Ads by Google Ads by Google

Maea ona filifilia Kovana Itumalo a Manu’a ma le Falelima i Sasa’e

Ua maea nei ona sasa’a le tofa i le mamalu o faauluuluga o le Falelima i Sasa’e faapea ai ma le Itumalo o le Manu’atele, mo le sailia o ni isi e fai ma o latou sui i le tofi Kovana Itumalo mo le isi nofoaiga o lo o sosoo ai nei, se’i vagana ai le Falelima i Sisifo, faatoa usuia la latou fono i le mae’a ai o le faatautoina o le faigamalo fou i le vaiaso nei.

Ua tasi nei le filiga i le Falelima i Sasa’e, o le afioga Alo Dr. Paul Stevenson o le a fai ma o latou sui, ae mo le Itumalo o le Manu’atele, o le afioga i le alii Faatui ia Misaalefua John Hudson o le a ia toe faaauauina le tofi.

ITUMALO MANU’A

O le vaiaso na te’a nei na usuia ai le fonotaga a le Itumalo o Manu’a i le Laoa o le tofa a Le’i S. Thompson i Tafuna, mo le filifiliga o se tasi e avea ma Kovana Itumalo i Manu’a.

O lea fonotaga sa auai afioga i Faatui, o Tapaau atoa ai ma Tootoo o le itumalo o Manu’a, sa faatasi atu ai foi ma le afioga i le kovana sili filifilia o le atunuu, le tofa i le tootoo ia Lolo Matalasi Moliga.

O le afioga i le alii Faatui ia Lefiti Atiulagi Pese na filifilia mai e itumalo o Ta’u, Faleasao ma Fitiuta i le latou fonotaga i le tolu vaiaso talu ai, ae o le afioga ia Misaalefua na toe faatula’i mai e itumalo o Ofu ma Olosega/Sili e toe faaauauina le tofi.

Ina ua fesiligia Misaalefua e tusa ai o le faaiuga a le itumalo, sa ia taua ai lona faafetaia o le itumalo atoa a Manu’a, i lo latou lagolagoina ma le faatuatuaina o ia na te toe faaauauina le tofi.

Saunoa Misaalefua, e le o se tofi faigofie lea tofi, ae ua avea le lagolago atu a le itumalo faatasi ai ma le taitaiga a le Atua, ua mafai ai ona ia faaauauina mai le tofi mai le 4 tausaga ua mavae.

FALELIMA I SASA’E

O le faaiuga o le vaiaso na tea nei na fono ai le Falelima i Sasa’e i le malae i Gagamoe, mo le sailiga o se tasi na te tauaveina le tofi o le Kovana Itumalo, lea sa umia e le afioga i le Tama’ita’i o le Ao ia Gaoteote Tapatonu o Vatia.

O se fonotaga sa toafilemu lona amataina toe puupuu foi, ina ua faailoa e le tofa i le Tama Matua ia Fiatauaulava Sauni e faapea, o le tofi mo le Falelima i Sasa’e, ua oo atu nei le faasologa i le Launiu Saelua, le Itumalo a le afioga i le Maoputasi ia Mauga Tasi Asuega, ma o ia foi lea ua taoto atu i ai le mataupu mo sana saunoaga po o ai o le a ia tofia na te tauaveina le tofi.

A’o le’i saunoa Mauga, na maua le avanoa o le afioga ia Gaoteote Tapatonu na te faafetaia ai le Falelima i Sasa’e e tusa ai o le avanoa sa tuuina atu ia te ia na te tauaveina ai le tofi.

Saunoa Gaoteote ana leai le lagolago atu a le Falelima i Sasa’e, o afioga i Faalupega, Pulenuu ma Leoleonuu, e le mafai ona ia fai toatasi le galuega.

Na faaiu lana saunoaga i lona toe talosagaina o le Falelima i Sasa’e mo se avanoa na te toe tauaveina ai le tofi manu o maua lona malosi.

Na saunoa le afioga i le Maopu ia Soliai Tuipine Fuimaono e faapea, o tulaga ua i ai le tofi a le Falelima i Sasa’e, o le a tuufaasolo. Sa ia faafetaia foi Gaoteote mo le taimi sa ia tauaveina ai le tofi, peitai sa ia faamalulu i ai e tusa o lona faanaunauga e toe fia alu i le tofi.

Na mua’i faamalulu le afioga Mauga i lona Itumalo o le Launiu Saelua e tusa ai o le faaiuga o le a ia faia, aemaise ai o lea sa i ai sana saunoaga i se taimi ua tuana’i, i le ono tofia lea o se sui o Tei ma Anoalo e saili mai ai se Kovana o le Falelima.

I le faaiuga o lana saunoaga, sa ia lafo atu ai loa le tofi i le Itumalo o Ituau latou te faaauauina, ma tofia ai loa e le afioga i le Maopu ia Soliai le afioga a Alo e fai ma Kovana o le Falelima i Sasa’e.

FALELIMA I SISIFO

Ina ua fesiligia le afioga a Satele Galu Satele, o ia lea o lo o avea ma Kovana Itumalo o le Falelima i Sisifo i sa latou faaiuga, na saunoa ai le Alo o Salamasina e faapea, talu ai ni isi o tuatuagia le maalofia o le Falelima i Sisifo, ua manatu ai faatoa usuia sa latou fonotaga e faamaonia ai se tasi e fai ma o latou tofi i le maea ai o le faatautoina o le faigamalo fou.

O le aso a taeao, Ianuari 3, 2013 i le itula e 12:00 i le aoauli e pei ona faataoto mai e le Tulafono, e faatauto ai le Kovana Sili ma le Lutena Kovana, faapea ai Senatoa ma Faipule mo le nofoaiga fou o le a sosoo ai nei.