Ads by Google Ads by Google

MAI ‘I MA ‘O

ASIA NZ FAILAUTUSI O LE VA I FAFO - PERETANIA

O le susuga William Hague, le failautusi o Mataupu Tau le Va i Fafo a Peretania, ua asiasi ane i Niu Sila i lenei vaiaso mo ni ana fonotaga tau le va i fafo o Malo e lua, NZ ma Peretania. O le isi fa’amoemoega tele i lea sui, o lona asia lea o le a’ai tele o Karaiesetete ma le afaina o lo’o tupu ai pea, talu mai ona lutia lea a’ai i le tele o mafui’e tetele. O lenei fa’asalalauga o lo’o ua fa’alauiloa mai e le NZ Herald.

O le susuga McCully le Minisita o Mataupu Tau le Va i Fafo a Niu Sila sa ia fa’ailoa mai, o le asiasiga lenei a Hague e lua aso o le a nofo ai i Niu Sila, ma e fia fefa’asoaa’i i la’ua mataupu tau le va i fafo i malo e lua, ia so’otaga aiaiga o ia feso’ota’iga ma isi malo uma o le lalolagi ae maise fo’i le sone o lo’o aofia ai le malo latou.

O lo’o ua mautinoa lava e le mafai ona le aofia i lenei talanoaga le va o malo e lua ma Syria ma Iran ma taumafaiga ina ia nofo filemu malo e lua ma ia atunu’u, fa’atasi ai ma se tulaga ua i ai le Afakanisitana, Fiti ma Myanmar. Ua ese mai ia mataupu fa’avaomalo, ua i ai se taimi e asia ai Hague e ni faipisinisi laiti, ta’ita’i o atumotu o le pasefika, nisi o le fanau a’oga ae maise o sui mai isi fa’alapotopotoga i le atunu’u e le so’otaga ma ni matagaluega o le Malo.

Ua fa’ailoa mai, ua saunia lelei se Pale o le a fa’ata’atia e Hague i le HMNZSPegasus i le Nofoaga a le Neivi a NZ e taualoa ai le tautua matavela a fitafita uma o le Fuava’a a Niu Sila.

[NZ News3]

FESOASOANI OFOINA MO FITI

Ua mae’a fa’ailoa mai e le Malo o Niu Sila e tusa ma le $2miliona ua mae’a fa’atulaga mo Samoa ma Fiti ona o latou afaina i le afa o Evan ia Tesema 14-17, 2012. Ua fa’ailoa mai le tele na’ua o mea totino ua fa’aleagaina ae maise lava o falenofo o aiga ma ola na maumau fo’i ona o lea afa o Eveni.

Ua mautinoa i se sailiga ma fa’amaumauga o mea uma ua fa’aleagaina e faitau $miliona le aofaiga o tinoitupe e tatau ona toe fa’aleleia ai nei mea uma ua fa’aleagaina a aiga ta’itasi ae maise o le Malo. Ua ese mai lea aofaiga ua mae’a pasia ma fa’ailoa mai, ua fa’aalia fo’i e McCully ua mae’a fa’ao’o mai isi meaalofa e fesoasoani i nei malo e lua ona o la’ua tagata nu’u, ae ese mai ai ma lenei meaalofa tupe.

I le taimi o lea talanoaga, ua mae’a taua’aoina ia Samoa le $600,000. ae o Fiti e $400,000. Ua ese mai lena, i le taimi lava o le asiga lea, o lo’o i ai le NZ Air Force P3 Orion i Fiti e fesoasoani i le fa’amae’aina lelei o le fa’amaumauga o mea na fa’aleagaina ina ua mae’a fesoasoani fo’i lava ia Samoa.

Ua mae’a fa’ailo fo’i le afaina tele o le itu i Matu o Fiti i le afa lava lea o Eveni, ma ua mautinoa lava e alu fo’i le latou tolu vaiaso o faia pea a latou galuega toe fa’amama ma fa’aleleia mea ua fa’aleagaina e toe nofoia e aiga.

Ua fa’ailoa mai o pagota e to’a 100 mai le falepuipui i Natabua ma fitafita fo’i o le Ami a Fiti, ua fesoasoani malosi i galuega toe fa’amama e tusa ai ma lipoti a le Fiji Times. Ua faitau afe fo’i tagata ua sulufa’i i nofoaga fa’apitoa ua saunia e le Malo e tausia fa’apitoa ai i latou ae se’i toe fa’aa’e tautua lautele ona amata lea o galuega toe fa’aleleia o latou falenofo.

O auala na matua tapunia ona o pou uila ma la’au ua pa’u’u i ai, ae ua motusia fo’i ma le eletise ma le sapalai o le suavai mama a le Malo i le tele o afioaga i le itu lea i Matu o Fiti. E ui ina e leai nisi sa lipotia mai ua maliliu i Fiti ae 10 tagata fagogota sa sailia pea ona e le’i toe taliu ane i le mae’a o le afa lea i Fiti. I Samoa lava latou e to’alima ua maua tino ma ua fa’ailoa mai ua maliliu ona o le afa o Eveni ae to’a 8 i latou sa sailia pea o latou tino.

[NZ News3]

saunia; Leua Aiono Frost