo ua latou saisaia se talavou na ia fa’atiga i le pasese ma le ave pasi o se pasi la’u pasese, ina ua ia tosoa le sipa o lona ofuvae ae telenoa i luga o le pasi i le aoauli o le aso To’ona’i na te’a nei.

Na amata faiga leaga a lea ali’i talavou e tusa ma le 29 tausaga le matua. Na le mautonu o ia pe ‘aisea, ae sau loa le Pasi oso loa i ai le tama lea, ma lona manatu e le mulimuli atu le talavou ua ta’usalaina. O’o atu i luga o le pasi, ae fai ma ia le mulimulita’i i nofoa e oso si tama lea nofo ai. Ina ua va’aia e le pasese lana mea o fai i lea tama, sa faliu ane loa le talavou, toso lana sipa ma telenoa agai i le pasese.

Na ona iloa atu lava e le ‘ave pasi o le amio mataga ua faia e le talavou lea, tu ma le pasi i luma o le Army Museum i Kalia Road, at tu’u sa’o lava le ali’i fa’alialiavale i a’ao o leoleo o lo’o tiute ai i lena Ofisa tele.

E le’i faigata lava ona saili le fa’ao’o sala, aua na’o le tasi lava le tasi lava le fesili a leoleo, po’o fea le tama fa’alialiavale i ona itutino sa, ae tusilima uma i ai le pasese, o isi e toetoe a pua’i i le inoino, ae o nisi o lo’o talie i le malie o lea ata na matamatafua ai i lea aoauli, ae o le pona, e loka le tama na autu i ai le ata.

E mamafa le sala a le ali’i viliata, ua faailoa mai, e atoa le 6masina e fa’alialiavale ai i tama sese i totonu o le to’ese i Honolulu.

saunia; Leua Aiono Frost