Ads by Google Ads by Google

MAGALEI: Ua soli e le malo le tulafono

O le faaiuga ua faia e le faigamalo e tuu atu ai tagata faigaluega mai le Matagaluega o Aoga faatasi ai ma tupe uma e totogi ai latou, i lalo o le Matagaluega o Galuega Lautele a le malo, o se auala lea ua manino mai ai le soli e le malo o le tulafono, e pei ona taua e le afioga i le alii Senatoa ia Magalei Logovi’i i luma o le Senate i le taeao ananafi.

 

O le mataupu lenei na fesiligia e le alii senatoa i se iloiloga sa faatautaia e le Komiti o Galuega Lautele a le maota maualuga ananafi, lea na molimau ai le Faatonusili o le Matagaluega o Galuega a le malo ia Faleosina Voigt, ma ni isi o sui o lana matagaluega.

 

Ina ua fesiligia e Magalei le tamaitai faatonu e faamalamalama atu le tulaga i tagata faigaluega a le Matagaluega o Aoga, lea o lo o galulue i le faaleleia o faleaoga, lea ua maua tala ua tuuina atu i lalo o le vaavaaiga a lana matagaluega faatasi ai ma le vaega tupe e totogi ai i latou nei, na saunoa ai Faleosina e faapea, “o le vaega lena sa tuuina mai i lalo o le vaavaaiga a le matou matagaluega ia Novema 2013, i totonu o le Tausaga Tupe fou lenei 2014.”

 

Saunoa Magalei i le taimi o le iloiloga e faapea, e fia malamalama atili lona sui i le aulaa na faatinoina ai le suiga lea, aua o ituaiga gaioiga nei e le faatagaina i lalo o le tulafono.

 

Na faamanino atili e Magalei, i lalo o le tulafono tau Paketi a le malo, e na o le $25,000 e mafai ona tuuina atu e le Teutupe a le malo i totonu o le kuata e tasi, pe afai e manaomia le tuuina atu o se vaega tupe mai le isi matagaluega aga’i atu i le isi matagaluega.

 

I luma o le maota maualuga i le taimi o folafolaga i le taeao ananafi, na faailoa atili ai e Magalei i afioga i Senatoa le le sa’o o le gaioiga ua faia e le faigamalo, i lo latou aveese mai lea o tupe, o tagata faigaluega atoa ai ma polokalame faapitoa mai le isi matagaluega a le malo, ae tuu atu i le isi matagaluega e aunoa ma le uia o ala o le tulafono.

 

“I lalo o le tulafono, e na o le $25,000 i le kuata e mafai e le Teutupe ona aveese mai i le isi matagaluega ae tuu atu i le isi matagaluega a le malo, ae o le gaioiga lea ua faia e le malo, lea fo’i ua faamaonia mai e le tamaitai fa’atonusili, ua manino mai ai le soli e le faigamalo o le tulafono, ma ua tatau ona fai sa tatou faaiuga i le mataupu lenei, ina ia fautuaina le alii kovana e tusa ai o le tulafono ua soi,” o le fautuaga lea a Magalei, lea sa avea ma Teutupe a le malo i le nofoaiga a Togiola ma Faoa ua mavae atu.

 

Na tula’i le afioga i le alii senatoa ia Laolagi Fonoti Savali Vaeao ma ia faailoa i luma o le maota e faapea, e tatau ona fai se galuega a le Senate e saili ai se fautuaga mai loia a le malo e uiga i lenei mataupu, ma tuuina atu ai se fautuaga i le alii kovana e tusa ai o le mataupu lea ua saunoa i ai Magalei.

 

Saunoa Laolagi e faapea, o le mea moni ua soli e le malo le tulafono, ma e tatau ona fautuaina le kovana e tusa ai o le gaioiga ua latou faia e soli ai le tulafono.

 

O le tausaga na te’a nei na faalauiloa ai e le afioga i le alii kovana ia Lolo Matalasi Moliga lona faia o ia suiga.  Na faailoa e Lolo i luma o lana kapeneta i se tasi o fonotaga e faapea, e tasi lava le manulauti na mafua ai ona faavae le Ofisa o aoga, o le aoaoina lea o fanau ina ia i’u manuia ma aoga mo aiga ma le atunuu.