O le alii aoga lea na maua e se sui Sinia o lana aoga o ula sana sikaleti mariuana i totonu o le lotoa a le aoga, ua tatala i tua mai le toese, i le mae’a ai lea o aso e 83 na taofia ai o ia a’o faatalitali le lauina o lona faasalaga.

O le alii o Ioane Tuumalo na ta’usalaina e le faamasinoga maualuga i le moliaga o lona  umia faasolitulafono lea o ni sikaleti mariuana, o se solitulafono na toe suia e le malo le mamafa o le faasalaga, i lalo o se maliliega sa sainia ma le ua molia ma talia ai e le faamasinoga.

O lea moliaga na afua mai ina ua maua e se sui Sinia o le aoga a Tafuna le alii o Tuumalo o loo ula sana sikaleti mariuana i totonu o le lotoa a le Aoga.

Ina ua fesiligia e leoleo na faailoa i ai e le ua molia e faapea, o mariuana sa ia te ia, sa ia mauaina i totonu o le fale taele se pepa sa i ai ni sikaleti se 5, ona ia ulaina lea o le isi tasi ae totoe ai sikaleti e 4 ia na ave e le sui Sinia o le aoga, ma tuu atu ai loa  i leoleo.

A’o lei tuuina mai le faasalaga a le faamasinoga maualuga i le vaiaso ua te’a mo Tuumalo, na maua le avanoa e faatoese ai le ua molia e tusa ai o le solitulafono sa ia faia.

Na faatoese le ua molia i le faamasinoga ona o le solitulafono sa ia faia, ma ia tautino ai na te le toe faia lea mea sese.

“Ua ou iloa le sese o le mea sa ou faia, ma ua ou iloa foi, o la’u gaioiga sa faia e le gata ua faalumaina ai o’u matua ae faapea fo’i a’u, ou te tautino atu, ou te le toe soliina se tulafono, ae tuu mai se avanoa sei toe faauma ai la’u aoga ma saili ai so’u  lumana’i ma maua ai sa’u galuega,” o le talosaga lea a Tuumalo i le  faamasinoga.

Na taua foi e lana loia ia Ruth Risch-Fuatagavi e faapea, e ui i le laititi o tausaga o lenei alii, peitai o le gaioiga sa ia faia e le masani ai lona olaga.

Fai mai Fuatagavi, o Tuumalo o se talavou atamai na matua sese lava le filifiliga sa ia faia, ma i’u ina sese ai le auala na ui ai.

Fai mai le tamaitai loia, afai ae faaauau pea ona loka e le faamasinoga Tuumalo i le toese, e le gata o le a leai se fesoasoani mo ia ae o le a atili ai foi ona agai atu lona olaga i se tulaga matuia ma leaga, aua o le falepuipui i Tafuna ua le o toe malupuipuia i tulaga o fualaau faasaina.

Na faaiu le talosaga a le tamaitai loia i lona talosagaina lea o le  faamasinoga ina ia faanofovaavaaia Tuumalo, ae aua nei toe i ai nisi aso faaopoopo mo ia i le toese.

Na lagolagoina e le loia a le malo ia Cabel Poag le talosaga a le itu tete’e. Fai mai Poag, e talitonu le malo, o Tuumalo o se alii talavou o loo i ai se lumanai lelei mo  lona olaga, e le o ia foi o se tagata e ulaula mariuana, ae o le mea na tupu na mafua mai i le sese o le faaiuga na ia faia.

E 5 tausaga na manatu le faamasinoga e loka mo’i ai lava Tuumalo i le toese, peitai ua faamalumalu le tuliina o lea faasalaga, ae ua faanofovaavaaia o ia mo le 5 tausaga, i lalo o poloaiga a le faamasinoga, ma o nisi o ia poloaiga e aofia ai le faasa lea ona ia toe tagofia le ava malosi poo ni fualaau faasaina i soo se taimi.

Ua poloaina foi o ia na te totogiina le salatupe e $1,000, ma ia auai i ni aoaoga e fesoasoani ai i le faafitauli o le ava malosi ma fualaau faasaina.

Saunoa le alii faamasino sili lagolago ia Lyle L. Richmond e faapea, ua manatu le faamasinoga, ua lava le umi e 83 aso  lea na taofia ai Tuumalo i le toese ao faatali lona faaiuga, e avea ma ona faasalaga i lenei mataupu.

Ua fautuaina foi o ia ina ia lesitala i le polokalame a le GED e faamaea ai lana aoga ma maua ai lona tipiloma mo le vasega 12.

I saunoaga faaiu a le alii faamasino ia Tuumalo, sa ia fautuaina ai o ia ina ia sui le auala e ui ai, ma ia aua nei toe pipii i ana uo o loo latou tagofia le ava malosi ma fualaau faasaina.

“Ou te le toe fia vaai ia te oe i luma o le nofoa lena,” o le saunoaga lea a Richmond ia Tuumalo.

“Alu e faauma lau aoga ma saili sou lumanai manuia e tausi ai oe ma lou aiga, ae afai ete le usitai i tuutuuga na, o le falepuipui le iuga,” o le saunoaga lea a Richmond.