LE FIA FA’AFA’AIPOIPO LE AFAFINE - FA’AO’O LE OTI

Ina ua musu le tama e fa’aipoipo lona afafine i ni ali’i e to’alua, faliu ane loa le vaega lea, ae fa’auma si teine lalelei. O le tala mai, sa to ‘ese lona ao! O se fa’asalaga ua matuia mo se tasi e fia fa’aipoipo i ai, ae ua maua fo’i le to’alua lea e leoleo. O ali’i mai Kunduz Afakanisitana i matu.

O le tala mai, e le o fiafia tele ai leoleo, ona o ali’i nei e to’alua na te’ena e le tama o lenei tama’ita’i ua maliu a la’ua fa’amalamalamaga e fia fa’aipoipo i si teine ua maliu nei.

I le amataga lava fo’i o le masina nei, e to’a 4 leoleo ua fa’afalepuipuia mo le 16 tausaga a le tagata, ona ua fa’amaonia lo latou tosoina o se tama’ita’i e na’o le 14 ona tausaga. O le tala mai i lea teineititi sa sau si teineititi e utuvai ma o lona toe taliu atu i le latou fale ma ana vai ae sofa’i loa o ia e nei ali’i leoleo i le a’ai fo’i Imam Sahib. O le aso Gafua lea sa tupu ai lea mea.

“O le taimi nei ua tele na’ua le vevesi fa’apea ua o’o mai, ma o le taimi lava e le mana’o ai se tama’ita’i e fa’auo ma se tamaloa, ua sofa’i e i latou ma fa’atino nisi o soligatulafono mamafa fa’apea ia i latou. Lea ua o’o mai i lenei mea matuia na’ua, ae ona e le o masani lenei teineititi i nei ali’i ua manana’o e fa’afa’aipoipo o ia.” O se tala lea a leoleo mai Afakanisitana i le BBC.

O le isi mea sili ona leaga ai, ona o nei ali’i ua la faia lea sauniga i le teine talavou, o ni ali’i lava o le latou auaiga, ae ua matutua i la’ua, ae o le afuaga tonu lava o le manatu o le tama o le teine e le mana’o i se fa’aipoipoga, ona e le’i o’o ina matua si ona afafine, o lea lava e le’i uma lana pule fa’amatua ia te ia!

MALIU ELDER BLACK EAGLE - TAMA FAI O OBAMA

O le tama matua, o se tagatanu’u moni o Amerika, i lona tupu’aga o le Initia, lea sa ia fa’atama fai le afioga le Peresetene Obama, ua maliu nei i le atoaga o lona 78 tausaga.

I le avea ai o Obama ma ona atali’i o le auaiga o Crow i le setete o Montana, sa ia fa’atino se sauniga fa’aleaganu’u a Initia ma fa’amauina ai le afioga le Peresetene, a’o avea ma Senatoa o le Malo o Amerika, o sona atali’i vavae fa’atama fai.

Talu mai lea vaitaimi a’o fa’agasolo le kemupeni a Obama e fia tauva mo le sui o le Temokalasi e tauva ai fa’aperesetene, na amata mai lava ona fa’ataotolia le gasegase o Black Eagle Jr i le nimonia ma le emphysema. Na ia fa’ailoa lona fiafia ina ua mae’a fa’atamafai e ia le peresetene ma ia fai mai ai, “O le igoa o Obama ua suia nei ia Barack Black Eagle - o lona uiga, “O se tasi e fesoasoani i tagata o le fanua.”

Na auai ma le fiafia Black Eagle Jr i le fa’atautoga o Obama e avea ma peresetene o le malo o Amerika, ma toe auai fo’i i le ulua’i fonotaga a tagatanu’u moni o Amerika ina ua mae’a le sauniga o le fa’atautoga o le Peresetene, ona fa’ato’a taliu ai lea i Montana.

E tusa ai ma se saunoaga a Obama e tusa ai o lona lea fa’atamafai, sa ia fa’ailoa mai ai, “O se fiafiaga tele ia te a’u ma o se fa’aeaga fo’i le avea ma se tasi o fanau a fanau a le auaiga Crow.”

Ae o le tala tusia i se tasi o nusipepa i le atunu’u McClatchy Newspaper, sa fa’ailoa ai, ua matua fiafia lava le tama o Black Eagle Jr. e lisia le ali’i peresetene o le Malo o Amerika, o set asi o ana fanau, ma o lea fiafiaga, ua ia alu lava ma ia i le tu’ugamau.

saunia: Leua Aiono Frost