Ads by Google Ads by Google

Mafutaga Motusia : Si A’u Toe Sa’afi Mo Oe

Ua lagia Nu’uuli ma Paepaeuli, ae maise le Laoa i Agaoleloi, aua ua amia le fetalaiga a le To’afa sa puipuia maota ia ma le laoa sa ia fa’aagaaga ae a saofa’iga a si ona Aiga. O le lagia lava lea o le mea e afifio ai le Nofoa Maopu ma Usoali’i, Afifio ai Taumafalofi ae puipuimalu e fetalaiga a le To’afa ma upu ia te oe le Itu’au Malosi.

Ua solo le falute i le fa’amoemoe o le Aiga potopoto, aua o le sa avea ma Poutu i lona laoa lea, e avea ma sui o aiga i le afio’aga ma le itumalo, ae tainane Samoa atoa i le fa’alagamaea ma le sivaloa i taimi e sasao ai Ponao’o ma Tamali’i o le atunu’u. Talofa, ua tafea le tauofe, ua tagi lotulotu fo’i Apa’ula ma toe momo’o e te toe tu tasi mai.

Ua fa’alele le lupe sa tulima, ua motusia ai le avei o le mafutaga mafana i le aiga, ae o se palefuiono ua mamae i fisaga fa’anoanoa o le mafutaga i le alofa moni ua motusia e le malaga fita a le maliu ma le oti.

E moni ai upu o le Tusi, “Ou te le tatatuli pe toe fafagu i la’u Manamea, ae tau lava, ina ou talosaga i Tama Fafine o i Siona, pe a e va’ai i la’u manamea i le ala, ona fa’apea lea, “e ua vaivai a’u, i lo’u manatu atu!” Fa’amaise le Atua i le Tausi ma le Fanau ma Aiga loto fa’avauvau.

Ina ua mae’a le sauniga mamalu sa fa’ataunu’uina e le Malo ae maise ai i le Fono Faitulafono a le Malo o Amerika Samoa, ona se’e lea o le Sa o lana afioga le Senatoa, Tofa le To’afa Seui La’au Mautonu i lona laoa i Agaoleloi, Nu’uuli mo sauniga fa’atulaga a le Afio’aga ma Aiga.

Na mua’i faia lona sauniga amata i le Malumalu o le “Ala i le Ola” Ekalesia Fa’apotopotoga Kerisiano i Amerika Samoa i Nuuuli.

Ina ua mae’a sa toe molita’i mai lona va’a i lona laoa ma talia nisi o ona aiga masi’i fa’aaloalo atu e fa’ailo lo latou valevale alofa i lana tofa i lana malaga. Ona soso’o lea i le afiafi i lona itula e 6:00 ua amatalia Leo ma e to’a 12 aufaipese sa auai mo lea fa’amoemoe. I le itula e 10:30 i le afiafi ua mae’a ona o le manatu i fanau a’oga ae fa’aauau ai ona leo e le pa’ia maualuga o ona aiga, i itu tetele ma ona itu taulagi.

Na alafa’i aiga e toe talia le mamalu maualuga o Aiga, Fa’alapotopotoga, Le Malo, ae maise o Sosaiete ma Ekalesia sa fa’amalo’ulo’u atu e fa’ailo le agaga Samoa o le fesoasoani, fa’amafanafana ma le alofa e ala i a latou fa’aaloaloga na masi’i fa’aaloalo atu ai. E iva lelei si’i na talia i le taeao, ma na fai ai si tuai o le fa’asologa o lona toe sauniga i le Malumalu ma lagomau ai i ona oliolisaga tumau i Nu’uuli lava.

I lona toe sauniga i le Ala O le Ola, na fa’ato’a faia ai le molimau a si ona tuafafine e to’atasi lava o lo’o soifua mai pea, Fiafia Seui - Samuelu. O ia lea sa ia fa’ailoa nisi o uiga fita o lona tuagane, “e le to’ele lava lana fati i so’o se mea e a’afia ai Nuuuli!” O ana saunoaga fita, ae afifi ai lava lona alofa ma le agaga fai aiga lelei, fai nu’u lelei, sapi mo tamafanau a lona nu’u i fafo ma i’inei lava, ae maise lona tausi aiga lelei e aofia ai ona tuafafine ma uso, ma le to’alua ma le fanau.

Na muamua si’i mai e Fiafia le mau i le filifiliga o se e avea ma tupu i Isaraelu e Samuelu, lea na fa’atonu ai e le Atua - “Ou te le loto i le tino’ese, maluali’i, po’o le malosi, ae ia e va’ai lava i le loto.” Ona o Seui o le ui’i o le fanau e aofia ai i latou e to’a 7teine ae to’alima tama, na maliu loa le latou tama, ae filifili loa e si o latou tina Seui La’au le ui’i e avea ma suli e nofoia le suafa mo le aiga. E 40 tausaga o lana saofa’iga i le pou o aiga, le mea e e’e ai le tofa le to’afa. “Seui”.

“Talofa ua sola, ae ua penei ai a’u nei le tuafafine, pe o ai o le a tu mai i so’u aso ua atofa e le Atua? Talosia o i ai pea suli o Tuimavave!”

O le molimau na soso’o ai, o se molimau na sau mamao, ma o molimau ia e tele ina fa’afiafiaina loto o aiga, aua e le te’i te’i o’o mai, e i ai se fe’au taua na fa’amalo’ulo’u mai ma i latou. Le susuga le Fa’amasino Fa’au’uga To’oto’o Tago mai le Setete o Hawaii.

Na ia saunoa ma fa’aalia ai nisi o uiga, lotonu’u ma le faitama o lenei tama. Na mua’i to’ai taunu’u fa’amanuiaga mai ia Se’ui La’au ina ua mae’a fa’ae’e papa o le tofi Fa’amasino Circuit Judge ia te ia, pe lua tausaga ua te’a, ae le’i galo ai ona fa’apea “ua ou mimita lava ia te oe ma au taumafaiga, ua fa’aea fo’i le igoa o Nuuuli ia te oe, Atali’i.”

Amu’ia alo o Nu’uuli, sa i ai ni si e ‘ai’aiuli ia outou taumafaiga! Ua i’u manuia lea fa’amoemoe peita’i, “O le a se aoga o le Seu pe a lea’i se i faleva’ai!” I lana molimau sa ia fa’ailoa ai, “O nei lava tama matutua o Nu’uuli, lalamua e fa’ailoa lo la’ua lotonu’u ma e mitamita i o la’ua agaga i taumafaiga uma lava a fanau a Nuuuli i fafo, le afioga fo’i le Ma’opu Soliai Tuipine Fuimaono.”

O lana molimau sa fa’ai’uina i le pese “Mo’omo’oga sa molia i talosaga.”

O le afioga le Senatoa, Tofa Seui La’au Mautonu, o se alo e fa’asino ia Seui Mautonu o Nuuuli, Amerika Samoa ma Malaela Aleipata, Samoa ma lona tina o Fa’alogoifo Phillip McMoore o Nu’uuli, Aunu’u ma Fitiuta Manu’a.

Na fa’aipoipo o ia i le tina o le aiga, Palepa Milovaleupuosamoa Gagau Sanitoa ia Iuni 08, 1962 ma e to’aono o la’ua alo, ua atoa le 28 o fanau a fanau ma le to’a 4 o fanau a fanau a la’ua alo.

E maliu le tofa Seui La’au Mautonu, o lo’o avea o ia ma Senatoa o lona itumalo i le Maota Maualuga o le fono faitulafono i lana nofoa’iga lea e fa’ato’a mae’a ia Tesema 2012.

- Mai le tausaga 2005-2009 sa avea o ia ma Fa’atonu o le Matagaluega o Oloa a le Malo [CPO].

- Mai le tausaga e 2001-2005 sa avea ma fa’atonu o Paka & Malae Ta’alo.

- 1997-2001 sa avea o ia ma Fa’atonu o Paka & Malae Ta’alo.

- 19993-1996 sa avea o ia ma Sui Fa’atonu o le Matagaluega o Oloa a le Malo.

- 1983-1996  sa avea o ia ma Faufautua fa’apitoa mo le Fa’atonu Matagaluega o Oloa a le Malo.

- 1969-1983 Supavaisa e Suesuea Oloa a le Matagaluega o Oloa a le Malo.

- 1968-1969 Galue i le Pulega o Tagata Faigaluega a le Malo.

-1966-1968 Galue Supavaisa i le Matagaluega o Galuega Lautele a le malo.

- 1963-1966 Suetusi / Tausi Tusi Star Kist Samoa Co.

- 1962-1963 Galue Vaega o Sapalai a le Malo.

 

A’oa’oga:

- A’oga a le Faifeau i Nuuuli EFKAS.

- Nuuuli Elementary School - [Manulele Tausala Elem].

- Poyer Jr. High School

- American Samoa High School - Samoana

- American Samoa Community College.

 

Isi ana galuega mo le mamalu lautele o le atunu’u ma le Ekalesia:

- Failautusi Tiakono Toeaina Matagaluega Fagaloa & Ituau.

- 40 tausaga o avea o ia ma Fofoga o le Ituau - tofa le To’afa i lona suafa “Seui.”

- Tiakono EFKAS - Nuuuli.

- Ta’ita’ifono a le Sosaiete a Tiakono EFKAS - Nuuuli.

- Taitai Pese: Aufaipese Osana Aleluia - Nuuuli

- Taitai Pese Aufaipese Tu’ufa’atasi Nuuuli.

- Taitai Komiti o le Galuega EFKAS Nuuuli, Aufaipese Osana Aleluia - Nuuuli,

- Na avea o ia ma Sui o le Itumalo i le Komiti e Iloilo o le Fa’avae o le Malo o Amerika Samoa

- Perestene o le PTA Manulele Tausala Elementary School - Nuuuli.

Ia manuia lau malaga!

Ona fetalai atu lea o le Ali’i, O ai fo’i le auauna e Pule, ua fa’amaoni ma le mafaufauu ua tofia e lona ali’i e pule i ana auauna, ia avatumea e ‘ai ia te’i latou i ona itu aso? “Amuia lea auauna pe a sau lona Ali’i a’o fa’apea ona fai.” Luka12: 42-43.