O le vaiaso na te’a nei na fono ai ni isi o itumalo o le atunuu, mo le tau sailiina o ni isi e avea ma o latou sui i le maota maualuga a le Senate, mo le nofoaiga fou a le Fono Faitulafono o lo o sosoo ai nei.

O Itumalo na fono e aofia ai Sua #1, Sua #2 ma le itumalo o Alataua, ma e le gata la i le sailiina o tofi Senatoa a Itumalo, ae sa sailia ai foi ma tofi Faalupega mo le isi 4 tausaga o lo o sosoo ai nei.

ITUMALO SUA #1 & SUA #2

O le aso Toona’i na te’a nei na tuu faatasi ai le fonotaga a Itumalo o Sua #1 ma Sua #2, mo le filifiliina lea o latou tofi Senatoa e lua mo le maota maualuga a le Senate.

O le maota o le afioga i le alii Faalupega ia Tialavea Misi i Amaua na usuia ai le fono, lea na aofia uma i ai faauluuluga o le Itumalo atoa.

Na taua e se molimau i le Samoa News e faapea, e le’i umi le fono ona sa faigofie ma malamalama tulaga o le faasoloina o tofi a le Itumalo.

I le faaiuga la, ua tofia ai le afioga ia Sua Vaiuli Matautia mai Afono, e fai ma Senatoa o Sua #1, ae o le afioga i le alii Faalupega ia Tialavea Misi mai Amaua, o le a fai ma Senatoa o Sua #2, ae o le tofi Faalupega lea o lo o i le afioga a Tialavea i le taimi nei, ua see atu nei ia Sailele ma Masausi, ma ua filifilia i ai le afioga Igafo e fai ma Faalupega o le Itumalo.

Ina ua fesiligia e le Samoa News le afioga Sua i le taeao ananafi, sa ia faamaonia mai ai le tofiaina lea o ia e avea ma Senatoa o le Itumalo.

Na faafetaia e le afioga Sua le itumalo i la latou faaaloalo maualuga, lea ua afea ai o ia i la latou filifiliga, ma ua sauni foi e tautua le Itumalo ma le atunuu.

O Sua sa tautua i le Matagaluega o Vaega Lautele ma malolo litaea mai ai, o le taimi nei, o lo o tautua pea o ia i lona aiga, nuu ma le Itumalo.

O le afioga i le alii Senatoa ia Lemanu Peleti Mauga, lea ua filifilia e avea ma Lutena Kovana o le malo mo le nofoaiga fou, o lo o nofoia le tofi Senatoa o le Itumalo o Sua #1 i le taimi nei.

Na maua foi se feiloaiga a le Samoa News ma le afioga ia Tialavea i le taeao ananafi, e tusa ai o le tofiaina o ia e avea ma Senatoa o le itumalo.

I le saunoaga a le afioga Tialavea, e le gata sa ia toe faamaonia mai ai tofiga a le Itumalo, ae sa ia faafetaia foi le itumalo e tusa ai o le tofiaina o ia.

Saunoa Tialavea e faapea, ua sauni e tautua le Itumalo ma le atunuu e ala i le tofi Senatoa. O le afioga ia Tialavea ua malolo litaea mai le tele o tausaga sa tautua ai ni isi o Matagaluega a le malo o Amerika Samoa.

O le afioga i le alii Senatoa ia Malepeai Setu o lo o nofoia le tofi Senatoa o le Itumalo  i le taimi nei.