Ads by Google Ads by Google

MAGALEI: E maua totogi a le malo i le aso

“Ou te faamaonia atu i luma o a outou afioaga i sui mamalu o le atunuu, ua i ai le tupe e fai ai totogi o tagata faigaluega a le malo mo taeao (taeao nei),” o le saunoaga lea a le Teutupe a le Malo, le susuga Magalei Logovi’i, i luma o le komiti o Sailiga o Alamanuia a le maota, i se iloiloga sa faia ai i le aso ananafi.

O le tupe lea ua maua e totogi ai le malo i le aso, o le vaega tupe lea e masani ona tu’uina mai e le Initeria mo le malo i kuata taitasi, peita’i o lea ua talosaga le malo ina ia fa’amatu’u mai le vaega tupe mo le isi kuata e lei o’o i ai, se’i fesoasoani ai i totogi a le malo.

O le isi mafua’aga na taua e le kovana sili, ua tulai mai ai fa’afitauli tau tupe ma tau a’afia atu ai ma totogi a le malo, o le feso’ota’i lea o aso totogi a le malo, talu mai le vaiaso o le kerisimasi ma le tausaga fou, atoa ai ma le vaiaso totogi lenei. 

E le gata foi i lea, o le isi mafua’aga na taua e le alii kovanai, ona o lea ua fa’amuta le toe aoina e le malo o le lafoga e 2% lea e tipi mai i totogi o tagata faigaluega, lea foi na faamaonia e Magalei i luma o le komiti i le aso ananafi le tulaga lea.

Saunoa Magalei i le taeao ananafi, e le o se taimi muamua lenei ua fa’aletonu ai totogi a le malo, peitai e lei fa’atasi lava ona misi se totogi a le malo, ae o lea foi ua amata ona vavala mai tulaga faaletonu ia ina ua fa’amuta le toe aoina o le lafoga e 2%.

Ina ua fesiligia e le afioga i le alii faipule ia Puletuimalo D. Koko le alii Teutupe, po o fea le pili tupe e pito sili ona aoga o pili tupe e lima ia na tu’u atu e le kovana i le fono i le tausaga na te’a nei, na saunoa Magalei, e faigata ona ia tali i le fesili, peitai i lona talitonuga, e aoga uma lava ma taua pili tupe na tu’uina atu e le kovan, ona o le mafuaaga e tasi, ia maua se vaega tupe fa’aopoopo mo le malo.

Sa ia faamaonia foi i luma o le komiti e faapea, e le o se tulaga lelei le mea lea ua fai e le malo o le fa’atalosagaina o le Initeria ina ia aumai vaega tupe ua fuafua mo Amerika Samoa sei fa’aaoga, e ui e lei taitai o’o i le taimi e tatau ai ona fa’aaoga ai.  Ae ua faia lea tulaga ona ua leai lava se isi alofaga mo le malo i totogi o tagata.