Ads by Google Ads by Google

MAI ‘I MA ‘O

FASIA MA TU’U I TOTONU O SE KONETEINA

Mai le a’ai o Columbia, South Carolina, ua fa’ailoa mai ai se atali’i o Amerika Samoa, Fa’asiu Toese ua ia fasiotia lana uo tama’ita’i, Temukisa Enele mai Amanave, Amerika Samoa, ma e ogaoga ona manu’aga na maliu ai o ia.

Mai le nusipepa o le State a Columbia, South Carolina, ua fa’alauiloa mai ai le tauga tele o le ala na fa’ao’o ai e To’ese le oti ia Temukisa, ma ina ua mae’a tatui o ia i le naifi, na ia tu’uina lea o lona tino i le koneteina una ma tu’u ile nofoa pito i tua o lana ta’avale 2000 Mitsubishi Montero.

Ua fa’ailoa mai e leoleo, o Fa’asiu lava sa ia toe vala’auina i latou, ina ua mae’a paka e ia le ta’avale i le Pakaga a le Fale’aiga o le McDonalds i 7011 Parklane Road, i Columbia lava. Na fa’ailoa manino lava e To’ese i Leoleo, o i la’ua na misa ma lana uo teine, ma i’u ai ina ona fasia o ia ma maliu ai.

O lea fa’alavelave na tupu i le 3:00 i le vaveao, i le aso Lulu, Ianuari 2, 2013. Ua mae’a lokaina nei le soga’imiti o Fa’asiu To’ese i le Falepuipui i Richland County, ae ua fa’ailoa mai e le’i mautu sana loia e tula’i mo ia i le fa’amasinoga ae ua molia o ia i le fasioti tagata.

O Temukisa Enele, 25 tausaga le matua, o se tama’ita’i mai Amanave,  ma o se tasi o alo na fa’au’u mai Leone High School i le vasega fa’au’u o le tausaga 2005. Na si’itia ana a’oa’oga i le Central Christian College i Matheson, Kansas ma fa’au’u ai i le tausaga 2007. E tusa ai ma tala a si ona aiga i Amanave, o lana toe asiasi mai i Samoa o le tausaga 2010.

Ua mae’a o’o i South Carolina nai ona matua ma aiga, ae maise o ona tuagane sa alaala ma galulue i Alaska, ua i ai uma nei i Columbia mo toe sauniga o si o latou tuafafine. O le a faia lea i le itula e 2:00 i le aoauli i le Kornegay & Moseley Funeral Home & Cremation Services. Ona o le ogaoga o ona manu’anu’a, ua manatu ai aiga ina ia fa’aliu efuefu lona tino ma aumai ai. E maliu Temukisa ae o lo’o faigaluega o ia i le faleoloa tele o le Walmart.

O Fa’asiu To’ese, 25 tausaga le matua, e alaala i Faga’ima, ae o se tasi na a’oga ma fa’au’u mai Tafuna High Schoo i le vasega fa’ai’uaso o le tausaga 2004.

4 FAFINE FASIOTIA - VAAI I AI TAMAITI 3 TAUSAGA

Mai Tulsa Okalahoma, ua fa’ailoa mai ai e le Associated Press le tafaina o ni tama’ita’i se to’afa i totonu o le latou fale e se tasi i le aso Gafua na te’a nei, ae sao mai na’o le tamaitiiti e tolu tausaga.

Peita’i, ua matua afaina nei se tama o le masaga teine e na’o le 23 tausaga le matutua, o nisi ia sa maliliu i lea lava fa’alavelave. O Rebeika Powell ma Kayetie Melchor igoa o lea masaga ua maliliu.

E ese mai ia i la’ua nei o Misty Nunley 33 tausaga le matua, ma Julie Jackson 55 tausaga ua maliliu uma. Ua masalomia, na va’aia lava e le tamaititi e tolu tausaga le fasiotiga o si ona tina. O se tala mai a Larry Powell, “Ua maliliu uma la’u fanau teine, ua leai sa’u fanau, ua fa’apena fo’i ona leai se aoga ou te ola ai fua!”

Peita’i, ua te’i fa’afuase’i nei lea tama, aua o lo’o ua i ai le tama teine a si ona afafine, lea ua leai se matua, o le a avea ma se isi e tua atu ia te ia i lona tausiga atoa. O se tala mai se tasi o tuaoi o lana fanau i lea atufalega sa nonofo ai, na ia molimau mai, “O nei tina o nisi e matua laumata fiafia, e leai ni fa’aletonu i le matou nonofo ai, e aulelei na’ua nai a latou fanau, ma e le’i i ai se manatu o le a tupu lenei mea i le matou nofoaga.” Ua fa’aauau sailiga a leoleo i le sui sa ia faia lea solitulafono matuia.

TOSO FA’AMALOSIA TEINE 16 TAUSAGA E SE KEGI

Mai Fiti ua fa’ailoa mai ai e lipoti a leoleo ua tusia i le Nusipepa a le Fiji Times se tama’ita’i e 16 tausaga le matua ua toso fa’amalosi e se kegi a tama e to’a fitu lelei. E le o faigofie lenei mea ua tupu mai i le vasega o leoleo a le Malo o Fiti, ma ua fa’ailoa mai le taumafaiga malosi a leoleo, ia saisaitia uma lea vasega o tama na faia lea uiga mataga fa’apea i lea teine.

O le matutua o nei talavou tama na fa’ao’o lea solitulafono matuia e afua mai le 16 se’ia o’o i le 30 tasuaga le matutua, ma na tupu lea mea i le aso 3 Ianuari, i Vanua Levu. O se tala mai le tama’ita’i leoleo o lo’o ua tula’i mo su’esu’ega ma fa’amaumauga o fa’amatalaga a nei ali’i ta’usalaina, na ia fa’ailoa mai ai, “O le a le mama i le vaega o leoleo le mea ua faia e nei ali’i e to’atele, ma e faataunu’u lava ala uma o le tulafono ua taoto nei, e fa’asalaina taito’atasi i latou uma!”

O le fa’amatalaga a si teine, sa o ma le tasi o ali’i nei e to’afitu, e tausailia mai lona tausoga, peita’i, na faia atu ia te ia le ali’i na la o, e nofo atu i le fale lea, se’i alu e fesili i isi ana uo pe na latou va’aia lona tausoga. O le taimi lea ua ta le 7:00 i le afiafi.

Na va’aia e ia le o mai le na la’ua o ma le to’aono o isi tama, ma sa ia taumafai loa e sola ese mai lea fale na ia fa’atali atu ai, peita’i, na matua aufa’atasi nei ali’i e taofiofi mai o ia, ae faia loa le solitulafono ia te ia. “Ua mae’a ta’oto le tulafono e fa’ataua ai le puipuia malu o tamaitai ma fanauiti, o le a fa’amalosia lava ia vala uma o le tulafono e talafeagai ma le aga ua fa’atino e nei ali’i!”