A o tau fa’amalamalama ai e le sui o le Kamupani Va’alele o le Inter Island Airways ia Aleki Sene Jr i luma o le maota o sui i le vaiaso na te’a nei, tulaga fa’aletonu o lo o feagai ma le latou kamupani va’alele ua mafua ai ona umi le taimi e le o toe lelei le latou va’alele i Manu’a, na taua ai e faipule mai Manu’a le mafai ona ofo atu e tagatanu’u o Manu’a se fesoasoani ina ia fa’aleleia ai tulaga o femalagaaiga i le va o Manu’a ma Tutuila.

“Afai o le tulaga lena o lo o i ai le fa’aletonu o le auaunaga a le va’alele, e mafai ona fesoasoani atu ni isi o tagata i Ofu ma Olosega e saili ni auala e toe fa’aleleia ai le va’a ma ia toe fa’aauau lana tautua masani mo le Itumalo”, o le saunoaga lea a le ali’i faipule ia Toeaina Faufano Autele, ae na fa’ailoa e le sui fofoga fetalai ia Talia Fa’afetai I’aulualo e fa’apea, “o le isi auala e mafai ai ona maua fesoasoani mo tulaga o femalagaaiga i Manu’a, o alagatupe mai fafo e mafai ona talosaga i ai”.

O le ogatotonu o le iloiloga sa faia e le komiti o le Pulega o Uafu ma Taulaga a le maota o sui i le aso Faraile na te’a nei, na fesiligia ai loa e le afioga i le alii faipule mai Manu’a ia Fetui Fetu Jr le susuga a Sene Jr sa molimau, pe o le a se mea ua tupu i le va’alele a le Inter Island Airways lea sa tautuaina le Itumalo o Manu’a mo le tele o tausaga.

Na fa’amanino e Sene Jr e fa’apea, o le va’alele o lo o i ai se fa’aletonu i le afi, ma o lo o tau saili se tupe e totogi ai le toe fa’aleleia o le afi o le va’alele.

“O lo o tau saili pea lava i le taimi nei se fesoasoani mai faletupe i le atunu’u e pei o le Faletupe o Hawaii, Faletupe o le ANZ Bank fa’apea ai ma le Faletupe o Atina’e, mo sina nonogatupe se’i tau totogi ai le toe fa’aleleia o le afi o le va’alele o lo o fa’aletonu, ona e fai lava si taugata o le totogi o le galuega lea”, o le saunoaga lea a Sene Jr.

Na taua e Sene Jr i luma o le komiti e fa’apea, o lo o tuai lava se tali mai a le Faletupe o Hawaii ma le ANZ, ae o lea ua maua vave mai le tali a le Faletupe o Atina’e, ma ua fa’amoemoe o se vaega tupe e maua mai ai o le a auina atu loa e totogi ai le afi ma auina mai loa i le atunu’u mo le fa’apipiiina ma toe lele loa le va’alele.

Na fa’ailoa e faipule mai Manu’a i le susuga Sene Jr e fa’apea, e ui ua fai si umi o fa’aletonu le tautua a le latou kamupani va’alele i Manu’a, ae o lo o naunau pea le itumalo e aloaia le tautua lea, ona ua tele tausaga o tautua le latou kamupani mo le atunuu.

“Afai e toe lelei le va’alele ma toe amata lana tautua mo Manu’a, ia alofagia le itumalo, ua tele le manaoga ua tula’i mai ae ua fa’aletonu va’alele”, o le saunoaga lea a Fetui Jr ma ia taua ai le feagaiga lea ua mafua ai ona lele le Polenisia i Manu’a ona o le manaomia tele e le itumalo o se va’alele.

Saunoa Toeaina e fa’apea, e leai ni tagata Manu’a e tele ni tupe o i ai po o ni milionea fo’i, ae afai e silafia e le itumalo le manaoga o lo o tula’i mai i le kamupani va’alele ma taumafai i ai sa laotu fesoasoani, atonu o se isi lea la’asaga lelei mo le itumalo ina ia toe lelei ai femalagaaiga i luga o le ea.